W jědnaće hosćencach a barach su sobotu w Budyšinje korčmowy ...
Krótkopowěsće (07.05.24)
Wólbne plakaty wobškodźili
Budyšin. Lěwica w Budyskim wokrjesu je hižo w prěnich dnjach wólbneho boja zwěsćiła, zo so wólbne plakaty w gmejnach a městach wobškodźa. Tak su njeznaći mjez druhim w Chrósće (gmejna Wulka Dubrawa) plakaty wottorhali, štož je Lěwica policiji přizjewiła. Tohorunja su zamołwići škody w Kamjencu, Radebergu, Załomju a Budyšinje zwěsćili a wokrjesnemu předsydstwu strony přizjewili.
Mjenje wohroženych kónčin
Drježdźany. Wot afrikanskeje swinjaceje mrětwy wohrožene kónčiny w Sakskej dale woteběraja. Tole zdźěli wčera, póndźelu, sakske strowotniske ministerstwo. Wulke dźěle Mišnjanskeho wokrjesa njesłušeja nětko hižo wjace do wohroženych kónčin, ale jenož hišće do pufroweho pasma . Dale wohrožene pak wostanu kónčiny we wokrjesomaj Budyšin a Zhorjelc.
Kakteje w čěskej přirodźe
Najrjeńše jutrowne jejka mytowane
Budyšin (mj/SN). Marja Jaworkowa a Helena Palmanowa stej njedawno jako jury w nadawku spěchowanskeho kruha za serbsku ludowu kulturu wo dobyćerjach 71. wubědźowanja wo najrjeńše serbske jutrowne jejko za dźěći a młodostnych rozsudźiłoj. 66 wobdźělnikow w starobje třoch do 23 lět bě so we wosom starobnych skupinach wubědźowało. Při tym móžachu so z wjacorymi technikami wobdźělić. Štyri znate serbske techniki z tradicionelnymi mustrami a tradicionelnymi gratami zhotowjene so mytowachu: wóskowane/jednobarbne a wjacebarbne, bosěrowane/jednobarbne a wjacebarbne, škrabane a wužrawane. Jury chwaleše wosebje kolekcije, kotrež so w technice wóskowanja wuwiwachu, dokelž stej přihot a debjenje jejkow we wóskowanju wo wjele naročnišej hač bosěrowanje. Dobyćerka młodźinskeho spěchowanskeho myta, kotrež běše z 75 eurami dotěrowane, je 17lětna Vivien Wagner z Wbohowa (Halbendorf) pola Budestec. Wona bě so z techniku bosěrowanja wobdźěliła. Třilětna Tilda Palmanec běše najmłódša wuměłča. Wona zdoby sej w jeje starobnej skupinje 3. městno.
Młodostni reje zwučuja
Młodostni klub porjeńšili
Hórki (mj/SN). Hórčanska młodźina je so minjenu sobotu k nalětnjej akciji při klubje zetkała. Hłownej cilej běštej nutřkownu rumnosć kluba barbić a wolejbulowe městno zaso porjeńšić. Nutřkowna rumnosć bě dotal hišće cyle bjez barby a na sćěnach běchu jenož małe molowanki narysowane. Wolejbulowe polo běše połne z njerodźu zarosćene. Nimo hrajneho pola bě tež sak skóncowany. Wón dyrbješe so znowa přahać. Po tym młodostni hišće ležownosć wokoło kluba wot njerodźe wuswobodźichu a wurjedźichu.
Hdyž wohenje powědaja
Bywši sobušulerjo so zetkali
Serbske baje w bróžni čitała
Wochozy (AK/SN). Serbske baje Mužakowskeje hole dopominaja na dźěłowe a žiwjenske wobstejnosće łužiskich prjedownikow. Často su wone z městnosćemi kaž tež swójbnymi a ležownostnymi mjenami zwjazane, druhdy samo z časowej dobu. „Baje wotbłyšćuja ćežke wobstejnosće dźěła a strachow, kotrež z njeho wurostu“, rjekny motiwatorka za serbsku rěč w Slepjanskim regionje Juliana Kaulfürstowa minjeny pjatk we Wochožanskej Šwjelic bróžni. Hromadźe z tamnišim towarstwom je wona na čitanski wječor přeprosyła. Na nim čitaše z bajoweje knihi, kotruž bě towarstwo Kólesko 2018 wudało.
Serbski mejski swjedźeń
Njewšědnje wjele porow dźěći a młodostnych na mejemjetanju
Pančicy-Kukow (SN/MWj). Z wustupom kapały Šwintuchi a ze zabawnej bjesadu je so wčera mejemjetanje w Pančicach-Kukowje skónčiło. Z mnohimi pomocnikami bě młodźinski klub poradźeny serbski swjedźeń wuhotował, kiž je wjesnjanam a jich hosćom zabawne hodźiny wobradźił. Při kinowymaj předstajenjomaj za dźěći a dorosćenych pjatk popołdnju a wječor stan hišće přejara wobsadźeny njebě. To pak so při diskotece změni, tak zo dobra nalada hač do pózdnich hodźin traješe.
Krótkopowěsće (06.05.24)
Wjele projekty hižo přizwolili
Drježdźany. Za změnu strukturow w sakskim dźěłu Łužicy bu dotal 121 projektow wuzwolenych. Cyłkowny wolumen projektow wučinja 1,1 miliardow eurow. Kaž sakske ministerstwo za regionalne wuwiće nětko zdźěli, su zarjady hižo 78 projekty přizwolili, za čož steji 684 milionow eurow k dispoziciji.
Syły ludźi na wiki přijěli
Koćina. Wjele ludźisu sej wčera na burske wiki do Koćinskeho Krabatoweho mlokoweho swěta dojěli. Na wjace hač 70 stejnišćach kupichu sej wopytowarjo regionalne wudźěłki, chłóšćenki abo produkty rjemjeslnikow. Tež sakski ministerski prezident Michael Kretschmer (CDU) je do Koćiny přijěł a přehladku oficialnje wotewrěł.
Wenclowa nětko wuměnkarka
Do instituta kapałnikow
Drježdźany. Drježdźanski institut kapałnikow přeprošuje wšitkich, kotřiž so za hólči chór zajimuja, a jich staršich na dźeń wotewrjenych duri. Tón wotměje so jutře, sobotu, wot 11.30 hodź. na Wittenbergskej 88 w Drježdźanach. Zajimcy změja mjez druhim składnosć, zjawne proby sćěhować, předspěwać a sej tohorunja institut wobhladać.
Live hudźba w korčmach
Budyšin. Jědnaće barow a hosćencow w Budyšinje wobdźěli so jutře, sobotu, na Budyskim korčmowym festiwalu. W nich zaklinči wot 20 hodź. live hudźba najwšelakorišich žanrow. Korčmarjow při přihotach podpěrało je měšćanske turistiske towarstwo. Korčmowa mila powjedźe wot Jerjoweje přez Bórklin, Hrodowu, Mjasowe wiki a Kamjentnu hač na Cyrkwinske naměsto.
Na Třělnišću twarja
Budyšin. Přichodny tydźeń so dźěl Třělnišća za parkowanje awtow nachwilnje wužiwać móc njebudźe. Přičina su twarske dźěła na zadnim dźělu parkowanišća, kotrež njeje skrućene. Wone započnu so póndźelu, 6. meje, a maja tři dny trać. Šoferojo měli swoje awto w tym času w prědnim dźělu Třělnišća parkować.
Do robotiki so zanurić
