Łužiskej parličce skićitej kóždom kwasej jónkrótnu atmosferu
Njewjesćinske pory, kotrež pytaja za swój najrjeńši dźeń městnosć z cyle wosebitej atmosferu, měli sej raz Hrodźišćanski hród wobhladać. Spěchowanske towarstwo Pro Gröditz, kotrež w swojej dźensnišej formje 1738 natwarjeny hród wobhospodarja, poradźuje mandźelskeju in spe na indiwiduelne wašnje. To nastupa wotběh kwasa kaž tež wuhotowanje rumnosćow. Za wěrowanje hodźi so najlěpje „módry salon“ mjenowana mała žurla za dźesać do 15 wosobow. Na wulkej žurli móže po tym 40 do 45 hosći swjećić. Wo kwasnu hosćinu pak dyrbitaj so žeńtwylačnaj runje tak kaž wo stawnicu – za Hrodźišćo zamołwita je zastojnica z Wósporka – abo stawnika samaj starać. Jedna-li so wo cyrkwinske wěrowanje, poskića so ewangelski Boži dom bjezposrědnje pódla hrodu.
Daloki park kaž tež bliska Hrodźišćanska skała tworitej wulkotnu kulisu za kwasne fota. Njewjesćinske pory maja nimo toho składnosć, róžowy štomik jako dopomnjenku sadźić. Wobsteji-li ze stron kwasarjow zajim na wodźenju po hrodźe, hodźi so tajke pola towarstwa skazać.
Pomnik za Koslow nastawa
Stare twarjenje z nowej funkciju(4)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny tule rjad drobnych a małych projektow předstajeja.
Serbsko-jendźelske pomjenowanje wćipnosć zbudźa: „Wódny dom reloaded“ rěka projekt Čornobóskeho towarstwa we Wuježku, gmejna Bukecy. „Dyrbiš kreatiwny być“, měni wjesnjanosta a čłon towarstwa Norbert Wolf. Dokelž chcychu z titlom na so skedźbnjeć, wužiwachu tule rěčnu konstrukciju. A twarjenje, na kotrež je ideja wusměrjena, ma w dwójnym zmysle (hišće) něšto z wodu činić. Starši dźěl bě gratownja 1996 rozpušćeneje wjesneje dobrowólneje wohnjoweje wobory. Wot toho časa wužiwa ju Čornobóske towarstwo jako swój domicil, kaž to předsyda Harald Bießlich wobkruća. Po tym zo su w lěće 2002 za wjesne zastaranje z pitnej wodu pódla twarjenja nowu hłuboku studnju ryli, přitwarichu jej wodospřihotowansku připrawu.
Krótkopowěsće (05.08.20)
Dworowy swjedźeń njebudźe
Hrubjelčicy. Serbske ewangelske towarstwo je swój lětuši dworowy swjedźeń wotprajiło. Chcychu jón 5. septembra, a to prěni króć w Hrubjelčicach, přewjesć. Dotal su jón ewangelscy a mnozy katolscy Serbja zhromadnje wjacore lěta we Wuježku pod Čornobohom swjećili. Přičina postupowanja, tak piše časopis ewangelskich Serbow Pomhaj Bóh, su trěbne naprawy škita před koronu.
Wuměnja stare mězniki
Mužakow. W Parku hrabje Pücklera w Mužakowje je jenož hišće hač do kónca septembra widźeć wosom nimale 60 lět starych měznikow. Wone steja na kupje a podłu Nysy. Chcedźa tam wosom nowych nastajić. Wšitke podłu němsko-pólskeje mjezy we wobłuku Sakskeje stejace 370 měznikow budźe wuměnjenych.
Wo pjenjezach rozsudźili
Budyšin. Financny wuběrk města Budyšina je wo rozdawanju pjenjez z wobydlerskeho etata rozsudźił. Za projekty planuje město 10 700 eurow. Lětsa dyrbjachu wo 57 namjetach rozsudźić. Spěchowane budu hodowna dekoracija za Hrodowu, Serbsku a Seminarsku hasu, apotekarska zahroda při Michałskej cyrkwi a zazelenjenje Serbskeje hasy.
Policija (04.08.20)
Jastwu hišće raz zadźěwał
Kulow. Njepřipowědźeny wopyt měješe předwčerawšim připołdnju 56lětny muž w Kulowje. Při jeho bydlenskich durjach klinkachu zastojnicy Wojerowskeho policajskeho rewěra. Přičina bě, zo wón pokuty płaćił njebě, a tak předležeštej přikazaj zajeća přećiwo njemu. Jako jemu uniformowanaj rozłožištaj, što móhło to w najhóršim padźe woznamjenjeć, bě muž dowidny a je dohromady 480 eurow zapłaćił. Tak móžeše wón wjacednjowskemu přebytkej w jastwje zadźěwać.
CSB wupowědźi pěstowarnje
Łaz (AK/SN). Křesćansko-socialny kubłanski skutk (CSB) wupowědźi 31. decembra 2021 nošerstwo pěstowarnjow we Łazu, Běłym Chołmcu, Šćeńcy a Wulkich Ždźarach. Wo tym informowaše Łazowski wjesnjanosta Thomas Leberecht (CDU) na zašłym posedźenju gmejnskeje rady. Na pisomne naprašowanje wo přičinach wupowědźenja so wobě stronje wuraznje njewuprajatej. Dotalne zrěčenje płaćeše wot 1. januara 2011.
Gmejna Łaz dyrbi nětko nošerstwo swojich pěstowarnjow znowa wupisać. Hižo w aprylu 2020 je wjesnjanosta gmejnskich radźićelow a wjesnych předstejićerjow informował. CSB je rozsud swojim sobudźěłaćerjam w kubłanišćach kónc měrca zdźělił. Nawodnicy mějachu powěsć staršim dale sposrědkować. Po słowach wjesnjanosty chce Łazowska gmejna mjenowane štyri pěstowarnje dale wjesć, dokelž je potrjeba za městnami dale wulka.
Plesternaki z hornjołužiskeje skały
„Wobswět chorownje sobu wot Serbow postajeny“
Kamjenc (SN/MWj). Na 20lětne wobstaće je tele dny Kamjenska chorownja maltezow swj. Jana zhladowała. Tónle jubilej swjeća we wosebitym času, rěka w nowinskej zdźělence maltezow. W minjenych štyrjoch měsacach su tam 300 pacientow w zwisku ze schorjenjom abo z podhladom schorjenja na koronawirus zastarali. Byrnjež so tam wot junija połoženje bytostnje wolóžiło, wulki swjedźeń k jubilejej chorownje přiwšěm móžny njeje. W małym kruhu mjenowaše Kamjenski wyši měšćanosta Roland Dantz (njestronjan) medicinske zarjadnišćo „našu chorownju“, chwaleše jeje dobre mjeno a wuzběhny zwólniwosć wšitkich sobudźěłaćerjow, druhim pomhać. Drježdźansko-Mišnjanski biskop Heinrich Timmerevers w postrownym lisće podšmórny, kak wažna hojernja za wobstajne hladanje chorych w regionje je. „Je to chorownja, kotrejež wobswět je sobu wot Serbow a wot diaspory postajeny. W tymle domje je čłowjek jako cyłk wažny. Kaž dyrbi jeho ćěło fungować, ma w nim tež duša bydlić.“
Profil wikow sobu wobwliwowało
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Towarstwo Radiška (9).
Stróža pola Hućiny je lubowarjam přirody wočerstwjenski paradiz z jónkrótnym ekosystemom. Mało ludźi pak zhoni, zo je kupa Radiška wosrjedź Olby bywše słowjanske hrodźišćo. Wurywanki z 13./14. lětstotka kaž hornčerske wudźěłki, pódkowy a brónje na to pokazuja. Dźensa drje hrodźišćo, kotrež bě něhdy 38 króć 27 metrow wulke, lědma hišće spóznaješ. Scyła je přistup na kupu hórniskich předpisow dla zakazany.
Nowej cybli za nabóčnej wěži
Připad sobu pomhał twarske njedostatki na wosadnej cyrkwi zwěsćić
Chrósćicy (SN/MWj). We wobłuku cyłkowneho ponowjenja Chróšćanskeje cyrkwje je so wčera, póndźelu, dalši wotrězk započał. Wobě nabóčnej wěži dóstanjetej w přichodnych štyrjoch měsacach nowu cyblu jako wjeršk. Po tym zo běchu tam sewjernu nabóčnu wěžu zaróštowali, započachu z njeje koporowy blach dele brać. Přichodne dny tohorunja drjewjanu konstrukciju cyble dospołnje wottwarja, prjedy hač ju na městnje zaso natwarja a potom z nowym koporom wobdadźa.
