W měsće tři dny swjećili
Budyšin (CS/SN). Ze salutowymi wutřělemi Dołhich kadlow za rozžohnowaceho so wyšeho měšćanostu Christiana Schramma (CDU) zahajichu sobotu Budyske nalěćo. Hižo pjatk wječor hrajachu na wjacorych městnach hudźbne kapały. Wjace hač 70 towarstwow a zwjazkow wobdźěli so na sobotnym dnju towarstwow. Škoda, zo njebě měšćanski model za slepych widźeć, dokelž bě wuměłc zadźěwany. Na jewišću pod Bohatej wěžu prezentowaše Smjerdźečanska rejwanska skupina hromadźe ze skupinu Sprjewjan swój nowy program z temperamentnymi rejemi. Borbora Wiesnerec pasleše a pomolowa z dźěćimi mječe a tarče, mějo so při tym cyle po heraldiskich zasadach. Njedźelu hudźachu Chróšćanscy muzikanća k rańšemu piwku a njezawjeselichu wopytowarjow jeno ze serbskimi, ale tež z němskimi a čěskimi štučkami.
Organizator swjedźenja Andreas Hennig bě z něhdźe 40 500 wopytowarjemi wulce spokojom, wšako je to jeno snadnje mjenje hač loni, jako zličichu 41 000 zajimcow. Najwjetši wothłós žněješe Budyska kapała Jolly Jumper. Tež kwětkowa modowa přehladka z Erfurta měješe wjele přihladowarjow.
Wjace hač 47 000 eurow nazběrali
Towarstwo Piwarska 1 běchu před dźewjeć lětami załožili, zo bychu we Wojerecach twarjenje ze samsnej adresu saněrowali. Tónle zaměr je nětko nimale docpěty, kaž minjeny pjatk na hłownej zhromadźiznje zwěsćichu.
Wojerecy (AK/SN). Za załoženski dom Domowiny sylnje angažowane towarstwo Piwarska 1 so lětsa nazymu rozpušći. „Bližimy so zaměrej swojich wustawkow“, rozłoži předsydka towarstwa Inge Ilin minjeny pjatk na hłownej zhromadźiznje. 5. septembra chcedźa wobydlerski centrum Konrada Zusy zjawnosći přepodać. Wobhospodarić ma jón potom Wojerowska kulturna fabrika. Dalši hłowny wužiwar budźe přirodowědny techniski dźěćacy a młodźinski centrum NATZ.
Wšudźe w narodnej drasće
Posledni kónc tydźenja w róžowniku na wjacorych městnach meju mjetali
Hórki (aha/SN). Dwanaćelětna Leonie Matješkec witaše sobotu popołdnju w Hórkach hosći do połnje wobsadźeneho stana. Wona připowědźi, zo běchu sej dźěći z maćerjemi pod režiju Annett Matješcyneje předewzali, mejemjetanje wobohaćić. Za to nazwučowachu modernu wersiju bajki „Čerwjenawka“. Mjez 25 dźěćimi-hrajerjemi běchu tež někotre z Dobrošic a jedyn samo z Noweje Wjeski. Swoje teksty přednjesechu w bjezporočnej serbšćinje. Za nje a za wjacore spěwy žnějachu wulki přiklesk. Při napřemoběhu Dawid Cyž jako prěni wjeršk padnjeneje meje docpě a wuzwoli sej Mariju-Luizu Matješkec za kralownu. Tež Hórčanske dźěći wo kralowsku krónu wubědźowachu, při čimž so wosomlětny Damian Jurk jako najspěšniši wopokaza. Lejna Handrikec so na to wjeseleše, zo smědźeše mejska kralowna być. Šěsć porow młodostnych – holcy w narodnej drasće – a za nimi wosom porow dźěći ćehnješe po wsy.
Krótkopowěsće (01.06.15)
Serbska hudźba w interneće
Budyšin. Nowe rozhłosowe wusyłanje „Wočiń woči“ budźe wot jutřišeho kóždu wutoru wot 17 do 19 hodź. w internetnym sćelaku LaBa (Lauter Bautzner) słyšeć. Je to reakcija na přewšo wuspěšne zarjadowanje ze samsnym mjenom w Budyskim Kamjentnym domje, kaž zamołwići sćelaka zdźěleja (http://laut.fm/lauterbautzner).
Proša wo wjace žiwidłow
Berlin. Hladajo na přiběrace ličby ćěkancow prosy Zwjazk taflow Němskeje wo wjace darjenych žiwidłow a žada sej wjace statneje podpěry. „Darjene žiwidła hižo w tej měrje njepřiběraja kaž ličby potrěbnych“, zwurazni předsyda zwjazka Jochen Brühl dźensa w Berlinje. Stat njesměł so jenož na čestnohamtskich pomocnikow při taflach spušćeć.
Čěske honjaki do Islandskeje
Praha. Wjednistwo NATO prosy Čěsku republiku, zo by w juliju a awgusće powětrowy rum Islandskeje škitała. Podobnu lětadłowu misiju su Češa tam z pjeć honjakami JAS-39 Gripen hižo loni nazymu zwoprawdźili. Nětko maja w Islandskej dotal stražowace kanadiske lětadła narunać. Plan dyrbi čěske knježerstwo hišće schwalić.
Za dwě lěće wulke twarnišćo
Hłownu dróhu přez Miłoćicy chcedźa wobšěrnje wutwarić
Miłoćicy (aha/SN). Hinak hač hewak započa Njebjelčanska gmejnska rada swoju wčerawšu zhromadźiznu, kotraž wotmě so tónraz w Miłočanskim socialnym domje „Při žabje“. Zhladujo na dźěło a wobšěrne skutkowanje Tomaša Čornaka dźakowaše so jemu radźićel Daniel Wätzig (wobaj CDU) z wulkim kwěćelom w mjenje wšitkich radźićelow składnostnje jeho 25. jubileja jako wjesnjanosta.
Policija (29.05.15)
Padustwo so bjezmała poradźiło
Lubij. Hakle w poslednim wokomiku móžeše zawčerawšim popołdnju wobsedźer chěže w Lubiju pola sebje doma padustwu zadźěwać. Njeznaty muž bě so do domu zadobył a tam wšitke kamory za hódnotnymi wěcami přepytał. Mjez druhim namaka wón debjenki, kotrež chcyše pozdźišo sobu wzać. W pinčnej garaži domu wuhlada zadobywar wosobowe awto typa Mercedes. Wone njebě zamknjene a kluč tčeše w zamku. Njeznaty bě hižo motor zaswěćił a garažowe wrota wočinił, jako wobsedźer domoj přińdźe. Lepjeny paduch móžeše runje hišće twochnyć. Kriminalni technikarjo namakane slědy zawěsćichu. Za skućićelom pak podarmo pytachu.
Mrowjaca stacija je najnowši dźěl přirodoweje wučbneje šćežki ...
Na młódšich a staršich myslić
Na lisćikach k wólbam Worklečanskeho wjesnjanosty 7. junija steji nimo mjena tuchwilneho wjesnjanosty tež te Stefana Hicki z Noweje Wjeski. 41lětny, kiž z mandźelskej a dźěsćomaj mjeztym lěto w swójskim domje bydli, je so wot Swobodneho serbskeho wolerskeho zjednoćenstwa nastajić dał a měni, zo su to nětko skónčnje woprawdźite wólby, hdyž stejitej dwě mjenje na wólbnym lisćiku. Hižo při wólbach wjesnjanosty lěta 2008, jako mějachu jenož jednoho kandidata, běchu někotři jeho mjeno sobu napisali.
Krótkopowěsće (29.05.15)
Wědomostnicy w Błótach
Choćebuz. Wědomostnicy z dźesać krajow swěta přebywaja dźensa w Błótach. Wulět k Łužiskim Serbam w Braniborskej je dźěl witanskeho programa slědźerjow. Mjez nimi staj stipendiataj programa BRAIN, sociologa a slědźer wo mjeńšinach Giovanni Picker z Italskeje a specialist za słowjanske rěče Boban Arsenijević ze Serbiskeje.
Zaso 40 000 wobydlerjow
Budyšin. Ličba wobydlerjow Budyšina je lětsa w prěnim kwartalu zaso hranicu 40 000 překročiła. Dnja 31. měrca běchu dokładnje 40 004 z hłownym bydlenjom w měsće přizjewjeni, kaž Budyski statistiski wotrjad piše. Hłowna přičina je přiběraca ličba požadarjow wo azyl. Pozitiwny trend zwěsćeja tež nastupajo porody.
Katamaran so dliji
Zły Komorow. Wot 1. junija běchu jězby z katamaranom wot Złokomorowskeho na Lejnjanski jězor předwidźane. Nowa wosebita łódź pak dotal hišće hač do Złeho Komorowa dojěła njeje. Kaž jednaćelka łódźnistwa Marianne Löwa praji, přewjedu tam jězby z wosebitej łódźu najskerje hakle wot 15. junija. Łódź ma 5. abo 6. junija z wosebitym transportom dojěć.
Hry znowa napjate byli
Krabat klětu w Kulowje
Zasadny rozsud měšćanskeje rady za wulki swjedźeń 2016
Kulow (AK/SN). 15. Krabatowy swjedźeń ma so klětu w Kulowje wotměć. K tomu je so měšćanska rada wčera jednohłósnje wuznała. Při planowanju hospodarskeho etata 2016 chcedźa zarjadowanje z 15 000 eurami wobkedźbować.
Krabatowe towarstwo swjedźeń kóždolětnje z partnerami regiona a ze sobustawskimi komunami, towarstwami a zwjazkami organizuje. Kulow přisłuša towarstwu wot jeho załoženja. Lěta 2008 běchu swjedźeń w Sulšecach wuhotowali. „Sulšečenjo su tehdy wulke měritka sadźeli. Cyła wjes bě wupyšena“, podšmórny zastupowacy měšćanosta Georg Szczepanski (CDU). Dźakowano wulkemu angažementej wjesneje zhromadnosće je tónle Krabatowy swjedźeń mnohim hišće derje w pomjatku. Na njón móhł Kulow nětko nawjazać, wšako maja na měšćanskim torhošću Krabatowu stelu. Nimo toho bu Krabat 2. junija 1704 w Kulowje pochowany, na čož dopomina wopomnjenska tafla.
