Dale za dwurěčny Budyšin skutkować
Kandidaća za zastojnstwo Budyskeho wyšeho měšćanosty su sej zamołwitosće za serbskosć a dwurěčnosć města wědomi
Kandidatam za wólby wyšeho měšćanosty Budyšina je nimo skrućenja komunalnych strukturow a wuzběhnjenja jónkrótnosće sprjewineho města dwurěčnosće dla tež hospodarske a turistiske wuwiće města wažny nadawk w móžnym nowym zastojnstwje.
Budyšin je dwurěčny, a to ma so we wšědnym dnju dale a jasnišo pokazować. Tole wšitcy kandidaća na njedawnym wólbnym forumje SN wobkrućichu.
We wólbnym lokalu na to njezabyć
Wólbny forum Serbskich Nowin a Budyskeje župy „Jan Arnošt ...
Wohnjowej woborje, kupjel a puće maja prioritu
Trjebin (AK/SN). Do swojeju wohnjoweju woborow w Trjebinje a Miłorazu chce Trjebinska gmejna dale inwestować. Tole podšmórny komornica Carmen Petrick na wčerawšim posedźenju gmejnskeje rady. Jeje čłonojo su tam lětuši hospodarski plan jednohłósnje wobzamknyli. „Wobě woborje dóstanjetej digitalne škričkowanske nastroje, Trjebinska nimo toho sirenu a nowu chorhoj“, komornica rozłoži. Dohromady chcedźa za wobornikow 25 000 eurow wudać.
Za Miłorasku kupjel wobstara gmejna Trjebin rjedźenski nastroj w hódnoće 5 000 eurow. Za wuporjedźenje železniskich přechodow planuja 16 000 eurow. Dalše dróhotwarske naprawy wopřijimuja 28 000 eurow. Za 6 000 eurow chcedźa nadróžne wobswětlenje instalować a za 6 500 eurow zwučowansku čaru za Trjebinskich wobornikow wutwarić. Jedyn z najwjetšich nadawkow pak budźe, staru rostlinsku wodočisćernju spotorhać. Za to chcedźa 165 000 eurow wudać.
Dworowy koncert w Hornjej Hórce
Něhdźe 150 ludźi je minjenu sobotu do Hornjohórčanskeje wjacezaměroweje hale přišło, zo bychu tradicionalny dworowy koncert tamnišeho muskeho spěwneho towarstwa sobu dožiwili. Koncert zahaji wone z hymnu na Hornju Hórku, ze znatymi domizniskimi spěwami na rjanosće Hornjeje Łužicy a z wjacorymi žortnymi pěsnjemi Hornjeho kraja.
Mjeztym zo na to mužojo a tež jich dirigentka Marika Matthes-Hartmann a z njej organist na keyboardźe Jan Chlebníček podij wopušćichu, nastupichu so prědku holcy a hólcy šulskeho chóra Hornjohórčanskeje zakładneje šule. Hižo dwě lěće zwučuje z nimi wučer Michael Klöpper z Wopakeje. Wón je wot lońšeje nazymy zdobom čłon muskeho chóra, a to z třomi dalšimi spěwarjemi z Budyšina, kotřiž chór tróšku womłodźeja. Klöpper je dźěći na akordeonje přewodźał, tež wone žnějachu sylny přiklesk za swój přinošk.
Policija (04.06.15)
Korzym. Prawje jednała je zawčerawšim 75lětna rentnarka w Korzymju, jako ju njeznata žona zazwoni. Wona wudawaše so jako sobudźěłaćerka turkowskeho statneho rěčnistwa a sej žadaše, zo měła hnydom štyricyfrowu sumu pjenjez přepokazać, hewak přińdu ju zajeć. Pjenjezy měješe rentnarka přez Western Union přepokazać. Wona pak pospyt wobšudnistwa spózna a zawoła policiju.
Kormjernju powjetšić wotpokazuja
Róžant (aha/SN). Hłowny dypk dnjoweho porjada wčerawšeje zhromadźizny gmejnskeje rady Ralbicy-Róžant bě zabrać stejišćo k twarskej próstwje nastupajo ponowjenje kormjernje swini w Ralbicach. Hižo loni spočatk lěta bě nawodnistwo ratarskeho předewzaća próstwu k nastajenju wobtwarjenskeho plana zapodało. Wo tym je gmejnska rada w aprylu 2014 wuradźowała a plan wotpokazała.
Spočatk meje zapodachu gmejnje planowanske podłožki wo saněrowanju a powjetšenju kormjernje na nětčišim stejnišću wuchodnje Ralbic. Jednaćel Hagen Roßmann planowane změny wčera předstaji. Tak chcedźa tři stare chlěwy spotorhać a nowe natwarić. Tamne štyri modernizuja a tak wuhotuja, zo so imisiske předpisy dodźerža. Dale natwarja juchowej jamje, dosahacej za mnóstwo juchi dźewjeć měsacow. Tuchwilu plahuja w Ralbicach 6 900 swini, z ponowjenjom powjetši so kapacita na 11 400 skoćatow.
Z družkami w procesionach
Katolscy křesćenjo swjaty dźeń Božeho ćěła swjećili
Radwor (SN/MWj). Ze swjedźenjom Božeho ćěła katolscy křesćenjo wuznawaja, zo wěrja do přitomnosće Jězusa Chrystusa w swjatym woblatku. Tohodla ćehnjechu dźensa dopołdnja po Božej mši w swjatočnych procesionach k wonkownym wołtarjam, kaž maja tajki na přikład w Radworju tradicionalnje při křižu na nawsy natwarjeny. W procesionje njesechu duchowni pod baldachinom kročo monstrancu z Najswjećišim. Kěrluše kemšerjow přewodźachu zwjetša wosadni dujerjo.
Kaž stajnje za tónle wysoki cyrkwinski swjedźeń běchu so njeličomne holcy družču drastu woblekli. Stawali běchu wone dźensa zdźěla hižo wosrjedź nocy, zo bychu je hotowarniče wšitke sčasom zdrasćili. K dostojnosći Božeho ćěła přinošowachu tohorunja žony, kotrež so k tutej składnosći katolsku swjedźensku drastu woblečechu. Zo so žony, kotrež wšědnje w narodnej drasće chodźa, w běłych płachćičkach na kemšach a na procesionje wobdźěleja, je so mjeztym bohužel nimale dospołnje pozhubiło. W Chrósćicach pak někotre žony tele wašnje žiwe dźerža.
Z busom z Łužicy do Kölna
Krótkopowěsće (04.06.15)
Třěcha kina so sypnyła
Kamjenc. Třěcha bywšeho Kamjenskeho kina je so dźens w nocy sypnyła. Wobydlerjo słyšachu wulki wrjeskot a widźachu mróčel kura. Zranił so na zbožo nichtó njeje. Wohnjowa wobora a techniski pomocny skutk běštej na městnje. Fachowcy pruwowachu, hač wokolnym twarjenjam strach hrozy. Dom njebu hižo wjacore lěta wužiwany.
Zasudźa nadpad
Drježdźany/Wojerecy. Migraciskopolitiska rěčnica frakcije Zelenych w krajnym sejmje Petra Zais nadpad na dom požadarjow azyla we Wojerecach raznje zasudźa. „Je zrudne, ale wěrno, zo njemóža so ćěkancy w Sakskej hižo wěsći čuć“, rěka w jeje zdźělence. Njeznaći běchu w nocy na srjedu spytali dom zapalić, štož pak so jim njeporadźi.
Stawk přetorhnjeny
Berlin. Stawk pěstowarkow w komunalnych dźěćacych přebywanišćach je přetorhnjeny. Dźěłarnistwo ver.di a komunalni dźěłodawarjo běchu dźensa rano po zwrěšćenju jednanjow zwólniwi, posrědkowanske jednanje zahajić. W tym času njeje dowolene stawkować. Posrědkować ma něhdyši Hannoverski wyši měšćanosta Herbert Schmalstieg.
