Worklecy (SN/MG). Na zašłym posedźenju gmejnskeje rady zaběraše přitomnych radźićelow nadal planowany přetwar wyšeje šule. Financielne połoženje gmejny njeje mjenujcy runjewon dobre a tak započinaja nětko hižo dobrowólnje konsolidaciske naprawy přewjesć. Tak powyša wróćo datowane wot prěnjeho januara ležownostny dawk na zakonsce dowoleny najwyši schodźenk. Wo 60 procentow wjace maja wobsedźerjo ležownosćow nětko płaćić. Hač dalše naprawy sćěhuja, dźensa hišće prajić njemóža. ­Jasne pak je, zo steji přetwar šule dale ­na hračkach. Komornica zarjadniskeho zwjazka Při Klóšterskej wodźe, Andreja Lukašowa radźićelam zdźěli: „Hač móžemy inwestować, njeje dźensa hišće jasne.“ Přidatnje k powyšenym ležownostnym dawkam běchu tež hižo popłatki za pěstowarnju a hort powyšili. Tak chcedźa hospodarske połoženje gmejny polěpšić. Radźićelam pak je jasne, zo njeje Wor­klečanska gmejna jenička z napjatym ­financnym połoženjom. Po měnjenju wjacorych z nich měło so na powšitkownym pjenježnym ramiku něšto změnić.

Radźićeljo prěnje nadawki za saněrowanje radnicy přepodali

Rakecy (JK/SN). Kaž hižo na minjenych posedźenjach Rakečanskeje gmejnskeje rady běše tež na zašłym dypk dnjoweho porjada k wobydlerskim prašenjam dominowaca tema. Jitkowčan Swen Helm, kotryž bě so wospjetnje prócował, dóstać wujasnjenje k zestawje a kalkulaciji popłatka za pitnu wodu, njebě z wotmołwu wjesnjanosty Swena Nowotneho (CDU) spokojom, respektiwnje namaka we wotmołwje dwaj rozdźělnej faktaj. Zo by so naležnosć doskónčnje rozrisała a woby­dler był spokojom, wjesnjanosta namjetowaše, zo so Helm z jednaćelom zastaranskeje towaršnosće zetka a tón jemu krok po kroku zakłady a pozadk kalku­lacije rozjasni. Z tym bě Helm přezjedny a tak móžachu so radźićeljo dalšim za gmejnu relewantnišim temam wěnować.

Kulow (KD/SN). Składnostnje kóždolětneho dnja němskeho piwa w aprylu witaše Kulowska měšćanska piwarnja njedźelu zaso mnohich kupcow a přećelow na wosebity swjedźeń w swojim zawodźe. Nimo dujerskeje hudźby kapały Blech gehabt poskićachu wodźenja po produkciji do warjernje, do pincy za droždźenje, k filtraciskej připrawje, k składowanskim tankam a k připrawje, hdźež piwo do 50 litrow wopřijacych sudow a do blešow pjelnja. 15 sobudźěłaćerjow produkuje wob lět 15 000 hektolitrow piwa, štož wučinja něhdźe tři miliony połlitrowskich blešow, praji jednaćel swójbneho předewzaća Stefan Glab. Hdźež piwo do blešow pjelnja, dóstanje kóžda bleša tež swój etiket, zo bychu kupcy zbliska a zdaloka Kulowski produkt hnydom spóznawali.

Njedawno zeńdźechu so bywši sobušulerjo a bywše sobušulerki serbskeje rjadownje, kotřiž złožichu před 50 lětami swoju ­abituru w Budyšinje, na rjadowniske zetkanje. Wobdźělnicy běchu na serbskich slědach w starym Budyšinje po puću, mjez ­druhim při rowomaj Jana Arnošta Smolerja a Michała Hórnika. Tule na Hrodźišku zestupachu so do skupinskeho wobraza. ­Wječor wuklinča při čiłej bjesadźe w staroměšćanskim hosćencu „Mniši dwór“. Foto: Jürgen Maćij