Budyšin (SN/MiR). Budyske towarstwo Dźěłań dźeń chce pod hesłom „Demokratcore a najdlěši tydźeń lěća“ aktiwnje lěćo w Budyšinje z kulturu wobohaćić. Hižo tónle pjatk, na Budyskim nalěću, wotměwa so „Demokratcore – najprjedy diskutować, potom eskalěrować“. Budźe to měšeńca mjez kulturu debatowanja a gitarowej hudźbu. Hosćo sami wuzwola sej wot 17.30 hodź. z wuměłcami temy, wo kotrychž chcedźa diskutować. Po zhromadnej wječeri zaklinča bubony skupinow „The Rock Complex“ a „Alles wird ganz schlimm“. „Předznajomosće wobdźělnicy žane njetrjebaja“, zdźěli Marco di Sarno, „jeničce rěč a rozum stej trěbnej.“ Wot julija do septembra zarjaduje towarstwo pod hesłom „Najdlěši tydźeń lěća“ sydom mini-festiwalow na wšelake temy z mnohimi kulturelnymi elementami, stajnje tež z wjacorymi wuměłcami. Nowostka je, zo so zarjadowanja nic jenož w rumnosćach towarstwa Dźěłań dźeń na Sukelnskej 18 njewotměwaja, ale tež pod hołym njebjom – na dworje ležownosće. 4. julija zahaji towarstwo „MetaSolis“ prěni minifestiwal z wječornym koncertom. Dalše terminy, stajnje sobotu su 13. a 27. julija, 10. a 24. awgusta kaž tež 7. a 21. septembra.

Berlin. Zapósłanča zwjazkoweho sejma Kathrin Michel (SPD) přeprošuje za­jimowanych wobydlerjow na politisku informacisku jězbu wot 29. hač do 30. meje do Berlina. Zwjazkowy nowinarski zarjad jězbu organizuje a tež financuje. Přenocowanje, přijězd a wotjězd z busom a wjetši dźěl zastaranja su inkluziwne. Wobdźělnicy dóstanu dohlad do dźěławosće zwjazkoweho sejma a ministerstwow. Kołojězba po měsće a wopyt ­muzeja jězbu wudospołnitej.

Zajimcy njech so přizjewja pod: ­ abo telefonisce pod čisłom: 03591 2744690. Dalše informacije namakaće .

9. junija budu nimo wólbow do Europskeho parlamenta tež wólby gmejnskich a měšćanskich radow. Smy so w někotrych gmejnach wobhonili, što su tam w minjenych pjeć lětach docpěli.

Njeswačidło (SN/MiP). Zastupowacy wjesnjanosta w gmejnje Njeswačidło je Norbert Braun – a to mjeztym hižo 30 lět. Časnikarski mišter ma swój wobchod njedaloko gmejnskeho zarjada na Budyskej čo. 15. Na prašenje, hač kandiduje k lě­tušim komunalnym wólbam znowa wotmołwi wón: „Haj. Gmejnscy radźićeljo ­su mje přeswědčili. Mam wšak telko nazhonjenjow w komunalnym dźěle, mje tak spěšnje ničo njewottraši“. Poslednje lěta pak ćežkeho schorjenja dla runjewon lochke za njeho byli njejsu, wón při­spomni.

Zaso na 581 metrow wysoku Wjelču horu w Čěskej pućować

Wjelča hora (ES/SN). Před něšto wjace hač dobrym lětom, dokładnje 4. apryla 2023, su w nócnych hodźinach wokoło napoł štyrjoch na wsach wokoło Wjelčeje hory (Vlči Hory/Wolfsberg) mjez Rumburkom a Šumporom (Krasna lipa) sireny rželi. Sapace płomjenja so palaceje bawdy na tamnišej Wjelčej horje běchu w nocy daloko do kraja widźeć. Dźakowano spěšnemu jednanju wohnjowych woborow z wokolnych wsow, bu 16 metrow wysoka wuhladna wěža zachowana – byrnjež ćežko wobškodźena była. Bawda w bjezposrědnjej bliskosći bu, runje tak kaž z wěžu zwjazany twar, dospołnje zničena. Wšitko so w płomjenjach sypny. Štóž horu a ležownosć znaje, wě sej předstajić, kak spomóžny wukon wohnjowych wobornikow to běše, w nocy wodu k hašenju w najkrótšim času na horu dóstać. Njeje předołho trało a wopytowarjo móžachu wěžu zaso wopytać. Zamołwići su ju tak ponowili, zo běše přistup wěsty. A wopytowarjo zapłaćichu za to zastupny pjenjez.