Pućik za kolesa
Krótkopowěsće (13.04.16)
NSLDź z hosćom w Danskej
Tønder/Tinglev. Wot wčerawšeho je Němsko-Serbske ludowe dźiwadło z hosćom třěsneho zwjazka němskeje mjeńšiny w Danskej. Zwjazk němskich Sewjeroschleswigčanow (BDN) bě lěto 2016 jako „Serbske lěto“ pomjenował a Budyske dźiwadło z němsko-serbskej inscenaciju „Zgubjone a namakane“ do šulow přeprosył. Štyri króć předstajichu ju wčera šulerjam w Tønderje a dźensa w Tinglevu.
Wjace njemandźelskich dźěći
Praha. W Čěskej republice ličba zwonkamandźelskich porodow přiběra. Lětsa narodźi so najskerje prěni raz w stawiznach kraja wjace dźěći nježenjenym poram hač zmandźelenym. Z nowym zakonjom chcedźa nětko samostejacym maćerjam staršiski pjenjez kaž tež druhe socialne lěpšiny bjez přihłosowanja nana dźěsća zmóžnić.
Tydźenje lěsa zahajene
Na koncerće móhło wjace wopytowarjow być
Serbski ludowy ansambl a Hornjohórčanska gmejna přeprosyštej z plakatami a wabjenjom we wjesnym telewizijnym programje „oko“ a tež w informaciskim łopjenu gmejny na koncert pod hesłom „Wobkuzłaca klasika“ minjenu sobotu do wjacezaměroweje hale. Dypkownje za tele zarjadowanje dósta gmejna wulki zawěšk, kiž sćěnu z nastrojemi wot wjercha hač k špundowanju w rjanej ćmowočerwjenej barbje zakrywa. Akustika je z njej wo wjele lěpša.
Na programje stejachu „Serbske reje“ Jana Pawoła Nagela, wujimki z dweju sinfonijow Johanna Georga Leopolda Mozarta, nana Wolfganga Amadeusa Mozarta, a po přestawce cyklus „Štyri počasy“ Antonija Vivaldija. Wšitke kompozicije dwaceći čłonow sylny orchester wuběrnje přednjese. Chłóšćenka bě wězo kompozicija Antonija Vivaldija (1678–1741) ze solistkomaj Anett Baumann z rjadu 1. wiolinow Sakskeje statneje kapały Drježdźany a Lianu Bertók z Budyšina na cembalu. Dirigował je orchester Dieter Kempe.
„My smy wšitcy město“
Wojerecy (AK/SN). Zbytki cigaretow, rozbite bleše, prózdne tyzy, tity a dalši njerjad leži na sankowanskej hórce. Na skłoninach wuhladaš staru papjeru. Wotpadki zanjerodźeja hrajkanišća, łuki a kerki we wuchodnym wólnočasnym parku. „Wulki sportowy kompleks je z płotom wobdaty a hladany. Ale runje mjeńše sportowe připrawy su dźeń a hrozniše. Často su płoty hižo spoteptane, wotpadki so kopja a strach zranjenja přiběra“, mjerza so Eberhard Friese z bydlenskeho kompleksa IV. Minjenu sobotu pomhaše wón při nalětnim rjedźenju, organizowanym wot facebookoweje iniciatiwy Měšćanski dźiw. „Něhdy bě to dźěćacy paradiz. Tule steješe indianska wjes“, praji 63lětny. Wo tym swědča dźensa jeno zbytki. Wotpadkowe sudobja často pobrachuja. „A hdyž so nowe nastaja, je rjelpusojo z přewjele mocu hnydom zaso skóncuja“, měni Brigitte Rösner. „Město je dźeń a mazaniše.“
Policija (13.04.16)
Paduši sej lochko měli
Nowa Wjes. Chětro dołho darmotnje z awtom jězdźić móža nětko njeznaći, kotřiž su w běhu minjeneho kónca tydźenja w Nowej Wsy w gmejnje Šprjewiny Doł něhdźe 2 000 litrow diesela pokradnyli. Kaž policija zdźěli, bě ćěriwo w štyrjoch połnje natankowanych twarskich mašinach, kotrež stejachu bjez dohlada blisko statneje dróhi S 130. Přidatnje lochko sej paduši mějachu, dokelž njeběchu wěka tankow zamknjene. Wěcna škoda wučinja 2 000 eurow.
Spěchowanje zmysłapołnje zasadźić
Saněrowanje zakładneje šule we Wulkich Ždźarach je tuchwilu jedne z najwažnišich předewzaćow Łazowskeje gmejny. Při tym maja so tež spěchowanske srědki zasadźić.
Łaz (AK/SN). Z komunalneho inwesticiskeho programa „Mosty do přichoda“ móže Łazowska gmejna najskerje ze 445 000 eurami ličić. Tele srědki chcedźa zmysłapołnje zasadźić. „Jedna so tu wo 75procentowske spěchowanje. Jako gmejna mamy potajkim 25 procentow swójskeho podźěla njesć. Tuž su inwesticije we wobjimje 557 000 eurow móžne“, rozłoži komornica Mandy Liepert na wčerawšim posedźenju Łazowskeje gmejnskeje rady.
Přidatne pjenjezy za studnje
Zmylkow architektki dla chce so gmejna prawnisce poradźować dać
Njeswačidło (JK/SN). Mědlizanje wčerawše posedźenje Njeswčanskeje gmejnskej rady njebě. Kontrowersnu, ale přiwšěm wěcownu diskusiju wuwabi wotpohlad, přidatne srědki k wotstronjenju škodow wulkeje wody z lěta 2013 w Njeswačanskim hrodowym parku wobzamknyć. Móžachu-li so při prěnim losu za rjedźenje pěskowcowych figurow a studnjow hišće poměrnje spěšnje wo trochu wyšich kóštach dojednać, mějachu při druhim losu prawe hłowybolenje. Tam dźěše wo wyše wudawki za hłubkotwarske dźěła a za wobnowjenje dna třoch studnjow kaž tež wo wotwodźenje wody z twarskeje jamy a wo trěbnu cisternu. Wočiwidnje njebě zamołwita architektka při kalkulowanju a poradźownju wostronjenja škodow wažne wěcy pak spóznała abo wona je zamjelča. Tuž su w běhu twarskich dźěłow přidatne kóšty nastali. Po dlěšim tam a sem so radźićeljo dojednachu, dźiwajo na to, zo so časowy plan ponowjenskich dźěłow dodźerži a tam dalše kóšty njenastanu, so prawnisce poradźować dać.
Měli dom bóle na wědomje brać
Smochčanski Dom biskopa Bena Serbam bóle wuwědomjeć chce Pětr Brězan. 32lětny Smječkečan je něhdźe poł lěta za zarjadnistwo domu zamołwity. K jeho nadawkam słušatej hotelerija a gastronomija (Hoga).
Mjeztym poł lěta nawjeduje Smječkečan zarjadnistwo Domu biskopa Bena w Smochćicach. Mjeztym je so wón do swojeho dźěła zanurił a sej přehlad stworił.
Z nazhonjenjemi a wěcownje
Jako njewotwisny kandidat-jednotliwc nastupi Wolfgang Tietze 24. apryla k wólbam noweho Łazowskeho wjesnjanosty. „Njetrjebamy žane politiske tam a sam jednotliwych stron, ale fairnosć a konstruktiwnosć, wusměrjenej na zajimy wobydlerjow. Rozsudy měli so z nazhonjenjemi a wěcownje tworić“, praji 58lětny z Běłeho Chołmca.
Nawuknył je wón powołanje mechanikarja za brunicowe nastroje, pozdźišo sta so z industrijnym mištrom. Wot 1990 do 1994 bě wón wjesnjanosta tehdyšeje Běłochołmčanskeje gmejny, wot 1994 je nawoda twarskeho wotrjada Łazowskeje wulkogmejny. Jako wjesnjanosta chcył wón infrastrukturu w gmejnje dale wutwarić. K tomu słušeja kolesowanske pućiki a wobswětlenje runje tak kaž znjesliwe wopłóčkowe popłatki. Dalše ćežišćo widźi wón w hospodarskim spěchowanju. Dokelž je přemysłowa přestrjeń we Łazu wućežena, měli po jeho měnjenju dołhodobnje nowu wotkryć.
Krótkopowěsće (12.04.16)
Poćežowanje ludźi dale wulke
Berlin. Poćežowanje dźěławych wotedawkow dla je loni zaso snadnje přiběrało. Tole je wuslědk přepytowanja organizacije OECD. Po tym dyrbješe nježenjeny přistajeny z přerěznej mzdu 49,4 procenty swojeje bruttomzdy za dawki a socialne wotedawki nałožić. Němska zaběra tak třeće najwyše městno mjez 34 čłonskimi industrijnymi krajemi OECD. Lěta 2014 běchu to hišće 49,3 procenty.
Za samsnu rentu
Schwerin. Knježerstwowi šefojo wuchodoněmskich zwjazkowych krajow žadaja sej wot zwjazkoweho knježerstwa jasne wuznaće k přibliženju wuchodnych rentow runinje zapadnych. Tole rjekny ministerski prezident Mecklenburgsko-Předpomorskeje Erwin Sellering (SPD) dźensa w Schwerinje. Jutře chcedźa ze zwjazkowej kanclerku Angelu Merkel (CDU) wo tym wuradźować.
Kongres wo mobiliće přichoda
