Wojerowski měšćanski zarjad začuwa dobru rezonancu na iniciatiwu „Bulwar stare město“. Wo tym swědči rozprawa Dietmara Wolfa na njedawnym posedźenju měšćanskeje rady.
Wojerecy (AK/SN). Lětuši Wojerowski „bulwar stare město“ jako iniciatiwa cityjoweho managementa, cyłka Přichod města z.t. a domjacych rjemjeslnikow a přemysłownikow, je derje zaběžał. To potwjerdźi Dietmar Wolf, nawoda fachoweho wobłuka twarstwo, na njedawnym posedźenju měšćanskeje rady.
Wot 4. junija hač do 22. awgusta tam akciju znowa wotměja. Wokoło torhošća, Cyrkwinskeje a Měroweje maja meble, přeprošace z napisami w němskej a serbskej rěči k posydnjenju. Sudobja z kwětkami wšitko wobrubjeja. Schneiderec frizerski salon zawjesela z přibrjóžnej baru. Rěznistwo Sinapius je piwowu zahrodu wotewrěło. Po wječorach wabi lounge. „Chcemy, zo wobydlerjo hasy a naměsto takrjec nazhonja a dožiwja“, Dietmar Wolf rozjasni.
Lubij (AK/SN). Wot měrca Zhorjelski wokrjes na koronapandemiju ofensiwnje a wobhladniwje reaguje. To je krajny rada Bernd Lange (CDU) na minjenym posedźenju wokrjesneho sejmika w Lubijskej wikowej hali potwjerdźił. „Smy cyłkownje za to zamołwići, toho běch sej wědomy. Jasne struktury naprawow wot měrca a pomjenowanje zamołwitych su nam při tym jara pomhali“, Bernd Lange rozłoži. „Smy swoje mocy zesylnili a zaměrnje zasadźili.“
Jara derje su ludźo wobydlerski telefon přiwzali. Tam bě sčasami hač do 36 sobudźěłaćerjow zasdźenych. Woni přijimachu cyłkownje 20 000 telefonatow, 83 procentow z toho je wobdźěłanych. „Nichtó njetrjebaše dołho na wotmołwu čakać“, krajny rada wróćo zhladujo rjekny. Dźakowano wobhladniwemu wobchadźenju z pandemiju móža chorownje nětko planowane operacije přewjesć.
Třicećo hišće w karantenje
Budyšin/Zhorjelc. Tuchwilu njeje w Budyskim wokrjesu nichtó wjace z koronawirusom inficěrowany. Wot měrca 2020 je strowotniski zarjad cyłkownje 501 natyknjenje zwěsćił. 2 948 wosobow dyrbješe do karanteny, aktualnje je jich hišće 30. W Zhorjelskim wokrjesu registruja hišće jeničku infekciju, wot přikazaneje karanteny tam wokomiknje nichtó potrjecheny njeje.
Pomniki lětsa njepřistupne
Budyšin. Zarjadnistwo města Budyšina je zdźěliło, zo 13. septembra planowany dźeń wotewrjeneho pomnika lětsa wupadnje. Twarska měšćanostka Juliane Naumann (njestronjanka) „ćežki rozsud“ wobžaruje, kotryž pak je hladajo „na wěstotu a strowotu wobdźělnikow“ trěbny. „Přiwšěm smy optimistiscy, zo móžemy zarjadowanje klětu zaso wuhotować.“
Bjezdomni móža wostać
Dom za drogami přepytali
Biskopicy. Policija je dźensa rano znowa bydlenje w Biskopicach přepytała, hdźež bě hakle w meji drogi našła. Dźensa rozhladowachu so zastojnicy tež na hornjej łubi a w pincy domu a zawěsćichu wjacore sudobja. Pohladneho wobydlerja su na policajski rewěr sobu wzali.
Wulkodubrawska gmejnska rada měješe na swojim posedźenju wo tym wothłosować, kak pjenjezy z digitalneho pakta za swoju zakładnu šulu nałožić. Dalša tema bě twar swójskich domow.
Běła Woda (AK/SN). Po třoch lětach, jako dyrbješe město Běła Woda z nuzowym etatom wuńć, móže nětko zaso z wobzamknjenym hospodarskim planom dźěłać. Tomu je so měšćanska rada wutoru na swojim zeńdźenju wuznała. Z dwanaće přihłosowanjemi a pjeć hłosawzdaćemi su etat 2020 wobzamkli. W nim planuja 2,9 milionow eurow za inwesticije. Ćežišća tworja předewšěm dróhi, puće, zelenišća, kaž tež sportnišća a wólnočasne městnosće.
W stadionje wottwarja tribunu, dokelž ma tam tartanowa čara nastać. Připrawu za dalokoskok pomjeńša. W domje ćěłozwučowarjow chce město socialny trakt a tepjernju twarić. Při tym wobnowja 28 lět stare tepjenje. Pod wodarnju chcedźa hač do kónca lěta wodomjet saněrować. Twarski a hospodarski wuběrk zetka so prawje bórze ze zamołwitym inženjerskeho běrowa, zo bychu dalše kroki planowanja rozjimali.