Křesćan Krawc čitał
Delni Wujězd (JoS/SN). Serbski spisowaćel Křesćan Krawc je we wobłuku „čitanskeje zymy“ njedźelu w Delnim Wujězdźe ze swojeho noweho romana „Ende vom Paradies“ čitał. Domizniske towarstwo bě „čitansku zymu“ před 15 lětami załožiło. Štyri tajke zymske zarjadowanja su jara woblubowane. Domizniske towarstwo dźěła z nakładnistwom Lusatia wusko hromadźe, a nakładnik dr. Frank Stübner dokładnje wě, kotru literaturu sej ludźo přeja. Po čitanju chcychu Delnjowujězdźenjo a jich hosćo hišće wjele wot Křesćana Krawca wědźeć, mnozy sej jeho roman skazachu.
Wopominanska Boža mša
Kamjenc (SN). W kapałce Kamjenskeje chorownje maltezow prawidłownje zemrětych wopominaja. Přichodna Boža mša za wšěch, kotřiž su wot srjedź oktobra 2015 hač do kónca januara 2016 w chorowni zemrěli, budźe jutře, 17. februara, w 16.30 hodź. „Chcemy mjena zemrětych mjenować, a za kóždeho zapalimy swěčku při jutrownej swěčce a stajimy ju na wołtar. Swójbni a bliscy přiwuzni su njewotwisnje wot nabožneje zwjazanosće přeprošeni“, nowinska rěčnica chorownje Ines Eifler dźěli.
Kurs serbšćiny za dźěći
Na proze k smjerći był
Na přeprošenje předsydy Towarstwa swjateje Filomeny Gerata Róbla je minjeny pjatk Helmut Lungenschmid z Awstriskeje do Ralbic přijěł. Po wječornej Božej mši přednošowaše wón na wosadnej žurli Radlubinje wo swojim dožiwjenju mrěća.
Kursy debjenja jejkow derje wopytane byli
Njebjelčicy (HS/SN). Kaž loni mějachu zajimcy tež lětsa zaso přiležnosć, po třoch sobotach na wulkej žurli Njebjelčanskeho gmejnskeho centruma jejka debić. Tamniše domizniske a wuměłstwowe towarstwo to mjez druhim ze zajimcami haji. Marja Šefrichowa, čłonka cyłka a znata jejkadebjerka, je wosebje w dojutrownym času wjele po puću. Wučenej šwalči su za wuměłsce pisanjene owalne drohoćinki na wubědźowanjach hižo wjacore myta spožčili.
Serbska přirada skonstituowana a dźěłakmana
Zhorjelc/Slepo (SN/at). Přirada za serbske naležnosće wokrjesa Zhorjelc je so minjenu srjedu w Serbskim kulturnym centrumje Slepo skonstituowała. Kaž zamołwity za serbske naležnosće Zhorjelskeho wokrjesa Manfred Hermaš zdźěli, su čłonojo přirady w zjawnym wothłosowanju wokrjesnu radźićelku Franzisku Schubert (Zwjazk 90/Zeleni) za předsydku wuzwolili. „Wona je jako zapósłanča Sakskeho krajneho sejma zdobom rěčnica swojeje frakcije za naležnosće našeho ludu. Je tuž spomóžne, zo našej přiradźe předsydari“, měni serbski wokrjesny radźićel Měrćin Nowak (CDU) z Lubija, kotremuž dowěrichu zastojnstwo naměstnika. Zestawu gremija wudospołnjataj wokrjesny radźićel a wjesnjanosta Dźěwina Helmut Krautz (SPD) a Wolfgang Kotisek z Brězowki jako wěcywustojny wobydler.
Ćěkancow decentralnje zaměstnjeja
Zhorjelc (AK/SN). Wokrjes Zhorjelc dale na tym wobstawa, požadarjow azyla decentralnje zaměstnić. „Z cyłkownje 2 600 ćěkancow we wokrjesu bydli 1 400 decentralnje w bydlenjach a 1 200 w zhromadnych přebywarnjach. Tak smy přiwšěm hižo 54 procentow z nich decentralnje zaměstnili“, zdźěli Werner Genau, decernent za porjad, twarstwo, wobchad a škit před katastrofami, medijam.
Jara wulku perspektiwu na dołhodobny přebytk w Němskej ma tuchwilu 1 264 ćěkancow. Z toho je 1 075 Syričanow, mjez nimi 420 dźěći w starobje hač do 14 lět a 370 młodostnych w starobje mjez 15 a 26 lětami. „Narok na naše šule bjezdwěla přiběra“, Genau rozłoži. Tule su z městom Zhorjelcom we wuskim zwisku. „Chcemy a dyrbimy dobre kubłanske wuměnjenja wutworić.“
Krótkopowěsće (15.02.16)
Mjenje plastikowych titow
Berlin. Wikowanje měło přetrjebu plastikowych titow čujomnje pomjeńšić. Zo by so tónle zaměr docpěł, hrozy zwjazkowa ministerka za wobswět Barbara Hendricks (SPD) z krućišimi postajenjemi. „Samozawjazka wo kóždužkuli płaćiznu ze mnu žanoho njebudźe. Porjadniskoprawniske rjadowanje sej tohodla wotewrjenje wobchowam“, praji ministerka w dźensnišim wudaću nowiny Bild.
SPD z nowym mustwom
Budyšin. Za noweho předsydu Budyskeho městneho towarstwa SPD su minjenu srjedu na sobustawskej zhromadźiznje inženjera dr. Martina Schneidera wuzwolili. Jeho naměstnik je Eckart Riechmann, pokładnik Marko Kuring. Tak sta so změna generacijow na čole Budyskich socialdemokratow. Čoło dotalneho předsydstwa bě po 15 lětach wotstupiło.
Jantarowa komora w Čěskej?
Policija (15.02.16)
Jězbny stoł pokradnyli
Budyšin. Sobotu popołdnju je so na Dr. Pětra Jordanowej w Budyšinje elektriski jězbny stoł zhubił. 3 500 eurow hódny módry Scooter Auriga docpěwa spěšnosć hač do šěsć kilometrow na hodźinu.
Do lawbow so zadobyli
Halštrow. Njeznaći zadobychu so kónc tydźenja při Halštrowskim kěrchowje do dweju zahrodkoweju lawbow. Najebać to, zo běchu grat a zahrodniske nastroje w hódnoće něhdźe 1 500 eurow pokradnyli, načinichu skućićeljo wěcnu škodu něhdźe 300 eurow.
Mortweho wjelka našli
Bórkhamor. Sobotu popołdnju wołachu wobydlerjo policiju do Bórkhamora, dokelž ležeše tam mortwy wjelk na dróze. Spěšnje bě tež sobudźěłaćerka Rěčičanskeho wjelčeho běrowa na městnje. Wona zwěsći, zo njebě nichtó zwěrjo ilegalnje morił. Po zdaću bě wjelk chory a z teje přičiny zahinył. Fachowcy chcedźa kadawer dokładnje přepytować.
Inwentura we Wojerowskim zwěrjencu je wunjesła, zo maja tam 1 165 ...
Saněrowanje tuńše hač planowane
Lessingowy dom w Kamjencu je dosaněrowany. Minjene měsacy su w twarjenju, w kotrymž stej Lessingowy muzej a měšćanska biblioteka zaměstnjenej, škody włóžnoty dla wotstronili.
Kamjenc (UM/SN). Čas włóžnych sćěnow a blakow plěsniwca su w Kamjenskim Lessingowym domje nimo. W zwisku z nětko zakónčenym saněrowanjom su tam dospołnu izolaciju a skóncowane wopłóčkowe roły wuměnili, zo bychu dalšej włóžnoće w sćěnach zadźěwali. Nutřka su włóžny wobmjetk sćěnow wotstronili, městna přećiwo plěsniwcej škitali a znowa wobmjetali. Nowy přewětrjenski system zaruči nětko lěpšu klimu w domje.
„Rozsud za tule inwesticiju njebě lochki“, rozłoži wyši měšćanosta Roland Dantz (njestronjan). Wšako dyrbja hladajo na přichodne nadawki – wosebje nastupajo twar šulow – priority sadźeć. Při inwesticijach zašłych lět pak njemóhł nichtó Kamjencej wumjetować, zo kulturu zanjechaja. Nimo toho pytaja za móžnosćemi, muzej a biblioteku rozšěrić.
Kóždy ma prawo znapřećiwić
Wobydlerjo přećiwo powjetšenju Ralbičanskeje kormjernje swini
Ralbicy (aha/SN). Z planowanym přetwarom a powjetšenjom Ralbičanskeje kormjernje swini zaběraše so wčerawša přewšo derje wopytana wobydlerska zhromadźizna w sydarni tamnišeje gratownje wohnjoweje wobory. Wjesna rada měješe trěbne, wobydlerjow Ralbic wo pozadkach, tuchwilnym stawje a wosebje wo móžnosćach znapřećiwjenja předwidźanemu předewzaću LGH – ratarskeho towarstwa mbH Döbeln, informować. Wjesna předstejićerka Hana Krawcowa wopodstatni zwołanje zhromadźizny z tym, zo je posledni móžny termin zapodaća wobmyslenjow k wupołoženym twarskim podłožkam přichodnu njedźelu.
