Muž z nožom morjeny

Grafing. Při nadpadźe z nožom je dźensa rano na dwórnišću w hornjobayerskim Grafingu muž žiwjenje přisadźił. 50lětny bu tak ćežko zranjeny, zo w chorowni wudycha. 27lětny skućićel němskeho sta­ćanstwa je nimo toho třoch dalšich muži zranił. Policija jeho hišće na dwórnišću zaja. Po prěnich dopóznaćach měješe wón psychiske a drogowe problemy.

Trezor z nadawkami pokradnyli

Drježdźany. Njeznaći su so do jedneje Drježdźanskeje wyšeje šule zadobyli a trezor pokradnyli. W nim běchu nadawki za kónčne pruwowanja składowane. Njehodźi so wuzamknyć, zo su podłožki zjawnje znate. Kultusowe ministerstwo je šuli tuž narunanske nadawki posrědkowało. Pruwowanja njejsu wohrožene. Za šulerjow poběži wšitko po planje. Wróćo stajeny nichtó njebudźe.

Zapalerjej zasudźenaj

Na mnohich wsach Łužicy su hižo meju mjetali abo so hišće na swjatk přihotuja. W Róžeńće to lětsa njemóža, wšako meju wjac nimaja. Tu dyrbjachu sobotu wěstotnych přičin dla podrězać. Njeznaći běchu ju narězali a wona hrožeše so złamać. Wězo je to mjerzace, předewšěm za dźěći a młodostnych. Z woprawnjenjom so nětkole mnozy prašeja, hač dyrbi to być sej mjez sobu takle klubu činić. Z mnohimi Róžeńčanami sym rěčał, a wjetšina měni: Dołhož meju w prěnjej nocy powala, je wšitko w porjadku a akceptujemy to tež. Tola wšitko, štož so po tym stawa, je šamałe. Přizamknu so tomu a namołwjam wšěch, kotřiž chcedźa so raz w podrězanju meje pospytać: Čińće to prošu jenož prěnju nóc a jenož tam, hdźež su přelěni stražować. Takle je po starodawnym wašnju­ a nałožku. Přiwšěm mje zajimuje, kak justica nětkole z tajkim padom wobchadźa. Janek Wowčer

Róžant (SN/JaW). Njeplanowane a chětro drohe „mejemjetanje“ mějachu sobotu w Róžeńće. Tam dyrbješe dobrowólna wohnjowa wobora meju wěstotnych přičin dla podrězać. „Zdónk bě we wysokosći pjeć metrow wo wjac hač połojcu přerězany. Dyrbjachmy jón tuž pušćić“, rozłoži nawoda wobory Frank Pjech. Štom wuryć a powalić pak bě přestrašne. „Při sobotnym sylnym wětřiku by so wón złamał a tójšto škody naparał“, rěkaše ze stron­ wobornikow. „Riziko bě pře­wulke, tohodla wołachmy wobornikow z Kamjenca, a woni z pomocu wjer­ćiteho rěbla štom kusk po kusku wot­rězachu“, Frank Pjech wuswětli.

Prawdźepodobnje bě w nocy na wutoru něchtó meju narězał. Skućićel pak swój plan (na zbožo) njezwoprawdźi. Štom móhł mjenujcy wjacore w bliskosći stejace twarjenja wobškodźić a by-li na dróhu padnył, by wobchad wohrozył.

Na awtodróze prasnyło

Połčnica. Wjele wutrajnosće trjebachu šoferojo dźensa rano na awtodróze A 4 mjez wotbóčkami Porchow, Ohorn a Połčnica. Krótko do 7.30 hodź. běchu mjez Ohornom a Połčnicu wjacore wosobowe jězdźidła do so zrazyli, zo bě awtodróha do směra na Drježdźany na wjace hač dźesać kilometrach dospołnje zatykana. K poćežowanjam dóńdźe na to tohorunja na zwjazkowej dróze B 6.

Tankownju nadpadnyli

Wulka Dubrawa. Po padustwach zašły čas w Malešecach, Komorowje, Kamjenej a Hućinje su sej njeznaći w nocy na njedźelu Wulku Dubrawu jako cil wupytali, a to tankownju wosrjedź wsy. Tu wočinichu namócnje durje a pokradnychu cigarety. Namakane slědy kriminalisća wčera zawěsćichu, nadźijejo so tak pokiwow na skućićelow. Tankownja wosta wčera tuž zawrjena. Što su paduši nimo cigaretow hišće spakosćili, njeje dotal hišće dospołnje zwěsćene.