Pražene kołbaski w srjedźišću byli
Budyšin (CS/SN). Z telko wothłosom jednaćel Matthias Handy a towaršnik Karl Dominik ličiłoj njeběštaj. Prěni festiwal praženych kołbaskow na teritoriju předewzaća za mjaso a kołbasu Meisters na Budyskej Edisonowej bě minjenu sobotu połny wuspěch. Při stejnišćach, hdźež na wšěch 20 družin praženych kołbaskow grilowachu, so ludźo w dołhich rynkach nastupachu. Mnozy dyrbjachu chětro dołho čakać, prjedy hač móžachu bohaty wuběr praženych kołbaskow woptać.
Trochu komplikowany bě system, zo dyrbjachu sej wopytowarjo najprjedy bon wobstarać. Za to pak běchu mužojo při grilach wolóženi, dokelž njetrjebachu tež hišće kasěrować. „Dyrbimy hišće nazhonjenja zběrać“, praji Matthias Handy. Zawěsće klětu hinaše rozrisanje namakaja. Na kóždy pad ma so zarjadowanje přichodnje kóžde lěto k spočatkej grilowanskeje sezony wotměć. Z akciju chce firma dale na sebje skedźbnjeć a w zjawnosći zadomić, zo předewzaće hižo Löblein njerěka, ale Meisters.
Pjenjezy za woboru a internet
Gmejnscy radźićeljo hospodarski plan 2023 wobzamknyli
Trjebin (AK/SN). Do swojeje wohnjoweje wobory a do komunalneje infrastruktury Trjebinska gmejna lětsa inwestuje. To podšmórny komornica Dana Piehl na njedawnym wurjadnym posedźenju gmejnskeje rady, kotraž zaběraše so z hospodarskim planom 2023. Wjetšina radźićelow inwesticijam we wobjimje 668 000 eurow přihłosowaše.
Tak chcedźa gratownju wohnjoweje wobory w Trjebinje powjetšić. Za to maja 100 000 eurow předwidźane. Z tym nastanje městno za předrasćernju a za wukubłanišćo za młodźinsku woboru. Jej přisłuša tuchwilu 25 młodostnych. Tohorunja budźe potom městno za transportne jězdźidło. Dale wutwarić chcedźa šěrokopasmowu syć za spěšny internet, za čož chcedźa 480 000 eurow wudać. Za twarski dwór natwarja halu, zo móhli tam techniku wotstajić. Saněrowanje mosta při Rulec młynje ma něhdźe 70 000 eurow płaćić.
Přichod kupjele drje zawěsćeny
Korzym (CS/SN). Budyski wokrjes přisłuša nětko zaměrowemu zwjazkej Korzymskeje kupjele. Wotpowědne zrěčenje staj krajny rada Udo Wićaz (CDU) a předsyda zaměroweho zwjazka Sven Gabriel předwčerawšim w kupjeli podpisałoj. Z tym přewozmje wokrjes 51 procentow podźěla zwjazka. Tamne dźěla sej Šěrachow-Korzym, Załom, Hornja Hórka a Beiersdorf w Zhorjelskim wokrjesu.
Z tym drje stej přichod Korzymskeje kupjele a jeje planowane saněrowanje zawěsćenej. Spočatk tohole měsaca su próstwu wo spěchowanje Sakskej krajnej direkciji zapodali. Jeli dóstanu spěchowanske srědki přizwolene – a z toho wšitcy wobdźěleni wuchadźeja – móhli srjedź lěta 2024 twarić započeć. Hdyž tuchwilu planowany twarski čas 18 měsacow dodźerža, móhli so zajimcy wot nazymy 2025 w Korzymju zaso kupać. Mjez druhim chcedźa kupjel energetisce saněrować a jeje tepjenje wot płuna na drjewjane třěški přestajić. Dale ma so technika w kupjeli ponowić a dźěćacy wobłuk kaž tež sawny chcedźa powjetšić. Za to je 23 milionow eurow planowanych.
W Pančicach-Kukowje je minjene dny nowe zjawne městno k sedźenju ...
Krótkopowěsće (07.06.23)
Komunalne wólby klětu 9. junija
Drježdźany. Přichodne komunalne wólby w Sakskej budu klětu 9. junija. Wuzwolić maja so za pjećlětnu wólbnu dobu wokrjesne sejmiki, měšćanske, gmejnske a wjesne rady. Termin je sakske ministerstwo nutřkowneho postajiło a wčera wozjewił. Komunalne wólby wotměwaja so wot lěta 1994 w swobodnym staće paralelnje k wólbam Europskeho parlamenta samsny dźeń.
Za Opus Klassik nominowany
Berlin. Organist Johannes Kral, pochadźacy z Dobranec pola Hodźija, je w dwěmaj kategorijomaj za myto Opus Klassik 2023 nominowany. Ze swojim albumom „Elements of Bach“ požada so w kategorijomaj „instrumentalist lěta“ a „dorostowy wuměłc lěta“. Opus Klassik je myto za klasisku hudźbu w Němskej. Lětušich lawreatow w oktobrje w Berlinje počesća.
Lemke pólsku koleginu zetkała
Na wodźenju wo 600lětnych stawiznach wsy zhonili
Wobydlerjo Lejna su minjenu sobotu 600lětne wobstaće swojeje wsy swjećili. Swjatočnosć započa so popołdnju z historiskim wuchodźowanjom po wsy. Benedikt Cyž, mjez Lejnjanami mjenowany „wjesny chronist“, wjedźeše nas podłu Wysokeje dróhi, něhdyšeje wikowanskeje dróhi a powědaše zahoriće wo kublerjach a wulkoležownosćach, wo njesprawnych zdźědźenjach wulkeho kubła dźowkam, dokelž njebě synow, wo znjezboženych planach młynskeho twara, wo „piwowej zwadźe“, kotraž nasta, jako wobydler swój dom njeprawnisce na gmejnskich płoninach natwari, tam pućowacym piwo a palenc předawaše a z tym 500 metrow zdalenemu oficialnemu předawarjej konkurencu činješe.
Na přednošk a diskusiju
Budyšin. We wobłuku wustajeńcy „Čej da sy“ w Budyskim Serbskim muzeju přeprošuja tam jutře, srjedu, w 19 hodź. na filmowy wječor a diskusiju. Najprjedy pokazaja wurězki z filmoweje dokumentacije Reinera Nagela „Čej da sy“ a krótkofilma „SMY“ Sofije Cyžec a Luizy Nawkec. Tomu přizamknje so powerpointowy přednošk dr. Měrćina Wałdy pod hesłom „Serbski katolski miljej – kak dale?“. Wón wěnuje so mjez druhim prašenju, što rozeznawa cyrkej za čas socializma z tej dźensa. Hižo wot 18 hodź. móža so zajimcy na wodźenju po wustajeńcy wobdźělić.
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady wotměje so jutře, srjedu, w 19 hodź. na gmejnskim zarjedźe. Mjez druhim chcedźa radźićeljo hospodarski plan za lěto 2023 wobzamknyć. Wšitcy wobydlerjo su wutrobnje přeprošeni.
Policija (06.06.23)
Natutkany z awtom jěł
Chrósćicy. Dobry čuch mějachu policisća w nocy na njedźelu, jako w Chrósćicach wosobowe awto typa Chevrolet zadźeržachu a šofera kontrolowachu. Dokelž 49lětny chětro za alkoholom wonješe, přewjedźechu pola njeho test a zwěsćichu, zo měješe wón 1,36 promilow alkohola w kreji.
Drogi při sebi měł
Wojerecy. Při kontroli kolesowarja njedźelu we Wojerecach namakachu pola 27lětneho muža 20 gramow konopje. Jako na to jeho bydlenje kontrolowachu, zwěsćichu dalšich 72 gramow samsneje drogi a konopowu rostlinu.
Žadaja sej měrniši wobchad
Wobydlerska rěčna hodźina w Roholnju wjacore problemy wotkryła
Roholń (AK/SN). W Roholnju (Riegel), najsewjernišej wsy Łazowskeje gmejny, chce komuna bórze docpěć, zo so tam wobchad změruje. Tole podšmórny wjesnjanosta Thomas Leberecht (CDU) tele dny w rěčnej hodźinje z wobydlerjemi. Při tym rěčachu wo dróze Při lěsu, kotruž nakładne awta dźeń a bóle kóncuja, a wo sylnym wobchadźe na statnej droze S108. „Chcemy so hišće do lěća ze statnym zawodom Sakski lěs a z biosferowym rezerwatom zetkać a prawniske móžnosće rozjimać. W juniju je planowane přepruwowanje wobchada hromadźe z wokrjesom, policiju a porjadowym zarjadom“, Leberecht rozłoži.
„Jeli dyrbimy dróhu Při lěsu dospołnje saněrować, njebudu wobydlerjo za to žane přinoški płaćić dyrbjeć“, wjesnjanosta přilubi. Po jeho słowach tuchwilu lisćinu zdźěłuja, kotre puće maja so jako prěnje ponowić. Łazowska gmejna ma dohromady 115 kilometrow komunalnych pućow.
Z wustajeńcu na serbskosć njezabyć
Pančicy-Kukow (BW/SN). W klóštrje Marijinej hwězdźe w Pančicach-Kukowje wotewrě minjeny pjatk po wječornych kemšach Jurij Špitank, nawoda sekcije wěda a skutk Towarstwa Cyrila a Metoda (TCM) fotowu wustajeńcu. Na dźesać taflach su widźeć wubrane fota wo swjedźenskim ćahu, dźiwadłowym předstajenju „Hwězda jasna“ a dalšich serbskich wjerškach, kotrež so před 25 lětami we wobłuku 750. jubileja klóštra wotměchu. Z wustajeńcu chce TCM přinošować lětušej 775. róčnicy załoženja klóštra Marijineje hwězdy a z njej skedźbnić na bohate serbske nabožne žiwjenje w klóštrje a přisłušnych wsach.
