Malešecy (CS/SN). Hospodarski plan za lěto 2022 z wobjimom 8,5 milionow eurow je Malešanska gmejnska rada na swojim zašłym posedźenju schwaliła. Nimo toho wobzamknychu nowe wustawki wo zarjadniskich kóštach.

Dale zaběrachu so radźićeljo z bywšim dwórnišćowym terenom Malešanskich twaršćiznowych wikow. Tam chce gmejna nowe přemysłowe płoniny wutworić. Radźićeljo su nětko nadawk za prěnje planowanske dźěła we wobjimje nimale 60 000 eurow přepodali. Dalše plano­wanja za 8 600 eurow chcedźa za škitne naprawy přećiwo wulkej wodźe w Dubrawce a w dźělach Barta zahajić. Nimo toho radźićeljo rozsu­dźichu, dróhu Při hrodźe w Budyšinku za 158 000 eurow saněrować. W Zuborničce pak předachu ležownosć, na kotrejž maja bydlenja bjez barjerow nastać.

Za nowu wohnjowobornu gratownju w Barće rozdachu radźićeljo dalše twarske nadawki w cyłkownym wobjimje 58 000 eurow. Při tym jedna so wo nutřkowne durje, kachlicarske dźěła, kładźenje špundowanja, molerske dźěła a twar wobłoženja schodow.

Kamjenc. Swój dźeń wotewrjenych duri móže Kamjenska hudźbna šula lětsa zaso w prezencnej formje přewjesć. Wšitke na hudźbje zajimowane dźěći kaž tež młodostni a starši su sobotu, 7. meje, na Kamjensku Macherowu 140a přeprošeni. W času wot 14 do 17 hodź. móža wopytowarjo instrumenty wuspytać a so z hudźbnymi wučerjemi rozmołwjeć. Hudźbny program poda dohlad do skutkowanja kubłanišća. Zajimcy njech přizjewja so pod telefonowym čisłom 03578 7747370.

Wobornicy přeprošeni

Róžant. Dobrowólne wohnjowe wobory zarjadniskeho zwjazka Při Klóšterskej wodźe swjeća jutře, pjatk, dźaknu Božu mšu składnostnje swjedźenja swjateho Floriana. Wona započnje so w 19 hodź. w Róžeńčanskej hnadownej cyrkwi. Wšitcy wohnjowi wobornicy kaž tež dalši hosćo su k tomu přeprošeni. Božu mšu organizuje lětsa Njebjelčanska dobrowólna wohnjowa wobora.

Nowy domicil wohnjoweje wobory w Slepom derje pokročuje

Slepo (AK/SN). Nowotwar Slepjanskeje wohnjowoborneje gratownje z městnom za štyri hašenske jězdźidła derje pokročuje. Tole podšmórny twarski nawoda Slepjanskeho zarjadniskeho zjednoćenstwa Steffen Seidlich na zašłym posedźenju Slepjanskeje gmejnskeje rady. „Mulerske dźěła na dźělu za wohnjowych wobornikow su wotzamknjene. Tuchwilu twarja mulerjo jězdźidłowu halu“, tak Seidlich.

Jako přichodni budu ćěslojo na rjedźe. Mjeztym da gmejna dochadźane poskitki za blidarske a zamkarske dźěła kaž tež za wonkowne připrawy pruwować. Nadawk za elektropřiprawu a za škričkowansku techniku we wobjimje 173 000 eurow přepodachu Wojerowskej elektrofirmje. Nimo toho přepodachu nadawk za twar tepjenja, přewětrjenja a sanitarnych připrawow za 295 000 eurow.

Dokelž k wólbam wjesnjanosty 12. junija w Njebjelčanskej gmejnje wjesnjanosta Tomaš Čornak (CDU) hižo njekandiduje, změja tam na kóždy pad naslědnika. Za to maja jeničkeho kandidata.

Miłoćicy (SN/MWj). Hdyž André Bulank doma w Miłoćicach na swojej zahrodźe sedźi, móže tak prawje wodychnyć. Po 12. juniju snano tak wjele składnosće k tomu njezměje. Jako njewotwisny kandidat je wón jenički, kiž so k wólbam wjesnjanosty Njebjelčanskeje gmejny staji. 48lětny nan dźowki chcyše spočatnje jenož alternatiwa k móžnym dalšim kandidatam być, wo kotrychž bě w gmejnje rěč. Nětko pak ma dobre šansy, sam na čoło komuny stupić.