Maja nowe hašenske jězdźidło
Mokre drjewo wjeselo kazy
Hrajkanišća Worklečansku gmejnsku radu chětro wužaduja
Worklecy (JK/SN). Njebě to přewjele, štož mějachu radźićeljo gmejny Worklecy minjeny štwórtk na swojim prěnim posedźenju po lěćnej přestawce rozjimać. Přiwšěm bě to za nich zdźěla sylny tobak. Prawidłownje maja techniske organizacije kaž TÜV zjawne hrajkanišća na wěstotu přepytować. Lětuša kontrola, kotruž su w juliju wotměli a kotrejež rozprawa nětko předleži, pak je wšitkim hrajkanišćam gmejny njewěsty staw wobswědčiła. Mokre nalětnje wjedro bě k tomu přinošowało, zo su na wšitkich hrajkanišćach w zemi zakótwjene drjewjane nastroje škodu poćerpjeli a wěstotnym žadanjam hižo njewotpowěduja. Nětko ma gmejna spěšnje jednać. Maja dźě hrajkanišća wěste być, a dźěći je trjebaja.
Tragedija w baćonjacym hnězdźe
W prawdźepodobnje najwuspěšnišim baćonjacym hnězdźe we Wbohowje (Übigau) pola Njeswačidła je so lětsa tragedija stała. Tónkróć bě so tam pjeć młodych baćonow wulahnyło. Hižo w juniju wuchowachu tam młodźatko, kotrež bě z hnězda padnyło. Wěteńčan so na to wo nje staraše, dźeń pozdźišo dowjezechu ptaka do Zhorjelskeho přirodoškitneho zwěrjenca. Tak dóstachu 25. junija jeničce štyri młodźata rynku wokoło nóžki. Něšto dnjow pozdźišo nańdźechu tam mortweho młodeho baćona. Přičinu njeznaja. A wot toho časa běchu jich jenož hišće tři w hnězdźe. 17. julija popołdnju bě wulki zliwk. Něhdźe 40 litrow spadkow su we Wbohowje naměrili. Hnězdo bě tak ćežke, zo so sypny a dalše młodźo pod sobu pohrjeba. Wo zbywacej dwě staraštaj so Holger Lehmann a Ackermannec swójba. Skónčnje dowjezechu tež jej do Zhorjelca, hdźež wšitke tři baćony nětko hladaja. Zaměr dźě je ptaki zaso do přirody pušćić, hdyž su sylne dosć. Hladarjo Zhorjelskeho zwěrjenca zwěsćichu, zo bě sej jedne z třoch młodźatow hrudźnu kósć złamało.
W Koslowje wopominachu wjesnjenjo a hosćo sobotu z małym programom ...
Krótkopowěsće (20.09.21)
Hódnota 35 překročena
Budyšin. Z incidencu 45,0 po Roberta Kochowym instituće je Budyski wokrjes dźensa kritisku hódnotu 35 překročił. Wostanje-li to pjeć dnjow za sobu, nabudu dalše škitne naprawy płaćiwosće. Minjeny pjatk bě tu 25 nowych natyknjenjow z koronawirusom. W Zhorjelskim wokrjesu rozprawjachu wo šěsć infekcijach. Incidenca po RKI je tu dźensa 21,6.
Wuspěšna bilanca festiwala
Bart. 2. hornjołužiski komornohudźbny festiwal je so minjeny pjatk w Bartskej cyrkwi wuspěšnje zakónčił. Wot 10. do 17. septembra móžachu na dźewjeć zarjadowanjach dohromady wosom stow wopytowarjow witać. 45 wuměłcow ze 14 krajow hudźeše na sydom koncertnych městnach we wjesnych cyrkwjach a hrodach. Štyri wodźenja po tworni klawěrow C. Bechstein we Wodowych Hendrichecach a kulturnopolitiska podijowa diskusija su program skulojćili.
Móža sportowu halu wobnowić
Policija (17.09.21)
Do wobchoda so zadobyli
Wojerecy. W nocy na srjedu su so njeznaći we Wojerecach do wobchoda na Budyskej aleji zadobyli. Z njeho spakosćichu woni najwšelakoriše nastroje w hódnoće wjac hač 600 eurow. Nimo toho su paduši wěcnu škodu 150 eurow načinili.
Wučerjo a šulerjo dźakowni
Gmejnska rada za Rakečansku šulu tójšto spomóžneho zeskutkowniła
Rakecy (JK/SN). Po lěćnej přestawce witaše Rakečanski wjesnjanosta Swen Nowotny (CDU) swojich radźićelow zaso wróćo do wšědneho komunalneho dźěła a tak do poslednjeho lětušeho koła posedźenjow.
Hnydom na spočatku mějachu so radźićeljo gmejny z problemom wobydlerjow susodneje Stróže (Wartha) rozestajeć, hdźež mějachu njedawno přez cyły dźeń mazanu pitnu wodu. Wohnjowa wobora bě tankowe awto napjelniła, při čimž je so wulkeho ćišća we wodowodźe dla zerzawc pušćił a w někotrych domjacnosćach škody na płokawach a šatach zawinował. W přichodźe hižo k tajkim panam dóńc njesmě, a wohnjowa wobora budźe swoje tanki na přemysłownišću při Jitkowskim puću pjelnić.
Na jězbu do Drježdźan a Mišna
Budyšin. Serbske šulske towarstwo z. t. přeproša seniorow na dnjowu wuprawu do Drježdźan. Srjedu, 29. septembra, pojědu zajimcy z busom do sakskeje stolicy. Wottam podadźa so z łódźu na Łobju podłu Sakskeho winoweho puća do Mišna, hdźež wopytaja po zhromadnym wobjedźe Albrechtowy hród. Wuprawa płaći na wosobu 55 eurow. Zajimcy njech přizjewja so hač do 20. septembra pod telefonowym čisłom 03591 /550 223 abo z mejlku na .
Koncert w Michałskej cyrkwi
Budyšin. Spěwytwórc Clemens Bittlinger a perkusionist David Kandert wuhotujetej jutře, sobotu, pod hesłom „Daj mi swojej křidle“ koncert w Budyskej Michałskej cyrkwi. Zarjadowanje započnje so w 19 hodź., zastup při wječornej kasy płaći dźesać eurow.
Lěto po wotkryću
Koslow. Z krótkej swjatočnosću dopominaja w Koslowje na lońše wotkryće pomnika „Nawrót do Koslowa“, jutře, sobotu we 18 hodź. Swjatočnosći přizamknje so zabawa z prezentaciju CDje „Hory módre, ja was znaju“ woblubowanych serbskich spěwow.
