Wjace dopisow hač hewak z wuhódanjom jutrowneje křižowki su nam čitarjo w minjenych dnjach připósłali. Snano wšak zaležeše to na wosebitym myće, kotrež smy připowědźili, mjenujcy hakle njedawno wušły Łužiski monopoly. Bohužel móžemy wob­lubowanu swójbnu hru jenož jónu wulosować, čehoždla měješe sej redakciska fortuna tónraz wosebje ćežko. Nad hru wjeselić smě so ­Friederika Zyndźic z Čornec w Hodźijskej gmejnje. Wšitcy, kotřiž tónraz zbožo njemějachu, njech so přichodny raz znowa wobdźěla. Njech pak potom njezabudu, swoju adresu připisać, přetož hewak jich dopis wobkedźbować njemóžemy.

Róžant (SN/MWj). Po wšěm zdaću hišće lětsa prěnje twarske nadawki za nowu Ralbičansku pěstowarnju wupisaja a tež twarskim firmam přepodadźa. Prawdźepodobnje budźe so při tym wo hłuboko­twarske dźěła jednać. Tole zdźěli wjesnjanosta Hubertus Ryćer (CDU) na wčerawšim posedźenju gmejnskeje rady.

Jeje čłonojo zaběrachu so mjez druhim z hospodarskim planom 2022. W nim je dalše planowanje projekta jedna z najwjetšich inwesticijow komuny. Kaž Ryćer dale zdźěli, ma pěstowarnja po najnowšich wobličenjach 8,1 milion eurow płaćić. 90 procentow z toho dóstanu spěchowane. Swójski podźěl gmejny wučinja přiwšěm něhdźe milion eurow. Při wobličenju je wobkedźbowane, zo móhli wudawki za twaršćizny a scyła za twarske kóšty wo hač do 25 procentow rozrosć. Za to móže gmejna hač do dźesać procentow wjace spěchowanja dóstać.

Nowe Město (AK/SN). Bywše fabrikowe twarjenje předźernje za drjewjanu wołmu na kromje Noweho Města nad Sprjewju chcedźa na wobswětowy kubłanski a zetkawanski centrum wuwić. To připowědźa towarstwo „Předźernja za naslědne žiwjenje z.t.“. „W běhu třoch lět su za to wobšěrne twarske dźěła planowane. Wosebitosć je, zo sej wuraznje přejemy, zo so z alternatiwnymi twaršćiznami a rjemjeslniskimi technikami eksperimentuje“, wuzběhnjetaj iniciatoraj Friederike Böttcher a Adrian Rinnert. Z hlinu, drjewom a dalšimi přirodnymi twaršćiznami chcedźa rumnosće a fasadu wuhotować. Za to zasadźuje so tohorunja bywša zapósłanča Lěwicy w Sakskim krajnym sejmje Kathrin Kagelmann.

Mjeztym je towarstwo tež zwjazkowe wobswětowe ministerstwo přeswědčiło. Wottam dóstanu přichodne tři lěta spěchowanje we wobjimje nišeje pjećcyfroweje sumy. Na tak mjenowanym „twarnišću k sobu činjenju“ chcedźa nětko stare rjemjeslniske techniki wuspytać, domjacu nadobu reparować a hižo raz wuži­wane resursy znowa zasadźeć, rjekny ­Adrian Rinnert.

Baršć (SN/JaW). Wokrjesaj Sprjewja-Nysa (SPN) a Hornje Błóta-Łužica (OSL) matej nowy serbskorěčny poskitk. Pod a tež na internetnej stronje wokrjesa OSL móža sej zajimcy wobhladać, kak maja pomjenowanja gmejnow wokrjesa prawje delnjoserbsce pisać a zdobom móža sej tam naposkać, kak měli je prawje wurjekować. Wo tym informuje krajnoradny zarjad wokrjesa SPN w nowinskej zdźělence.