Słónčne lěćo a dyrdomdej
Drježdźany. Nadja Herbigowa přeprošuje sobotu, 8. junija, wot 10.00 do 13.00 hodź. swójby z dźěćimi kóždeje staroby na druhi serbsko-němski dźěćacy kružk pod hesłom „Słónčne lěćo a dyrdomdej“. Wobdźělnikow wočakuja paslenki, słódne chłóšćenki, směšne bajki a tón abo tamny spěwčk. Přizjewjenja su hišće krótkodobnje telefonisce pod: 015 90-1463979 abo z mejlku pod: móžne. Zetkanje je w Drježdźanach při chorowni diakonije pódla wuliwa rěki Prießnitz.
Wrótka do zahrody wotewrjene
Kamjenc. Hižo pjaty raz zarjaduje Kamjenski muzej zapadneje Łužicy „Dźeń wotewrjenych wrótkow do zahrody“ a to njedźelu, 9. junija. Dohromady 23 zahrodow wotewrje zajimcam swoje wrótka a přeprošuje na zabawu a na mjezsobnu wuměnu – mjez nimi tež zahroda muzeja, kotraž wabi z hoberskim žerowcom (Mammutbaum). Popołdnju wuhotuja šulerjo Kamjenskeje hudźbneje šule wot 14.00 hodź. program na dworje muzeja.
Wodźenje po Smochčan parku
Wosebita městnosć za wuknjenje
We Wojerowskej Starej radnicy nadeńdźe wopytowar wot spočatka meje wosebitu wustajeńcu z titulom „Zamjelčane“. Wona tematizuje ćěkanje a wuhnaće po Druhej swětowej wójnje.
Wojerecy (AK/SN). Wustajeńca je zhromadna iniciatiwa sakskeho społnomócnjeneho za wuhnatych a pózdnich wusydlencow dr. Jensa Baumanna kaž tež Krajneho zwjazka za wuhnatych a pózdnich wusydlencow w Sakskej/Šleskej Hornjej Łužicy, informuje Corinna Stumpf, sobudźěłaćerka zjawnostneho dźěła měšćanskeho zarjadnistwa we Wojerecach. „Přeprošujemy wosebje wučerjow, zo bychu tutón wustajeńcu w škleńčanym dworje Stareje radnicy ze šulerjemi jako wosebitu městnosć za wuknjenje wužiwali“, wona wuzběhnje.
Jana Chlebničeka počesćili
Bošečanscy wohnjowi wobornicy z kapału 100lětne wobstaće woswjećili
Bošecy (WL/SN). Hnydom dwaj jubilejej woswjećichu Bošečenjo zańdźeny pjatk. Tamniša gmejnska wohnjowa wobora kaž tež kapała wohnjowych wobornikow, kotraž je tež pod mjenom „Bošečanscy dujerjo“ znata, přeprosyštej na zhromadny swjedźeń składnostnje 100lětneho wobstaća do swjedźenskeho stana. Robert Mirtschin, nawoda wohnjowych wobornikow, zeznajomni publikum jara žiwje ze stawiznami wobeju jubilarow. Při tym złožowaše so na publikaciju „100 lět wohnjowa wobora a kapała wobornikow“, stawiznopis awtora Sebastiana Fuchsa, kotryž běše z wulkej prócu a akribiju wšitke fakty za knihu rešeršował a hromadźił.
Krótkopowěsće (05.06.24)
Bombu we Wostrowcu namakali
Wostrowc. Wčera, wutoru, popołdnju běchu dźěłaćerjo we Wostrowcu bombu z druheje swětoweje wójny namakali. Bomba ležeše po wuprajenjach krajnoradneho zarjada w Zhorjelcu wosrjedź bydlenskeje štwórće. Tutu ewakuěrowachu. Někak 200 ludźi dyrbješe swoje bydlenja wopušćić. Tež klóšter Marijina hwězda dyrbjachu knježnje wopušćić.
Rozprawu wo Serbach schwalili
Podstupim. Braniborske knježerstwo je wčera popołdnju druhej rozprawje wo połoženju serbskeho luda w braniborskej přihłosowało. Ministerka za kulturu a wědomosć Manja Schüle (SPD) je mjez druhim na to pokazała, zo bu financowanje Załožby za serbski lud wo pjeć milionow eurow zwyšeny a zo bě móžno, digitalne poskitki za přiswojenje a hajenje rěče wutwarić.
Wuslědki ewaluacije předleža
Prěni raz ze serbskim motiwom
Wutwar puća po wsy hišće wotwidźeć njeje
Wulka Dubrawa (UM/SN). Hižo dołho planowany wutwar hłowneje dróhi přez Wulku Dubrawu (wokrjesna dróha 7210) drje so tak spěšnje zwoprawdźić móc njebudźe. To znajmjeńša wuchadźa ze zdźělenki Budyskeho krajnoradneho zarjada. „Jednanja wo nakupi pódy z jednotliwymi wobsedźerjemi su w kónčnej fazy“, zdźěli rěčnica Sabine Rötschke. A dale wona zwuraznja: „Z jednej stronu pak so hišće jedna, a tele jednanja su ćežke. Spytamy tež w tym padźe pozitiwny wuslědk docpěć. Hač so to na kóncu poradźi, so wokomiknje rjec njehodźi.“
Žane wětrniki w Delanach!
Astrocentrum Łužica planowane stejnišća raznje wotpokazuje
Róžant (JK/SN). Regionalny planowanski zwjazk Hornja Łužica-Delnja Šleska je předwidźane stejnišća za wětrniki wozjewił, kotrež maja po planach zwjazkoweho knježerstwa zastaranje z wobnowjomnymi energijemi po zakónčenju zmilinjenja brunicy sobu zawěsćić. Tež w Delanach je po planje tajke stejnišćo předwidźane, a to mjez Konjecami a Koćinu. Na tole skedźbnił je wjesnjanostu gmejny Ralbicy-Róžant radźićel Křesćan Gruhn, kotryž so jako wuměnkar mjez druhim tež z regionalnej politiku zaběra.
Ručne sykawy běchu wjeršk jubileja
Lěsk (JoS/SN). Z mnohimi hosćimi su minjeny kónc tydźenja w Lěsku (Lieskau) pola Grodka 550. róčnicu prěnjeho pisomneho naspomnjenja swjećili. Wobšěrny dwudnjowski program wobsahowaše tohorunja serbske stawizny wsy, kotraž dźensa městu Grodkej přisłuša. Wosebity powabk na swjedźenišću bě historiske wohnjowoborne jězdźidło z dołhim rěblom, na kotrehož wjeršku běchu wótřerěčaki přičinjene. Mjez druhim witachu Grodkowsku wyšu měšćanostku Christine Herntier a delegaciju z Liškowa pola Finsterwaldy, ke kotremuž wudźeržuja přećelske styki.
Přijěli su sobotu wobdźělnicy zetkanja mopedow SR 2 ze susodneho Slepoho. Šoferojo wobdźělichu so na zabawnych wubědźowanjach z piwowymi karanami. Woblubowane běchu tež jězby z konjacym zapřahom po wsy a po susodnym parku. Najwšelakoriše stawizniske informacije sposrědkowachu při tym čłonojo dźěłoweho zjednoćenstwa za chroniku. Woni běchu z akribiskim dźěłom wustajeńcu wo Lěsku zestajili. Překwapjenka běše pohladnica składnostnje jubileja, kotruž je Grodkowski grafikar Norbert Anspach naćisnył.
Zhromadnje kopańcu hladać
Wojerecy (AK/SN). Europske mišterstwo w kopańcy budu sej wobydlerjo we Wojerecach zhromadnje pod hołym njebjom wobhladać móc. Bydlenjotwarska towaršnosć a Łužiska hala zarjadujetej w centralnym parku při Łužiskim centeru tak mjenowany public viewing. Najprjedy planowane su tři hry němskeho mustwa w předkole a finalu. „Jeli budźe němska jědnatka po předkole dale hrać, chcemy dalše hry našeho mustwa pokazać, w najlěpšim padźe hišće tři“, praji jednaćel bydlenjotwarskeje towaršnosće Steffen Markgraf. Dohromady wudadźa za public viewing 40 000 eurow. Nimo srědkow bydlenjotwarskeje towaršnosće a Łužiskeje hale su to spěchowanske pjenjezy zwjazkoweho ministerstwa za měšćanske wuwiće a twarstwo.
