Zhromadne mustwo přikład druhim
Koparjo a dalše wosoby z Delnjeje Łužicy su „Serbskemu mustwu“ přisłušeli, kotrež wudoby sej na lětušej Europeadźe třeće a z tym najlěpše městno při dotalnych štyrjoch europskich mišterstwach narodnych mjeńšin.
Dešno (HA/SN). To je wulke wudobyće za Serbow a cyłu Łužicu. Tale zhromadnosć mjez Hornjej a Delnjej Łužicu na serbskim polu je přikład za druhe wobłuki, wuzběhny předsyda Domowiny Dawid Statnik na hłownej zhromadźiznje towarstwa „Serbske koparje/Wendische Auswahl“ minjeny pjatk w Dešnje. Runje tak je so decernent z wokrjesneho zarjadnistwa Sprjewja-Nysa Michael Koch wobdźělnikam z Delnjeje Łužicy dźakował a podšmórnył, zo budźe wony wuspěch na přeco wažny podawk w tudyšej historiji.
Mocy wjazać
Chcedźa Serbski zakoń ponowić
Budyšin (SN/at). Sakski Serbski zakoń z lěta 1999 ma so nowelěrować. K tomu chcedźa prezidij a prawniski wuběrk Zwjazkoweho předsydstwa Domowiny runje tak kaž Rada za serbske naležnosće Sakskeje swoje předstawy hač do spočatka decembra jako zakład k dalšej zaběrje z maćiznu předpołožić. Při tym dźe najprjedy wo naroki a zaměry, kotrež do moderneho zakonja słušeja, mjenje wo konkretne tekstowe formulacije. Potencielnej cilej móhłoj być runohódne zakótwjenje dwurěčnosće a přiměrjenje na europske mjeńšinowe prawo.
To bě ze zhromadneho hybridneho wuradźowanja prezidija a prawniskeho wuběrka Domowiny a sakskeje Serbskeje rady wčera w Budyskim Serbskim domje zhonić. Wulki dźěl wobdźělenych je so za modernizowanje zakonja wuprajił. Zdobom běchu pak tež kritiske hłosy, wobdźělnicy rozprawjachu. Z pokazku na njezjawny charakter zetkanja nochcyše so nichtó z nich nadrobnišo wuprajić.
Prěnje prócowanja wo nowelaciju sakskeho Serbskeho zakonja běchu 2014 te trójki zapósłancow Lěwicy, SPD a Zelenych w Sakskim krajnym sejmje.
Na kubłanskej wuprawje
Barowy festiwal přewjedli
Prěni raz zarjadowachu w Radworskim klubje swjedźenski kónc tydźenja
Radwor (SN/pdź). Pod projektnym titulom „Zaso něšto lós w Radworju!!!“ wudoby sej tamniši młodźinski klub loni myto we wysokosći 5 000 eurow simulplus-fondsa „Čiń sobu“ w kategoriji žiwa dwurěčnosć. Z tutymi fenkami Radworska młodźina wulki són. Hižo jako woswjećichu 2018 swoju sobotnu party składnostnje 10lětneho wobstaća wonkowneje bary na łuce před młodźinskim klubom, zrodźichu mysličku zarjadować wulki barowy festiwal přez cyły kónc tydźenja. W zašłych třoch dnjach tutón dołhodobny projekt skónčnje zwoprawdźichu.
Za to Radworska młodźina hižo cyły tydźeń pilnje wšitko přihotowaše. Na łuce direktnje před baru natwarichu wulki stan z parketom-rejowanišćom a jewišćom. Dale klub wotnutřka přetwarichu, zo by słužił młodźinje zdźěla jako skład, wopytowarjam pak zdźěla tež jako druhi mały floor. Před wysokim žiwym płotom, kotryž klubowu łuku wot płoniny před Radworskim hrodom dźěli, nastajichu piwowy wóz a dalši mjeńši stan. Tež mnoho křesłow woni wonka zestajachu.
Hižo cyły tydźeń přihotuje Radworska młodźina swój klub za ...
Ma žiłku za fotografowanje
Dźakny swjedźeń zjawny był
Rowno (JoS/SN). Tradicionalny lěćny swjedźeń su minjenu sobotu na Rownjanskim Njepilic statoku swjećili. Spočatnje bě to dźakne zarjadowanje za wšitkich pilnych pomocnikow při najwšelakorišich zarjadowanjach w běhu lěta. Mjeztym je to zjawny podawk za zajimcow z cyłeje wokoliny. To zwurazni tež předsyda spěchowanskeho towarstwa Njepilic dwór Manfred Nikel. „Z tymle swjedźenjom so wšitkim dźakujemy, tež hdyž su dźensa mnozy w dowolu. Wosebje dźakujemy so Čamarjec pjekarni, kotraž je w drjewjanej pjecy Njepilic chlěb napjekła, a wězo tež Grodkowskim muzikantam.“
„Tajka wučerka chcu tež jónu być“
Rafaela Domaškec z Nowoslic bě lětsa prěni króć kubłarka w serbskim rěčnym lěhwje Serbskeho šulskeho towarstwa we Wodowych Hendrichecach. Rozsudźiła je so wona pomhać, zo by praktiske nazhonjenja za swój powołanski puć zběrała. Po złoženju matury na Budyskim Serbskim gymnaziju je so wona loni na studij wučerstwa za wyšu šulu za předmjetaj němčina a nabožina do Drježdźan podała. „Wučer za nabožinu je wučbu na tajke ,cool‘ wašnje přewjedł, zo sej prajich, ,tajka wučerka chcu ja tež jónu być‘. To mje nětko motiwěruje“, so wona dopomina. „Hižo moja wowka je była wučerka a moje kuziny su to tež. So z wučerku stać je mój wulki són, kotrychž sej nětko spjelnju.“ Dalša přičina za jeje rozsud bě, zo skića nabožina wjele móžnosćow z dźěćimi interagěrować, město toho zo wučer jenož před nimi steji. „W předmjeće němčina to bohužel tak njefunguje, tuž chcu přichodnje předmjet geografiju studować.“
W Błótach Lěto župow zakónčili
Bórkowy (SN). Wjace hač 50 zastupjerjow wšitkich pjeć teritorialnych Domowinskich župow je sej minjeny pjatk do Błótow wulećało, zo bychu lěto župow zhromadnje zakónčili. Na wuprawje do Bórkowow mějachu zhromadnje z prezidijom a sobudźěłacymi zarjada Domowiny składnosć, sej nazhonjenja wuměnjeć a aktualne wužadanja rozjimować.
Jako wjeršk zetkanja podachu so wobdźělnicy na čołmowanje po slědach serbskich bajow. Tam dožiwichu dźiwadło z bajowymi postawami kaž na přikład připołdnicu a wódnym mužom, ale runje tak serbsku hudźbu ze skupinu KULA BULA. Tola tež Domowinjenjo zaspěwachu na čołmach tu abo tamnu štučku.
Nadźiju, zo so wšitcy w přichodźe bórze zaso wosobinsce zetkaja a dale dobru zhromadnosć wšitkich regionow Łužicy pěstuja, wupraji župan župy Delnja Łužica dr. Pětš Šurman při rozžohnowanju.
Domowina je Lěto župow loni składnostnje 100. róčnicy swojeho załoženja jako zhromadne předewzaće wšitkich župow Delnjeje, srjedźneje a Hornjeje Łužicy wuwołała, zo bychu zhromadnosć skrućili a wuměnu spěchowali.
