Móst nětko dotwarjeny
Worklečenjo móža tež zaso na małej kupje swjećić
Worklecy (aha/SN). Minjeny pjatk je so na wulkej kupje we Worklecach wjele ludźi zešło. Wjesnjanosta Franc Brusk (CDU) bě wšitkich wobydlerjow přeprosył na oficialne přepodaće noweho mosta, kotryž wot wulkeje na mału kupu wjedźe. Mjez hosćimi běchu přirjadnica Budyskeho krajneho rady Birgit Weber, zapósłanc Sakskeho krajneho sejma Alojs Mikławšk a statny sekretar za regionalne wuwiće dr. Frank Pfeil (wobaj CDU). Franc Brusk witaše jeho žortnje jako „čestneho wobydlerja“. Wšako je Pfeil mjeztym štwórty raz we Worklecach přebywał.
Zhladujo na stawizny wobeju kupow dopominaše Worklečanski wjesnjanosta na mnohe swjedźenje a wšelakore podawki, kotrež su tam wjacore generacije wobydlerjow dožiwili. Zo by tak wostało, k tomu přinošuje nětko móst w dosahacej dołhosći, kotryž su Worklecy z gmejny Sprjewiny Doł dóstali. Jedne wužadanje bě, trěbnej 36 tonow ćežkej fundamentaj na kupu transportować.
Policija (29.06.20)
Woheń na zbožo žadyn njebył
Pančicy-Kukow. Krótko do połnocy na njedźelu wołachu wohnjowu woboru a policiju do klóštra Marijineje hwězdy w Pančicach-Kukowje. Na zbožo pak so wukopa, zo so tam ničo njepali. Płomjenja we wohnjowej škli na ležownosći napřećo dźěłarni běchu so w škleńčanych durjach špihelowali.
Baćony nětko z „wupokazom“
Tež lětsa zaso we wjacorych wsach Budyskeho a Zhorjelskeho wokrjesa młodym baćonam rynki wuchodoněmskeje ptačernje Hiddensee přitykuja. Minjeny štwórtk zahajichu akciju we Worklecach, Miłoćicach, Njebjelčicach a Šešowje. Tam dóstachu młodźata swoje „wupokazy“.
Ornitologa Stefan Siegel dźěło hižo někotre lěta we Łužicy wukonja. Pomoc z wotpowědnej techniku dóstachu w Miłoćicach wot Misalic firmy, we Worklecach pomhaše wohnjowa wobora a w Njebjelčicach přewostaji jim tamniši twarski zawod gmejny wotpowědny rěbl. Kaž hižo loni běchu tež lětsa dźěći Njebjelčanskeje pěstowarnje přeprošene, kotrež poskitk tež rady přiwzachu. Na kóncu akcije móžachu wone „swoje“ baćony samo pomajkać.
Maltezojo chorownje dale zawěsćeja
Maltezojo su za dwě swojich šěsć na předań stejacych chorownjow hižo kupne zrěčenje podpisali. Wjace pak na naprašowanje Serbskich Nowin najprjedy raz zdźělić nochcychu.
Kamjenc (SN/mwe). „Za sakske chorownje po wuprajenju našeho towaršnika jednanja tuchwilu traja“, wuswětla Stephanie Hänsch, wjednica předewzaćelskeje komunikacije maltezow Sakskeje-Braniborskeje. Zamołwitosć za předań a z njej zwjazane konsekwency ma jeničce katolska pomocna organizacija ze swojim sydłom w Kölnje. „Nam stej ruce wjazanej a móžemy na naprašowanje medijow a dalšich jenož to rjec, štož z běrowa generalneho społnomócnjeneho Karl Prinza zu Löwensteina zhonimy“, Stephanie Hänsch praji.
Kaž z najnowšeho wozjewjenja jednaćelstwa maltezow Němskeje wuchadźa, su w minjenych měsacach intensiwne rozmołwy z potencielnymi nošerjemi wjedli. Wšako chcedźa „za kóždu městnosć a kóždy dom to najlěpše“.
Poskitki žiwjenskeho stila dožiwili
Farar Dzikiewicz so rozžohnował
Budyski wokrjes z koronaamplu
Budyski wokrjes je koronaamplu postajił. Kaž krajnoradny zarjad zdźěli, potrjechja naprawy strowotniskeho zarjada při rumowje jasnje wotmjezowanych srjedźišćach infekcijow předewšěm zwěsćeny teritorij.
Budyšin (SN/at). Na karće Roberta Kochoweho instituta (RKI) je Budyski wokrjes runja Zhorjelskemu z běłej barbu podaty. To rěka, zo njeje tu w minjenych sydom dnjach žadyn nowy pad korony. Najebać tele wuwiće płaći wot 27. junija w Sakskej nowe škitne postajenje korony dla. Wone zawjazuje „přisłušne zarjady wotwisnje wot regionalnych infekciskich parametrow, přiwótřene naprawy postajić, z kotrymiž hodźi so wuwiće natyknjenjow wobmjezować.
W Budyskim krajnoradnym zarjedźe su na to reagowali a tak mjenowanu koronaamplu, schodźenkowy plan wokrjesa, wozjewili, kiž płaći wot kónca tydźenja.
Za „amplu“ schowa so wjaceschodźenkowe postupowanje, wot ćmowozeleneho hač do čerwjeneho je pjeć schodźenkam barba wobchadnej ampli podobnje přirjadowana. Mjenowane ličby poćahuja so na ličbu 300 000, cyłkowneho wobydlerstwa Budyskeho wokrjesa.
Krótkopowěsće (29.06.20)
Rozmołwa z Bombardierom
Drježdźany. Wot twarca kolijowych wozydłow Bombardier Transportation připowědźeny lutowanski program za němske stejnišća chcyštaj ministerski prezident Sakskeje Michael Kretschmer (CDU) a hospodarski minister Martin Dulig (SPD) dźensa z předsydu němskeho jednaćelstwa Bombardiera Michaelom Fohrerom rozjimać a z nim wo zawodomaj w Budyšinje a Zhorjelcu rěčeć.
Morgenroth nowy intendant
Zhorjelc. Nowy intendant Gerharta Hauptmannoweho dźiwadła Zhorjelc-Žitawa budźe Daniel Morgenroth. Zhorjelski wokrjesny sejmik a měšćanscy radźićeljo Zhorjelca a Žitawy su poručenje dohladowanskeje rady sćěhowali, kaž krajnoradny zarjad zdźěli. Morgenroth ma 1. awgusta 2021 Klausa Araunera naslědować, kiž zastojnstwo staroby dla złoži.
Muzej za čas korony
Ławka móhła wjele wo zašłosći powědać
Smjerdźaca (aha/SN). Wjele móžetej sej spřećelenej susodce Gabriela Matcyna a Róžamarija Bernardcyna powědać, hdyž při rjanym wjedrje w chłódku starych lipow w Smjerdźacej na roznošowarja Serbskich Nowin čakatej. Hdyž stej wo nowosćach z našeho wječornika zhoniłoj, so rozmołwa mjez nimaj dale pleće. By-li pak móhła ławka, na kotrejž po dźěle wotpočinatej, powědać, byštej wjele zajimawostkow – rjanych kaž tež bolostnych – zhoniłoj.
Pod mjeztym stolětnymi lipami steješe hižo zdawna na samsnym městnje ławka z ćesaneho zornowca. Na njej zetkawachu so něhdy wowka Gabriele Hana Misalina a mać Róžemarje Hańža Rachelowa a jako třeća tež Lisbet Rječcyna. Mjez žonami knježeše stajnje dobra nalada. Jan Misala, pozdźišo znaty Worklečanski herc, hraješe na ćahatej harmonice a jich serbske spěwy po cyłej hornjej wsy wjesele klinčachu.
Policija (26.06.20)
Paducha lepił
Kamjenc. Sobudźěłaćer Kamjenskeho nakupowanišća je předwčerawšim paducha lepił. Podhladny bě bjez toboły do wobchoda šoł a jón bórze na to z tobołu a tołstym nachribjetnikom wopušćił. Jako jeho sobudźěłaćer narěča, poča tamny agresiwny być a jeho snadnje zrani. Paduch wostaji rubiznu stejo a z kolesom ćekny. Daloko přišoł pak njeje, přetož alarmowana policija jeho bórze dosahny. Rubiznu – drastu a kapsnu lampu w hódnoće 400 eurow – móžachu kupnicy wróćić.
