Rjane historiske měšćanske žro
Štóž so po Kulowje wuchodźuje, móže sej wosebje w historiskim měšćanskim dźělu, w małych hasach, rjenje wobnowjene, samo tykowane domy wobhladać. Wjele su tam ludźo minjene lěta pře- a wutwarjeli, su z wulkej lubosću swoje historiske domy saněrowali. Zo by wot wšeho spočatka typiske wuwiće historiskeho měšćanskeho žra rjadowała, je Kulowska měšćanska rada hižo 1992 městne wuhotowanske wustawki wobzamknyła. Tele wustawki su zamołwići mjeztym hižo wjacore razy předźěłali a aktualnym prawniskim směrnicam a změnam přiměrili.
Tež tuchwilu w Kulowje wjele twarja, předewšěm młode swójby, kotrež su tam swoje doma namakali, dokelž je město prosće za jich swójbne žiwjenje atraktiwne. To wšak je zdobom wužadanje městu a jeho zarjadnistwu. Wjetšina ludźi městne wuhotowanske wustawki jako prawniske zasady akceptuje. Tak móže jich njedodźerženje, to rěka, njewotpowědne wuhotowanje třěchi, njelubozne konsekwency měć.
Žołte, fijałkojte a běłe fasady – nimale wšitko je móžno
Wuhotowanske wustawki tu a tam wušiknje zeskutkownjeja
Budyšin (SN/mwe). Tuchwilu so wjele twari, tak nastawaja, kaž we Worklecach, tež druhdźe nowe bydlenske štwórće. Tež starše twarjenja ludźo prawidłownje porjedźeja a fasadu znowa barbja. Při tym móže sej kóždy w principje barbu sam wuzwolić. Lědma jedna komuna wobydlerjam raznje předpisuje, kotru barbu měła fasada měć, kotre cyhele na třěchu słušeja. Tole wobkruća tež Kubšiski wjesnjanosta Olaf Reichert (njestronjan). Tak ma jeho komuna runja wšěm druhim w Swobodnym staće Sakskej wobtwarjenske plany a wuhotowanske wustawki. Plany rjaduja wašnje a dalše modality wobtwarjenja ležownosćow. Zapisane do nich tež je, za čo so ležownosće wužiwaja. Wuhotowanske wustawki su častodosć ze spěchowanskimi srědkami zwjazane, kotrež komuna wot stata za wuhotowanje wobraza jej přisłušaceje wsy abo přisłušaceho města dóstawa.
Hospodarske spěchowanje zaso w radnicy
Wojerecy (SN/at). We Wojerecach je so wobłuk hospodarske spěchowanje do radnicy wróćił. Za to su w najblišej wokolinje wyšeho měšćanosty Stefana Skory (CDU) nowe dźěłowe městno wutworili, wo čimž bě Skora na aprylskim posedźenju měšćanskeje rady informował. Za tele městno bě so po słowach měšćanskeho nowinarskeho rěčnika Manfreda Wiemera 40 zajimcow požadało, z dźesaćoch we wušim wuběrje přesadźi so 29lětna Franziska Tennhardt. 17. meje je wona swój prěni kruty, to rěka njewobmjezowany job nastupiła.
„Smy nastupajo hospodarske spěchowanje we Wojerecach wšelake warianty pospytali, na přikład je do měšćanskich tzwr wurjadować“, rjekny Skora při přistajenju noweje sobudźěłaćerki minjeny štwórtk we Wojerowskej radnicy. Wuspěšne to wšo njebě. Mjez čołom radnicy a přemysłownikami njeje so trěbna komunikacija rozwiła. Takrjec jako prawa ruka wyšeho měšćanosty ma so nětko nowa hospodarska spěchowarka wo to starać.
Krótkopowěsće (24.05.16)
Móža šćežku nětko twarić
Kamjenej. Kolesowansku šćežku podłu zwjazkoweje dróhi B 96 mjez Kamjenej a Stróžu móža twarić. To zdźěli dźensa Marko Šiman, zapósłanc CDU w Sakskim krajnym sejmje. Zwjazkowe zarjadniske sudnistwo je minjeny tydźeń skóržbu wobydlerja přećiwo šćežce na jeho ležownosći wotpokazało. Šiman bě hižo lěta 2009 twar šćežki nastorčił.
Přeslědźa stawizny Šleskeje
Lipsk/Wrócław. Wědomostnicy Uniwersitow Lipsk a Wrócław su slědźenski projekt wo šleskich kulturnych stawiznach zahajili. W nim chcedźa teksty z najwšelakorišich wobłukow politiki, nabožiny, rěče, literatury a kubłanja analyzować, kaž Lipšćanska uniwersita zdźěla. To je prěnje wědomostne přepytowanje kulturnych tradicijow kónčiny.
Přičina wohenja wujasnjena
Policija (24.05.16)
Kuču pokradnyli
Klóšterska Nowa Wjes. W Hornjej Łužicy kopja so po wšěm zdaću padustwa z konjencow jěchanskich towarstwow a dalšich zjednoćenstwow. Najnowši tajki pad sta so w nocy na njedźelu w Klóšterskej Nowej Wsy pola Kulowa. Tam zhubichu so cyła kuča – tak mjenowany marathonowy wóz – a dalše za jěchanje trěbne wěcy. Wěcnu škodu trochuja na něhdźe 6 500 eurow.
Nastroje fuk
Hnašecy. Z najwšelakorišim gratom za dom, dwór a zahrodu su so njeznaći w nocy na njedźelu w Hnašecach zastarali, bohužel nic legalnje. Tam zadobychu so na zahrodowej ležownosći do garaže. Z njeje zhubichu so mały traktor za syčenje trawnika, motorska piła kaž tež freza. Hódnotu rubizny trochuje wobsedźer na 3 000 eurow. Nimo toho načinichu paduši něhdźe 800 eurow wěcneje škody. Kriminalna policija je pad přewzała a pyta nětko za skućićelemi.
Dobry wothłós na premjeru při Miłočanskej skale
Měnjensku bursu rostlin chcedźa na kóždy pad wospjetować
Miłoćicy (HS/SN). Přewšo zadanił je so wopyt prěnjeje měnjenskeje bursy rostlin minjenu sobotu při Miłočanskej skale. Tam běchu so čłonojo towarstwa Kamjenjak kaž tež Njebjelčanskeho domizniskeho a kulturneho towarstwa na tele zarjadowanje derje přihotowali a poskićachu wulku ličbu korjeninowych a zeleninowych rostlin, zo bychu je z druhimi měnjeli. Někotryžkuli wopytowar bě hižo w měrcu na měnjenskej bursy za symjo w Njebjelčicach pobył. Nětko přinjesechu woni zbywace rostliny ze swojeje zahrodki. Mjez nimi běštaj Christina a Beno Čornakec z Chrósćic. Jeju mjedonka je tež lětsa zaso chětro narostła. Někotre jeje wubitki je sej Rynčec swójba z Wojerec sobu wzała a chce je nětko w swojej zahrodce w Nižej Wsy zesadźeć.
Znowa w narodnej drasće
Do mnohich mejemjetanjow minjeneho kónca tydźenja je so tež te w Němcach zarjadowało. Tam bě to wobstatk wulkeho wjesneho swjedźenja, kotryž wopřiješe hišće tójšto dalšich dypkow.
Němcy (UH/SN). Tradicionalne wjesne swjedźenske hry su w Němcach stajnje jedyn z wjerškow w běhu lěta. Runje tak wupruwowany kaž wuspěšny recept je přikładne zhromadne dźěło wjesneho kluba z młodźinu, dobrowólnej wohnjowej woboru kaž tež z mnohimi dobrowólnymi pomocnikami. Tole podšmórny na kromje swjedźenja zastupowacy nawoda wjesneho kluba a swjedźenski moderator Handrij Korch.
Nimo zwučenych programowych dypkow Němčenjo rady tež raz něšto noweho wuspytaja. Lětsa běchu to žortne wubědźowanja towarstwow pjatk wječor k zahajenju swjedźenja. Za dwanaće wobdźělenych mustwow wumyslichu sej mały kwis wo wjesnym žiwjenju a hry, při kotrychž bě wušiknosć prašana. Jako najlěpše wopokaza so wětrnikowe towarstwo. Zo móžachu dobyćerjam jednotliwych wubědźowanjow atraktiwne myta přepodać, je zasłužba nimale 60 sponsorow, so Handrij Korch wjeseleše.
Krótkopowěsće (23.05.16)
Nowa turistiska sobudźěłaćerka
Rakecy. Towarstwo za wuwiće hornjołužiskeje hole a hatow kaž tež Turistiske regionalne zjednoćenstwo hola a haty w Budyskim kraju stej intensiwne zhromadne dźěło wobzamknyłoj. Za to bu nětko turistiska sobudźěłaćerka Claudia Marija Steglichowa z Budyšina přistajena. 33lětna pochadźa z Radworja a je zdobom předsydka tamnišeho kupoweho towarstwa.
Dom ćěkancow zawru
Biskopicy. Přebywarnju požadarjow azyla w Biskopicach chcedźa kónc lěta zawrěć. Přičina je woteběraca ličba ćěkancow. Swobodny stat Sakska bě minjeny tydźeń rozsudźił, Biskopičansku prěnju přijimarnju w něhdyšej zawodnej hali zawrěć, kaž krajnoradny zarjad informuje. Hala skićeše tysac ludźom městno. 87 ćěkancow tam hišće bydli.
Drogerija w Čěskej dróša
Policija (23.05.16)
Stajnje zaso alkohol
Jitro. Z wjacorymi padami jězdźenja pod wliwom alkohola dyrbješe so policija kónc tydźenja zaběrać. W Jitru bě w nocy na njedźelu 43lětny muž ze swojim Opelom po puću. Wuhladawši policistow wón wotsamo zasta a chcyše so pěši wotsalić. Přičinu za to zwěsćichu zastojnicy při kontroli. Muž měješe 0,80 promilow alkohola w kreji. Wjele wjace intus měješe sobotu dopołdnja wodźer nakładneho awta w Bretnigu. Pola njeho zwěsćichu 3,04 promile alkohola. Jězbna dowolnosć 33lětneho drje je nětko na dlěši čas fuk. Tež wobchadne njezbožo wčera připołdnju na awtodróze A 4 pola Słoneje Boršće sta so pod wliwom alkohola. 62lětny muž bě tam z Mazdu na prawy bok jězdnje zajěł, dźiwinowy płót přełamał a do štoma zrazył.
Mejski ćah raz trochu hinaši
Šunow (bla/SN). Tež lětsa zaso je Domowinska skupina Konjecy/Šunow zhromadnje z Konječanskej wjesnej młodźinu mejemjetanje wuhotowała. Jědnaće młodych porow zetka so wčera w Šunowje, zo bychu w swojich rjadach mejskeho krala našli. Wšitke nitki w horšći měješe Domenico Gruhn, kiž na to dźiwaše, zo by wšitko po zwučenym wašnju wotběžało. Po tym zo je meja padnyła, bě Krystof Hrjehor z Konjec naspěšniši při wjeršku a wuzwoli sej Ewu Čornakec z Konjec za mejsku kralownu. Wšitcy zhromadnje ćehnjechu spěwajo do Konjec. Hinak hač druhdźe pak njesedźeše mejski por na konju, ale měješe takrjec něšto wjace PS pod zadkom, dokelž jědźeše z motorskim typa AWO.
Před Konječanskim towarstwowym domom Delany rejwachu dźěći wokoło meje. Rejki z holcami a hólcami nazwučowałoj běštej Erika Maywaldowa a Anke Wowčerkowa. Wšitke holcy běchu w katolskej swjedźenskej drasće. Hudźbny přewod na akordeonje na starosći měješe Matthias Šołta z Pančic-Kukowa, a wšitcy mócnje sobu spěwachu.
