Krótkopowěsće (03.05.16)
Dóstanu halu spěchowanu
Worklecy. Wopismo wo přizwolenju spěchowanskich srědkow za ponowjenje Worklečanskeje sportownje přepoda dźens za tydźeń statny sekretar w sakskim nutřkownym ministerstwje dr. Michael Wilhelm wjesnjanosće Francej Bruskej (CDU). Na swjatočnosći w 17 hodź. planowanski běrow předwidźane dźěła rozłoži a časowy wotběh předstaji.
Wuspěšna inscenacija
Budyšin. 706 dźěći z pěstowarnjow a zakładnych šulow Delnjeje Łužicy je sej z lóštom a wjeselom dwurěčnu inscenaciju Němsko-Serbskeho ludoweho dźiwadła „Zgubjone a namakane – Ein Herz und andere Dinge“ wobhladało. Mjez hosćimi běchu tež 404 dźěći w Danskej. NSLDź zliči tuž w tutej hrajnej dobje 1 110 přihladowarjow na 17 předstajenjach.
Šek za šulski twar
Wojerecy. Sakska ministerka za kultus Brunhild Kurth (CDU) je Wojerowskemu spěchowanskemu centrumej za ćělnje zbrašenych wčera šek w hódnoće 180 000 eurow přepodała. Cyłotne kóšty 450 000 eurow za třěchu Sakska tuž po 40 procentach spěchuje. Ze swojim wopytom chcyše ministerka wosebje dźěło centruma hódnoćić.
Prěnja zjawna hra wubranki
Młode swójby we wsy mejski nałožk wozrodźili
Jawora (WB/SN). Po wjace hač 45 lětach su młodźi Jaworčenjo lětsa zaso w swojej wsy meju stajili. Z wulkim lóštom a elanom připrawichu sej zdónk, nawichu wěnc a přičinichu na wjeršku meje serbsku chorhoj a pisane banćiki. Při stajenju mejskeho štoma starši wjesnjenjo powědachu, zo bě w Jaworje poslednja meja wokoło lěta 1970 stała. Runje tak kaž tehdy su tež nětko při stajenju mejskej kěrlušej zaspěwali. Meja ma Jaworu nětko hač do kónca měsaca pyšić. Potom chcedźa ju we wobłuku małeho wjesneho swjedźenja powalić.
Kaž wjacore młode swójby připowědźichu, chcedźa so wone klětu wo městno za chodojtypalenje prócować. Tež tónle nałožk hižo wjacore lěta w Jaworje njepěstuja. Ćim rjeńšo, zo chcedźa jón zaso wožiwić a tak dobru naladu a zhromadnosć we wsy přisporjeć. Hižo nětko pak žnějachu organizatorojo meje za swój angažement chwalbu a připóznaće.
Policija (03.05.16)
Před dwórnišćom prasnyło
Budyšin. Runje před Budyskim dwórnišćom je so dźensa rano ćežke wobchadne njezbožo stało. Krótko po 6 hodź. wodźerka Forda z parkowanišća před dwórnišćom wujědźe a chcyše do směra na centrum wotjěć. Njewobkedźbowaše pak wulke, wotpadki wotwožowace nakładne awto a zrazy do njeho. Žona so ćežko zrani, tak zo dyrbjachu ju do chorownje dowjezć. Wodźerjej nakładneho a dalšeho wobdźěleneho wosoboweho awta so njezraništaj. Jordanowa bě wjacore hodźiny dospołnje zawrjena.
Ze wsu sylnišo zwjazani
Młode swójby hrajkanišćo při wohnjowej woborje porjeńšili
Pěskecy (AK/SN). Elisa, Hanna, Laura a Emilia sedźa wjesele w kulojtej čumpjeli, podobnej na wulke plećene hnězdo. Z jich wobličow wučitaš wjeselo a dźakownosć. „Čumpjel je cyle nowa. Za najmjeńšich mamy hišće dalšu čumpjel“, powěda Christina Šwejdźina. Wona słuša k hibićiwym młodym ludźom, kotřiž su wot lońšeho lěća hrajkanišćo při Pěskečanskej wohnjowobornej gratowni sporjedźeli.
„Zakładne wuhotowanje tu hišće bě. Ale hrajkanske nastroje běchu njenahladne“, Christina Šwejdźina rozłožuje. Někotražkuli drjewjana hrjada bě přehnita, zdźěla běchu hozdźe widźeć, w pěskowym kašćiku rosćeše njerodź. „To měješe so změnić“, podšmórnje Tereza Kralowa. Młodźi starši zhonichu wo iniciatiwje znački Fanta, z kotrejž měješe so sto hrajkanišćow podpěrać. Při internetnym wothłosowanju docpěchu 65. městno a smědźachu so nad tysac eurami wjeselić. Njebjelčanska gmejna podpěrowaše jich z materialom a přewza diferencu k cyłkownej sumje. Mnohe młode swójby so tuž gratu přimachu.
Meja hižo po jednej nocy padnyła
Zastup stawnistwa zawěsćeny
Hižo spočatk lěta chcyštej Wulkodubrawska a Malešanska gmejna zhromadne stawnistwo wutworić. Krajna direkcija pak to wotpokaza. Nětko maja nachwilne rozrisanje.
Wulka Dubrawa (CK/SN). Wot julija hač do decembra tohole lěta wukonja stawnica Malešanskeje gmejny stawnistwowe nadawki we Wulkej Dubrawje a změje tam rěčne hodźiny. Wotpowědne zrěčenje zdźěłać je Wulkodubrawska gmejnska rada na swojim zašłym posedźenju wobzamknyła. Trěbne tajke rjadowanje je, dokelž stawnica we Wulkej Dubrawje gmejnske zarjadnistwo w lěću wopušći. Tamni sobudźěłaćerjo nimaja trěbnu kwalifikaciju. Tohodla mějachu hižo dlěši čas problemy, hdyž bě sobudźěłaćerka w dowolu abo chora. Tři lěta su tele zastupnistwo w Malešecach přewzali. Tamniše stawnicy pak njeběchu k tomu hižo dlěje zwólniwe. Dokelž jedna so wo gmejnu přesahowacy nadawk, njemóžachu je tomu tež nuzować.
K nalětnjemu rjedźenju blisko wjesneho hata je so minjenu sobotu ...
Krótkopowěsće (02.05.16)
Vattenfall chce ludźi pušćić
Berlin. Šwedski energijowy koncern Vattenfall dale personal wottwarja. „Dyrbimy ličbu swojich sobudźěłaćerjow perspektiwisce pomjeńšić“, rjekny šef koncerna Magnus Hall Berlinskim nowinarjam. Wón wopodstatni to z wulkim hospodarskim ćišćom energijoweje změny dla. Kelko dźěłowych městnow móhło w Němskej potrjechenych być, Hall njepřeradźi.
Solidarni z pólskimi kolegami
Bad Hersfeld. Skupina něhdźe 60 sobudźěłaćerjow předewzaća Amazon z Bad Hersfelda a Lipska je so na puć k swojim kolegam do Wrócławja podało, zdźěla dźěłarnistwo ver.di. Wopokazać chcedźa jim tak swoju solidaritu w boju wo wyšu mzdu a lěpše dźěłowe wuměnjenja. W Pólskej zasłužeja sobudźěłaćerjo Amazon po informacijach dźěłarnistwa runje 3,50 eurow na hodźinu. Koncern twjerdźi, zo je to wjace.
Hospodarstwo rozrostuje
Policija (02.05.16)
Njezbožo z křesłom
Wojerecy. Wobchadne njezbožo trochu hinašeho razu sta so sobotu připołdnju na zwjazkowej dróze B 97 pola Wojerec. Tam bě so křesło z připowěšaka pušćiło a na puć padnyło. Dwě wosobowej awće njemóžeštej so hižo wuwinyć a zrazyštej do mebla. Na zbožo so při tym nichtó zranił njeje.
Pytaja rjemjeslnikow za swjedźeń
Kulow (SN). Za lětuši Krabatowy swjedźeń pyta město Kulow rjemjeslnikow z kónčiny Leader hornjołužiskeje hole a hatow, kotřiž chcyli na tymle podawku swoje wudźěłki a posłužby předstajić. Swjedźeń budźe wot 12. do 14. awgusta kołowokoło Kulowskeho torhošća. Sobotu a njedźelu maja so tam regionalne rjemjeslniske wiki přewjesć. „Za to pytamy tradicionalne rjemjeslniske zawody, kotrež swoje wudźěłki pokazaja abo ludźom starodawne dźěła demonstruja“, praji Beate Hufnagel z organizaciskeho komiteja města.
Nimo rjemjeslniskich wikow planuja za ludowy swjedźeń dalše akcije. Tak ma so modowa přehladka runje tak wotměć kaž skótne a srjedźowěkowske wiki, kreatiwna mila a prezentacija knihow a filmow wo Krabaće. Přizjewjenja přijimuja w Kulowskim měšćanskim zarjadnistwje pod telefonowym čisłom 035725/ 755 20.
