Hrajkanišćo kaž wuwozny móst
Wjelcej (PB/SN). Tak mjenowane hesłowe hrajkanišćo je braniborska šefowka statneje kenclije Kathrin Schneider minjene dny we Wjelcej we łužiskej jězorinje wotewrěła. Hrajkanišćo dopomina na wuwozny móst wuhloweje jamy a je prěnje hrajkanišćo Europy z digitalnym poskitkom. Wone bu z něhdźe 150 000 eurami spěchowane. Přidatnje je jury, kotrejž přisłušeše nimo dalšich čłonow referent Domowiny Pětr Brězan, serbski swět bajow w formje małych lutkow sobu zapřijała.
W swojej narěči rysowaše Brězan wopytowarjam wotewrjenskeho zarjadowanja stawizny lutkow a wuzběhny, zo su so wone přez haru wuwoznych mostow w poslednich lětdźesatkach zhubili. Nětko so wosebje wjeseli, zo su so wone zaso do łužiskeje jězoriny nawróćili.
Přez wutworjenje serbskich wužiwajomnych poskitkow chce so město Wjelcej z dźělom wobšěrneho projekta strukturneje změny „Serbske impresije“ stać a so sobu na kolesowansku čaru přizamknyć.
Załožba za serbski lud je na ležownosći hrajkanišća serbski čitanski kućik a móžnosć k sedźenju z bajowymi figurami spěchowała.
„Rěčimy tu potajkim wo lětach!“
Pančicy-Kukow (SN/MWj). Zo je přetwar křižowanišća w Zejicach na kružny wobchad nuznje trěbny, začuwaja wšitcy ći, kotřiž su tam wšědnje z jězdźidłom po puću. Stajnje zaso dóńdźe na křižowanišću k njezbožam, kotrymž by kružny wobchad zadźěwać móhł. Před něšto lětami je so hižo raz wo tym rěčało, potom pak su kružny wobchad mjez Błohašecami a Prěčecami twarili. Po dalšich lětach čakanja zda so nětko ze Zejičanskim kružnym wobchadom zaso něšto hibać. Krajna direkcija je zjawnje wupołožiła tak mjenowane zwěsćenske wobzamknjenje (Feststellungsbeschluss) wo přetwarje křižowanišća a wutwarje něhdźe kilometer dołheho wotrězka statneje dróhi S 100. Podłožki su hač do 20. junija w krajnej direkciji a tohorunja w zarjadniskim zwjazku Při Klóšterskej wodźe w Pančicach-Kukowje wupołožene. Hač do 4. julija maja wobydlerjo składnosć na woběmaj městnomaj swoje wobmyslenja a znapřećiwjenja zapodać.
Něhdźe 400 ludźi je wčera na nalětni koncert chóra Lipa a jeho ...
Krótkopowěsće (27.05.24)
Syć za wožiwjenje pišćelow
Chrostawa. Na iniciatiwu Gottfrieda Silbermannoweje towaršnosće ma so 32 hišće zachowanych nowotwarow pišćelow wuznamneho pišćeletwarca w Sakskej bóle widźomnych stać. Nowozałožena syć wosadow a komunow nadźěła koncertne projekty, digitalne prezentacije instrumentow a turistiske čary k Silbermannowym pišćelam, ke kotrymž tež Chrostawske pišćele słušeja.
Projektaj z Łužicy mytowanej
Berlin. Šulerki a šulerjo 10. lětnika Serbskeje wyšeje šule Worklecy su ze swojim filmom „Móšničku na zapadźe, korjenje w serbskej Łužicy“ myto wubědźowanja „Časy přewróta. Němska w změnje wot časa zjednoćenja“ dobyli. Mjez mytowanymi je tež Spokenword akademija z Běłeje Wody z projektom „Ost-West-poetry“. Je to akademija, kotraž je antologiju „Pozběh je žónski“ wudała.
Smjerdźečenjo w Sicilskej pobyli
Njeznaći tafle a ławki namórali
Muzej z jubilejom a wikami
Njeswačidło (ML/SN). Domizniski muzej Njeswačidła wobsteji dwaceći lět a tuž je tutomu jubilejej njedźelu, 26. meje, wot 13 do 18 hodź. muzejowy dźeń z wikami rjemjeslnikow na torhošću wěnowany. Na Parkowej dróze a na Lehmannec a Wroblec statokomaj budu předawanišća. Oldtimerowe jězdźidła Wětrowskeho towarstwa přijědu, a wobsedźerjo je předstaja. Po tym móža sej zajimcy z historiskimi jězdźidłami do Łomska dojěć a sej tam Panachec historiski ratarski muzej wobhladać. Na Njeswačanskej nawsy předstaja chowancy dźěćaceho domu „Maks a Moric“ a trubjerjo na hońtwjerskich róžkach swój program. Dale wustupi spěwny duet Andrea a Wilfried Peetz, a za dźěći budźe wjele móžnosćow k zabawje. Towarstwo přećelow kultury a domizny wutrobnje přeprošuje a so tež wo ćělne derjeměće postara.
Dwójce meju mjetaja
Njebjelčicy. Na swoje mejemjetanje přeprošuje Njebjelčanski młodźinski klub njedźelu, 26. róžownika, w 15 hodź. na Njebjelčanske swjedźenišćo. Młodostni poskića kofej a tykanc a změja za dźěći skakanski hród přihotowany.
Serbske Pazlicy. Tohorunja njedźelu, ale w 15.30 hodź. budźe mejemjetanje w susodnych Serbskich Pazlicach, a to na sportnišću. Tež tu młodostni kofej a tykanc poskića a wjesela so na bohaty wopyt wobydlerjow.
Na nowe mjeno so dojednali
Ralbičanske kubłanišćo ma „Serbska pěstowarnja w Delanach“ rěkać
Róžant (JK/SN). Hnydom k spočatkej posedźenja gmejnskeje rady Ralbicy-Róžant wupraji radźićel Eduard Luhmann (CDU) próstwu, přewzać wuradźowanje wo pomjenowanju noweje Ralbičanskeje pěstowarnje do zjawneho dźěla posedźenja, dokelž je to zjawna naležnosć a jenož radu njenastupa. Tomu radźićeljo a wjesnjanosta Hubertus Ryćer (njestronjan) přihłosowachu, dokelž bě znate, zo je so wosebity gremij hižo na pomjenowanje dojednał.
Před 65 lětami maturowali
30 šulerkow a šulerjow je před 65 lětami na Serbskej wyšej šuli w Budyšinje maturowało. Składnostnje jubileja je so 14 z nich tydźenja we „Wjelbiku“ zetkało a tak mjeztym dobru tradiciju zasowidźenja dale wjedło.
Budyšin (SN/at). „Smy 1959 posledni lětnik byli, kotryž je w Budyšinje maturował. Po tym přećahny šula do Małeho Wjelkowa“, powěda Siegfried Wawrik. Z Pěskec pochadźacy wuměnkar je po powołanju pilot a bydli w Schulzendorfje blisko lětanišća Berlin-Schönefeld. „Běchmy dwě rjadowni. Rjadowniski wučer A-rjadownje bě Achim Brankačk. Ja wuknjech w B-rjadowni z rjadowniskim wučerjom Jurjom Hantom“, wón rozłoži.
