Policija (26.05.23)
Wotwlečenje předrohe było
Budyšin. Wodźer wosoboweho awta typa Suzuki je wčera rano na awtodróze A 4 při wotbóčce Budyšin wuchod do wjacorych wobhrodźenjow twarnišća zajěł. Policija trochuje škodu na 500 eurow. Awto 59lětneho dyrbjachu wotwlec. Jako bołharski šofer zhoni, kelko to płaći, so wón z mjeztym přijědźenej swójbnej wotsali. Policija jeho krótko před Wósporkom dosćahny, tak zo dyrbi muž wotwlečenje tola zapłaćić.
Na wulki serbski swójbny swjedźeń
Tež meble dyrbja planować
Z posedźenja gmejnskeje rady Ralbicy-Rožant
Róžant (JK/SN). Gmejnscy radźićeljo Ralbic-Róžanta mějachu na swojim wčerawšim posedźenju w Róžeńčanskim gmejnskim zarjadnistwje wšelake temy zarjadniskeho dźěła wuradźować a wobzamknyć. Spočatnje zaběrachu so z městnym pruwowanjom kónclětneho wotličenja lěta 2016, kotrež předstaji sobudźěłaćer pruwowaceje firmy Steinbach & Kollegen. Tute wobswědča delanskej gmejnje dobry staw zarjadnistwa kaž tež porjadne zličbowanje w lěće 2016. Gmejna dósta za to njewobmjezowany posudk prawosće. Na tajkim dobrym zakładźe da so dale hospodarić. Kaž komornica gmejny Franciska Čapikowa radźićelam zdźěli, so hižo nětko pruwowanju lěta 2017 wěnuja a je lětsa zakónča. Za dwě lěće chcedźa tež wšitke dalše kónclětne pruwowanja hač do lěta 2021 zmištrować.
Wětrnikaj smětej so dale wjerćeć
Chrósćicy (SN/MWj). Na milinowe wětrniki je čłowjek w našim kraju mjeztym dawno zwučeny. Skerje wone napadnu, hdyž so najebać wětřik njewjerća. Tak bě to minjene tydźenje a měsacy z jednym z dweju wětrnikow pola Chrósćic. Někak wot januara wón hižo změrom steješe. Na naprašowanje Serbskich Nowin sobumějićel Jan Wjesela rjekny, zo je so techniski dźěl skóncował. Před štyrjomi tydźenjemi drje su připrawu sporjedźeli, na to pak je dalši elektroniski dźěl wupadnył. „Tajki wot dźensa na jutře njedóstanješ, tohodla wětrnik zaso steješe. Tele dny su dźěl wuměnili, nětko wětrnik zaso funguje a so wjerći“, ratar na wuměnku rozłoži.
Projekt „Kupa komunikacije, kreatiwity a kultury“ móžetej ...
Krótkopowěsće (26.05.23)
Tež dalše šule so přizjewili
Baršć. Prawicarske zjawy na Bórkowskej šuli „Mina Witkojc“ běchu tema na posedźenju sejmika wokrjesa Sprjewja-Nysa wčera w Baršću. Tam je nawoda statneho šulskeho zarjada rozprawjał, zo su so po wozjewjenju padow w Bórkowach tež dalše šule přizjewili. Wčera je mać ze Złeho Komorowa wo podobnych padach informowała. Přitomnaj šulerjej z Bórkowow staj prawicarske akcije wobkrućiłoj.
Bywši zarjad wottorhaja
Chrósćicy. Něhdyši gmejnski zarjad wosrjedź Chrósćic chce gmejna wottorhać dać. To su radźićeljo na wčerawšim posedźenju zdźělili, po tym zo běchu to do toho jednohłósnje wobzamknyli. Twarjenje je wot lěta 2019 prózdne. Za nje žanoho kupca namakali njejsu. Nětko planuja, zo ma tam nowa gratownja wohnjoweje wobory nastać. Wottorhanje płaći 111 000 eurow.
Koło abo e-bike leasować
Młodostni a dźěći zhromadnje
Policija (25.05.23)
Rentnarja wobšudźił
Wojerecy. 79lětny muž we Wojerecach je so předwčerawšim z woporom njeznateho wobšudnika stał. Skućićel přizjewi so přez WhatsApp pola rentnarja a wudawaše so jako jeho syn. Wón prošeše, zo by starc jemu 2 000 eurow přepokazał, štož Wojerowčan tež sčini. Pozdźišo 79lětny pola swojeho syna zazwoni. Tak so wukopa, zo bě wón pjenjezy cuzej wosobje přepokazał. Kriminalna policija so nětko z padom zaběra a wobydlerjow prosy, při přepokazanju pjenjez kedźbować a přiwuznych informować.
Nowe žiwjenje we wobchodźe
Kamjenc (AH/SN). We wobłuku 4. Kamjenskich kołbaskowych a regionalnych wikow su kónc měrca Kamjensku klankacu stwičku wotewrěli. Z tym je z něhdyšeho wobchoda za hrajki Sieglindy Herrnsdorf rumnosć za kreatiwne tworjenje a hrajkanje nastała. Iniciator ideje je towarstwo Metarmorfoza. Wone je z mytom z wubědźowanja Simul+ městnosć za wulke a małe dźěći, swójby, młode maćerje, dźědow a wowki kaž tež za wšitkich, kotřiž so za kreatiwne poskitki zajimuja, stworiło.
Wopytowarjo móža sej tam hrajkać abo prosće wotpočnyć, nadeńdu tam kuchnju z baru, starše a nowše klankace stwički, přijomne městna k sedźenju kaž tež wulke blido za kreatiwnu zaběru. Z tym nasta w nutřkownym měsće dobra składnosć, wosrjedź wobchodow a gastronomije we wosebitej rumnosći přebywać a so zaběrać. Předewšěm zhotowjerka klankow Katerina Nemcova chce z dźěłarničkami nowu rumnosć ze žiwjenjom napjelnić. Mjez druhim planuje wona dźěłarnički wo pjelsćenju a wo zhotowjenju klankow.
Wot jutřišeho do kupjele
Kulow. W Kulowskej lěsnej kupjeli zahaja jutře w 13 hodź. lětušu kupansku sezonu. Na wopytowarjow čaka nowe 93 metrow dołhe suwadło. Natwarili su je za dohromady 200 000 eurow dźakowano spěchowanju z programa za witalne wjesne srjedźišća. Nowe su tohorunja wobě hrajkanišći, startowe bloki a wobhrodźenja. Kupjel je wot póndźele do pjatka wot 13 do 20 hodź. wotewrjena, kónc tydźenja a swjate dny wot 11 do 20 hodź. Zastup su snadnje zwyšili. Dźěći płaća 1,50 a dorosćeni 2,50 eurow.
Spěwaja we wopomnišću
Psowje. Na swjatkowne spěwanje přeprošuje Rakečanski žónski chór sobotu, 27. meje, w 14.30 hodź. k wopomnišću w Psowjach (Oppitz). Po zabawnej hodźince před kćějacymi rododendronowymi kerkami poskićuja wopytowarjam kofej a tykanc. Wjesny klub Psowje čłonki chóra při pohosćenju wopytowarjow podpěruje. Tež we wobłuku kolesowanskeje jězby móžeš tam derje pozastać. Při dešćiku zarjadowanje wupadnje.
Wustajeja w ateljeju
