Potajna postawa wotnětka w Radušu nastajena
Raduš (PBe/SN). Wona hodźi so jenož ćežko wopisować, dokelž wupada stajnje hinak – wotwisnje wot toho, z kotreho směra wětřik duje. Tuta wšelakorosć, tuta potajnosć wučinja bytosć postawy, kotruž bě Lipšćanska wuměłča Nadine Prange stworiła a kotraž hodźi so optisce idealnje do Błótow. Wona steji wot najnowšeho w Radušanskej cerje (Radduscher Kahnfahrt), we wodźiznje, kotraž zwjazuje Raduš ze syću groblow w Błótach. Sta dowolnikow móže ju nětko wobdźiwać. Postawa „Melusine“ saha wjace hač tři metry z wody. Wona nasta po srjedźowěkowskej powědce, po kotrejž wostanjetej žiwjenje a lubosć stajnje wulke njedowuslědźene potajnstwo.
Krótkopowěsće (12.05.22)
Wojuja wo wjace mzdy
Wjazońca. Sobudźěłaćerjo předewzaća Capron we Wjazońcy wojuja wo moderne a načasne tarifowe zrěčenje. Mjeztym je zawodna tarifowa komisija swoje žadanja nawodnistwu zawoda přepodała. Přistajeni chcedźa na přikład tarifowe zrěčenje sakskeje metaloweje a elektroindustrije w stejnišću zwoprawdźić. Prěni jednanski termin budźe 24. meje.
Wo samopostajowanju Serbow
Mladá Boleslav. Wosebita pućowanska wustajeńca Serbskeho instituta (SI) „Swoboda kiwa“ je wotnětka w statnym wokrjesnym archiwje čěskeho města Mladá Boleslav přistupna. We wobłuku wčerawšeje wernisaže je stawiznarka SI dr. Jana Piňosová hosći po přehladce wjedła. Centralna tema wustajeńcy je „narodne prócowanje wo samopostajowanje Serbow mjez swětowymaj wójnomaj“.
Dale lochce znižene hódnoty
Hnydom wjacore ćeže naraz rozrisać móhli
Za přichod su sej we Wulkodubrawskej gmejnje hišće tójšto zaměrow stajili
Tuchwilny Wulkodubrawski wjesnjanosta Lutz Mörbe (njestronjan) prócuje so wo dalšu wólbnu periodu w zastojnstwje a kandiduje k wólbam wjesnjanosty 15. meje. Mörbe pak njeje jenički, kiž so wo poziciju prócuje. Dalši je njewotwisny kandidat Hardy Glausch. Hač so dotalny wjesnjanosta Mörbe přećiwo swojemu konkurentej přesadźi, rozsudźa wobydlerjo–wolerjo. Najlěpše wabjenje za njeho jako wjesnjanostu wšak su pozitiwne wuslědki dotalneho skutkowanja, na kotrež móže wón pokazać.
Jědźernju zarjadowali
Po přestawce zaso meju mjetali
Změna na čole zarjadnistwa
Stefan Anders wot awgusta předsyda zarjadniskeho zwjazka
Chrósćicy (SN/MWj). Hnydom z prěnim wólbnym přechodom bě wčera w Chróšćanskej wjacezaměrowej hali „Jednota“ jasne, zo změje zarjadniski zwjazk Při Klóšterskej wodźe wot spočatka awgusta noweho předsydu. Z wulkej wjetšinu je zhromadźizna zarjadniskeho zwjazka Stefana Andersa z Pančic-Kukowa do tohole zastojnstwa wuzwoliła. Wot 17 móžnych hłosow dósta wón 14, třo radźićeljo hłosowachu za dotalneho předsydu Měrka Domašku, kiž bě po sydomlětnym skutkowanju w tutej funkciji znowa k wólbam nastupił. Kaž Chróšćanski wjesnjanosta Marko Kliman (CDU), kiž jako zastupowacy předsyda zarjadniskeho zwjazka wólby nawjedowaše, zdźěli, je nimo Domaški a Andersa dalša wosoba požadanje wotedała, ale přepozdźe, čehoždla je hižo wobkedźbować njemóžachu.
Policija (11.05.22)
Wjele škody na twarnišću nastało
Wojerecy. Dwaj kranaj na twarnišću na Wojerowskej Stauffenbergowej běštej minjeny kónc tydźenja cil paduchow. Wot njeju skućićeljo wšelake kable wotrězachu a so zhubichu. Kaž zamołwity na twarnišću policiji rozprawješe, nasta cyłkowna škoda we wobjimje pjećcyfroweje sumy. Hódnota pokradnjenych kablow wučinja porno tomu „jenož“ něhdźe 2 000 eurow. Wojerowscy kriminalisća pad přepytuja.
Dróhu měli nuznje wutwarić
Hamor (AK/SN). Industrijowej stejnišći Hamor a Čorna Pumpa měłoj přichodnje direktnje mjez sobu zwjazanej być. Wobstejacu Sprjewinu dróhu K 9281 dyrbjeli k tomu w druhim wotrězku mjez Nowym Městom nad Sprjewju a Čornej Pumpu wutwarić. K tomu wuzna so předwčerawšim Hamorska gmejnska rada z jednohłósnym zasadnym rozsudom. Tak so Hamorska gmejna z gmejnu Sprjewiny Doł solidarizuje. Wottam předewzaće hižo podpěruja. „Dróha je idealny a trěbny zwisk. To chcemy nětko z wobzamknjenjom gmejnskeje rady potwjerdźić“, Hamorski wjesnjanosta Achim Junker (CDU) podšmórny.
Minjeny tydźeń wothłosowaše so Hamorska gmejna z Grodkowskej staroměšćanskej saněrowanskej towaršnosću, kotraž wuwiće na industrijnišću w Čornej Pumpje přewodźa. „Chcemy nětko hišće Budyski wokrjes sobu zapřijeć“, rjekny projektowy koordinator za Bjerwałdski jězor Roman Krawc. „Chcemy na to skedźbnić, zo wobě industrijnišći hromadźe słušatej a cyłk tworitej.“
60 porow na drastowym ćahu
Wažny partner
Krótkopowěsće (11.05.22)
Zetkanje dźiwadłow zahajene
Plauen/Zwickau. Pod patronatstwom prezidenta sakskeho krajneho sejma dr. Matthiasa Rößlera a sakskeje krajneje ministerki za kulturu a turizm Barbary Klepsch (wobaj CDU) bu wčera 11. zetkanje sakskich dźiwadłow zahajene. Hosćićel je dźiwadło Plauen-Zwickau. Mjez cyłkownje jědnaće wobdźělacymi so jewišćemi je tež Němsko-Serbske ludowe dźiwadło ze swojej inscenaciju „Gott“.
Kompetencny centrum załoža
Nossen. Kompetencny centrum za ekologiske ratarstwo chce sakski minister za ratarstwo Wolfram Günther (Zwjazk 90/Zeleni) póndźelu w Nossenje wotewrić. Zaměraj Krajnemu zarjadej za wobswět, ratarstwo a geologiju přisłušaceje institucije stej mjez druhim produktiwitu družin ekologiskeho plahowanja stopnjować a jich atraktiwitu z na praksu orientowanymi poručenjemi powjetšić.
Znowa smjertne pady
