Wo konjunkturnym programje za wokrjes je přirjadnica krajneho rady Birgit Weber wčera na posedźenju Budyskeho wokrjesneho sejmika rěčała. Wona rozprawješe wo stawje wotstronjenja škodow z wulkeje wody 2013.
Budyšin (SN/at). Něhdźe 92 milionow eurow ma wokrjes k dispoziciji, zo móhł wot wulkeje wody lěta 2013 zawinowane škody na komunalnej infrastrukturje, w zawodach, towarstwach, cyrkwjach a pola priwatnikow wotstronić. 30. junija skónči so zapodawanska doba komunalnych próstwow wo zarunanje. Po słowach Birgit Weber je za tele dźěło w juliju 2013 wutworjene stabowe městno 467 próstwow přijimało. Nimale 400 z nich je dopruwowane a hodźi so zwoprawdźić. Zbytnych 67 je kompleksnišeho razu, wone pak so dale wobdźěłuja.
Při poskitkach lutować
Budyšin. Z nowej kartu móža hosćo we łužiskej jězorinje při wjace hač 50 turistiskich poskitkach lutować. Turisća móža sej lisćik za tři abo sydom dnjow kupić a dóstanu za to rabaty w muzejach, hosćencach, při dožiwjenskich turach, na čołmowanju a druhdźe. Za to bě so turistiski zwjazk loni tež wopytowarjow za jich přećemi prašał.
Liberecska tradicija w Alpach
Liberec. Wustajeńcu wo njewšědnej atrakciji přihotuja tuchwilu w čěskim Liberecu: 600 kilometrow wottam steji w awstriskich Tauernskich Alpach 2 586 metrow wysoko „nowa Reichenbergska chata“. Jeje pomjenowanje, wuchadźace z němskeho mjena za Liberec, pak njeje připad. Chatu běchu w lěće 1926 wysokohórscy turisća z Libereca natwarili a ze symbolemi města wudebili.
Njewjedra hroža
Lipsk. Po dźensnišim horcym dnju hroža we wječornych hodźinach njewjedra. Tež Sakska je potrjechena, kaž Němska wjedrarnja w Lipsku warnuje. Ličić ma so z dešćom, krupami a wichorom, kotryž móže sylnosć hač do 115 km/h docpěć. Štwórtk drje budźe z runje 20 stopnjemi najchłódniši dźeń tydźenja.
Kamjenc. Dokelž njemóžeštaj so dojednać, štó jako prěni do awtoweje myjernje jědźe, staj so mužej w Kamjencu biłoj. 32lětny chcyše ze swojim wozydłom do myjernje zajěć, přewidźa pak při tym 61lětneho, kiž ze swojim awtom w chłódku stejo hižo čakaše. Wobaj so najprjedy wurěčowaštaj, štó drje směł jako prěni awto wumyć dać, pozdźišo zasadźištaj pjasće, tak zo běštaj na kóncu wobaj snadnje zranjenaj.
Koblicy (AK/SN). Wjesny towarstwowy dom w Koblicach přichodnje tež zbrašenym wotewru. Za přetwar zachoda maja w aktualnym hospodarskim planje Łazowskeje gmejny 10 000 eurow zaplanowane. „Tuchwilu pruwujemy tři warianty“, rjekny nawoda twarskeho wotrjada gmejny Wolfgang Tietze. Prěnja předwidźi skłoninu z betonowych elementow, druha woclowu konstrukciju a třeća mały lift. „Tale warianta pak je z dalšimi wudawkami zwjazana, dokelž by so lift technisce hladać dyrbjał“, rozłoži Tietze. Hišće w juliju chcedźa wo tym doskónčnje rozsudźić.
Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a někotre fary předstajimy – dźensa Hodźijsku.
Byrnjež drje za zažnu dobu srjedźowěka žane dokładne ličby za farski dom w Hodźiju njepředleželi, wjacore zapiski na załoženje Hodźijskeje wosady pokazuja. Wone sahaja do časa skutkowanja swjateho Bena, Mišnjanskeho biskopa wot lěta 1066 do 1106. Wón je na městnje dźensnišeje fary załožił biskopski wudwór, kotryž jeho mać wobhospodarješe. Rozsudne za to, wutworić cyrkwinsku wosadu a wukonjeć dušepastyrske dźěło přez fararja, běchu stabilne hospodarske zakłady. Wšako wěriwi cyrkwinske dawki w dźensnišim zmysle njepłaćachu. Na wsy bě farar runočasnje nawoda ratarskeho kubła. Kak prěnjotne twary na farskim dworje wupadachu, drje njehodźi so dźensa rjec. Z wěstosću pak pokazuja stare murje za tamnišej bróžnju, wuhotowane z třělnicami (Schießscharten), na pózdni srjedźowěk.
Budyšin (SN/MWj). Sakski minister za justicu Sebastian Gemkow (CDU) přepoda wčera w Budyskim jastwje ponowjenej jastwowej twarjeni a ponowjenu murju. W domje 1 stej nětko wuchodny a zapadny dźěl saněrowanej. Tež přetwar domu 2 za škitnu jatbu (Sicherheitsverwahrung) je wotzamknjeny. Za tele naprawy su dohromady 37,2 milionaj eurow wudali. Cyłkownje je Sakska wot lěta 1991 něhdźe 100 milionow eurow do Budyskeho jastwa inwestowała. „Twarske wuměnjenja moderneho jastwa maja na jednym boku wšitkim wěstotnym žadanjam wotpowědować, na tamnym boku pak tež jatych motiwować swoje žiwjenje změnić. Ze zakónčenjom twarskich dźěłow wotpowěduje Budyske jastwo nětko modernemu a humanemu zarjadnišću“, rjekny Sebastian Gemkow.
Njeswačidło (LR/SN). Tež jědnata šlagrowa nóc w parku Njeswačanskeho barokneho hrodu bě sobotu znowa połny wuspěch. Byrnjež temperatury skerje ke kupanju wabili, přińdźechu wopytowarjo po stach. Witali su jich sportowče w baroknych kostimach. Wuhotowar mjeztym derje znateho a woblubowaneho zarjadowanja bě znowa Njeswačanske sportowe towarstwo Módro-běłych. Dokelž bě předpředań zastupnych lisćikow dosć dobra, móžachu na tónle wječor měrnje zhladować, rjekny předsyda towarstwa Frank Fliegner. Za njeho a wšitkich pomocnikow je šlagrowa nóc mjeztym nimale rutina. Kóždy wotrjad sportoweho towarstwa wě, kotre nadawki a dźěła maja so hdy a hdźe zdokonjeć.
Dokelž so šlagrowa nóc stajnje prěnju sobotu pražnika wotměwa, je to mnohim bywšim Njeswačanam kruty termin, so tónle wječor „doma“ z přećelemi zetkać a zhromadnje swjećić. Tež busowe předewzaća maja Njeswačansku šlagrowu nóc w swojim programje a poskićeja wosebite jězby. Hosći zabawješe lětsa šěsć šlagrowych spěwarkow a spěwarjow, mjez druhim Linda Hesse a Ina Colada.