Krótkopowěsće (26.05.15)
Čěskemu koleze so dźakował
Berlin. Prezident zwjazkoweho sejma Norbert Lammert (CDU) je so swojemu čěskemu koleze Janej Hamáčekej při toho wopyće w zwjazkowym sejmje za parlamentariski program wuměny stipendiatow dźakował, kotryž je tež w čěskim domje zapósłancow wuspěšnje zaběžał. Při tym dojednaštaj so dale na direktne kontakty čěskich a němskich zapósłancow.
Chinske kupjele na Morawje
Brno. Chinska prowinca Hebei pola Pekinga chce w Pasohlávkach na južnej Morawje kupjelowy kompleks twarić. Projekt w hódnoće 80 milionow eurow měł za tři lěta hotowy być. Pacienća kupjelow maja być zastarani z klasiskimi europskimi procedurami; inwestorojo chcyli tež elementy tradicionelneje chinskeje mediciny poskićeć.
Zaso wjace samostatnych
Chronist wo swojej ródnej wsy přednošował
„Naše Worklecy su rjana měrliwa wjes, ležaca idylisce při Klóšterskej wodźe.“ Takle zahaji dr. Beno Wałda minjenu wutoru před seniorami tachantskeje wosady swój přednošk wo swojej ródnej wsy. Jako zubny lěkar, gmejnski radźićel, chronikar a tež druhdźe swoje talenty zasadźujo ma wón realistiski wid na wšědne žiwjenje ‚swojich‘ ludźi.
Policija (22.05.15)
Zražka z pjeć zranjenymi
Njeswačidło. Při ćežkim wobchadnym njezbožu wčera připołdnju w Njeswačidle je so pjeć wosobow zraniło. 49lětna wodźerka Renaulta bě na Bóščanskej dróze blisko tamnišeje pěstowarnje na lěwy bok jězdnje zajěła, při čimž do napřećo přijěduceho Suzukija zrazy. Renault wosta hakle w žiwym płoće priwatneje ležownosće stejo a płót kaž tež listowy kašćik wobškodźi. W Suzukiju sedźeše 30lětny šofer z 28lětnej sobujěducej a małymaj dźěsćomaj. Woni kaž tež 49lětna wodźerka Renaulta so zranichu. Wšitkich pjećoch dowjezechu do chorownje, zdźěla z helikopterom. Na znjezboženymaj jězdźidłomaj nasta cyłkownje něhdźe 2 500 eurow škody. Čłonojo Njeswačanskeje dobrowólneje wohnjoweje wobory z městna njezboža wšo zrumowachu a wotstronichu wuběžany bencin a wolij. Čehodla je 49lětna njejapcy na lěwy bok jězdnje zajěła, wobchadna njezbožowa słužba policajskeje direkcije nětko přepytuje. Štóž móže pokiwy podać, kak je so njezbožo stało, njech so na awtodróhowym policajskim rewěrje pod telefonowym čisłom 03591/ 36 70 přizjewi.
Šěrakec firma nadawk dóstała
15. junija započnu w Chrósćicach nowu pěstowarnju twarić
Chrósćicy (aha/SN). W srjedźišću wčerawšeje zhromadźizny Chróšćanskeje gmejnskeje rady steješe přepodaće nadawkow za twar pěstowarnje „Chróšćan kołć“. 45 firmow je swoje poskitki připósłało. Na cyłkownje wosom wupisanych losach zapodachu přewažnje wokolne domjace firmy poskitki, kotrež staj fachowaj planowarjej za elektrotechniku kaž tež za tepjenje a sanitarne Tomaš Lipič a Rainer Franke wuhódnoćiłoj. 27 losow k nadawkam twarskich a třěchikryjerskich dźěłow kaž tež za wokna, wonkowne durje a słónčny škit je Marko Dźisławk pruwował, kotryž wčera zapodate poskitki z fachoweje strony komentowaše. Wažne radźićelam bě, zo so předwidźana suma srědkow we wysokosći miliona eurow njepřekroči. Twarske dźěła přepodadźa Konječanskej firmje Rafała Šěraka, kotraž w swojim poskitku 513 000 eurow w někotrych pozicijach porno wupisanym móžnosćam srědki zalutuje. Zamołwitosć za tepjenje a sanitarne dźěła změje Worklečanska firma Floriana Šołty, kiž zapoda za wobaj losaj poskitk snadnje pod 200 000 eurami.Serbja w stolicy z jubilejom
Berlin (Ku/SN). 150. raz zhromadźi so štwórtk popołdnju horstka žonow a muži za Serbskim blidom w Berlinje. W lěće 1992 – potajkim před 23 lětami – je bohužel kónc zašłeho lěta zemrěty horliwy bywši wučer Gerat Mučišk tutu móžnosć mjezsobneho serbowanja do žiwjenja zwołał.
Spočatnje hišće w swójskich rumnosćach, zetkawaja so mjeztym hižo tójšto lět w korčmje direktnje při bywšim hraničnym přechodźe Checkpoint Charlie. Temow je kóždy měsac dosć. Wone sahaja wot rozprawow Berlinskich delegatow na 17. hłownej zhromadźiznje Domowiny přez aktualne podawki Serbow we Łužicy hač k wopisowanju dožiwjenjow, kotrež jednotliwi čłonojo SKI Berlin z. t. w starej domiznje mějachu. Mjez druhim wupytachu někotři serbske dźiwadłowe předstajenja, sympozij wo Oskaru Kolbergu a wernisažu w Serbskim muzeju w Choćebuzu. Wjeršk běše lětsa 30. apryla chodojtypalenje. Te wězo njemóžeja kóžde lěto přewjesć.
W juniju wuzwola předsydu zarjadniskeho zwjazka
Pančicy-Kukow (SN/MWj). Njezjawnje je so zhromadźizna zarjadniskeho zwjazka Při Klóšterskej wodźe wčera w Pančicach-Kukowje z naslědnistwom tuchwilneho předsydy Alfonsa Ryćerja zaběrała, kotrehož hamtska doba so 31. julija skónči. K tomu běchu sej dweju kandidatow přeprosyli, „kotrejuž mamy za najkmańšeju z kruha tych, kotřiž běchu so na wupisanje přizjewili“, rjekny Ryćer. Wobaj so gmejnskim radźićelam předstajištaj. Na to so zapósłancy w internym kruhu dale z wobsadźenjom městna předsydy zaběrachu. Přichodne posedźenje zhromadźizny zarjadniskeho zwjazka 11. junija steji potom cyle w znamjenju wuzwolenja noweho přesdydy.
Krótkopowěsće (22.05.15)
Zajim za powołanski projekt
Budyšin. W Rěčnym centrumje WITAJ předstajištej wčera wučerka Katka Bukowa a lektorka Bianka Wjeńcyna wučerjam serbskich wyšich šulow ze Slepoho, Kulowa, Radworja, Ralbic, Budyšina a Worklec projekt k powołanskej orientaciji. Jón běštej wonej loni prěni raz we Worklecach přewjedłoj. Z toho nasta dwurěčna dokumentaciska mapa.
Pólske wuhlo Čechow traši
Liberec. Pólska chcyła pola Bogatynje, blisko hranicy Čěskeje republiki, brunicowu jamu rozšěrić. Po planach měła najbliša čěska wjes, Uhelná pola Hrádeka nad Nisou, potom jenož 500 metrow wot brunicoweje jamy zdalena być. Zamołwići Liberecskeho regiona tohodla protestuja, dokelž bychu pomjezne wsy potom wulke problemy z dnownej wodu měli.
Tarifowy zakoń schwaleny
Policija (21.05.15)
Pytaja paduchow šokolady
Biskopicy. Z njewšědnym padom padustwa zaběra so policija w Biskopicach a Wjazońcy. Hižo spočatk meje běchu tam njeznaći z kupnicy šokoladu kradnyli, a to we wulkim stilu. 5. meje zhubi so z kupnicy Lidl w Biskopicach tysac taflow šokolady, z runje tajkeje kupnicy we Wjazońcy dalšich tysac taflow w cyłkownej hódnoće něhdźe 2 200 eurow. Stajnje jednaše so wo wšelake družiny. Po wšěm zdaću je so to we woběmaj padomaj popołdnju stało, ale hakle wječor krótko do zawrjenja nakupowanišća personalej tole napadny. Nětko pytaja swědkow, kotřiž su snano něšto wobkedźbowali.
Wjeselo na lěpše wuměnjenja
Kriminalita w Budyskim wokrjesu je jasnje snadniša hač w Zhorjelskim. Tole podšmórny nawoda Zhorjelskeje policajskeje direkcije Conny Stiehl spočatk tydźenja na posedźenju Budyskeho wokrjesneho sejmika. Na próstwu frakcije Lěwicy porěča wón wo wuslědkach policajskeje strukturneje reformy a wo wuwiću kriminality.
Budyšin (UM/SN). Nastupajo kriminalitu je Budyski wokjes „oaza“, znajmjeńša přirunujo ze susodnym Zhorjelskim wokrjesom a z dalšimi regionami Sakskeje. Tak su w Budyskim wokrjesu loni 16 815 njeskutkow zregistrowali, w Zhorjelskim wokrjesu z mjenje wobydlerjemi pak 24 212. Hišće jasniši je rozdźěl hladajo na ličbu njeskutkow, wobličenu na 100 000 wobydlerjow. Tu wučinja poměr 5 435 k 9 235. „Hranica k Pólskej je jedne z ćežišćow našeho dźěła“, wobkrući policajski direktor.
Swoju wědu na jězbje wobohaćili
Katolske zjednoćenswo kubłarjow Sakskeje (KEG) přeprosy tydźenja na kubłansku jězbu do klóštra Marijineho doła pola Wostrowca a do Žitawy. Hłownu organizaciju měješe městopředsyda zjednoćenstwa Franz-Josef Fischer, wučer na Drježdźanskim Gymnaziju swjateho Bena, na starosći.
Z busom poda so štyrceći kubłarkow a kubłarjow, něhdźe połojca běchu Serbja, najprjedy do klóštra Marijiny doł. Tam swjećachu w klóšterskej cyrkwi, kotraž je po žałostnym powodźenju zaso wulkotnje ponowjena, Božu mšu. Ju celebrowaštaj klóšterski farar a čěski duchowny. Po krótkim přechodźowanju po njej a po klóšterskim arealu podachu so wulětnikarjo po krasnej krajinje njeposrědnje při Nysy k hłownemu cilej wuprawy, do Žitawy. Prěni puć wjedźeše nas hnydom do rustikalneho hosćenca srjedź města k wobjedu. Na to podachmy so z historiskim hejtmanom měšćanskeje straže na puć, kiž wjedźeše nas z wulkej zahoritosću, rozbudźenosću a tójšto humorom po swojim měsće, posrědkujo wjele wědy wo zašłosći a přitomnosći Žitawy w třiróžku krajow.
