Zhromadźene spisy spřistupnili
Bjesady wosadne žiwjenje wožiwjeja a wobohaćeja
Serbske Bjesady w Rakecach, Hodźiju a Bukecach dale aktiwnje skutkuja. Wone wožiwjeja a wobohaćeja serbske ewangelske žiwjenje w swojich wosadach a gmejnach. To je Mato Krygaŕ, předsyda Serbskeho ewangelskeho towarstwa (SET), na hłownej zhromadźiznje cyłka wčera w Drěwcach podšmórnył.
Drěwcy (AK/SN). „Wosebje wuzběhnyć chcu spěwny wječor w Hodźiju a čitanje z Křesćanom Krawcom tohorunja tam, čitanski wječor z Trudlu Malinkowej w Rakecach, čitanje z Měranu Cušcynej, wožiwjenje drastoweje skupiny a kurs serbšćiny w Bukecach“, rjekny Krygaŕ w swojej rozprawje. Wuměnje nazhonjenjow słuži kóždolětna dźěłarnička Bjesadow. Lětsa bě wona w Hodźiju. Klětu budźe we Wojerowskej kónčinje.
Projektowa skupina je wot lěta 2019 intensiwnje nowe spěwarske „Zernička“ nadźěłała. Pod titlom „Nabožne spěwy za dźěći a młodźinu“ ma edicija kónc nowembra hotowa předležeć. Na adwentničce 4. decembra w Budyskej Michałskej cyrkwi chcedźa spěwarske prěni raz wužiwać.
Serbski „Štó budźe milionar“ jako prezencne zarjadowanje ...
Budyšin (JBo/SN). „Štó płaći jako załožer hornjoserbskeho ewangelskeho pismowstwa?“, „Hdy bu Serbski Sokoł prěni raz załoženy?“ abo „Za rólu w kotrym filmje spožčichu Gabrieli Mariji Šmajdźinej 2020 filmowe myto ,Lola‘?“. To su jenož někotre z wjace hač tysac hódančkow mjeztym hižo chětro znateje aplikacije „QuizSerb“. Tuta předleži w kategorijach literatura, domiznowěda, přisłowa a prajidma, mytologija a mnohich dalšich. Wuwiwało bě ju towarstwo „Serbska murja“. Skupinka jědnaće serbskich młodostnych bě so 2016 na Swětowym zetkanju młodźiny w Krakowje załožiło. Wot lětušeho septembra je samo móžno aplikaciju z přidatnej kategoriju tež w delnjoserbšćinje hrać. Młodostni runje w socialnych syćach na swoju aplikaciju skedźbnja z tym, zo tam cyłolětne „QuizSerb-wubědźowanje“ přewjedu. Tu serbskorěčni wobdźělnicy so w tym wuspytaja, na najwšelakoriše serbstwo potrjechjace prašenja wotmołwić. Najmudriše hłójčki w nowembrje mytuja.
Zhromadnje sej wulećeli
„Łužyca“ ma zaso bóle „łužiska“ być
Hač do kónca nowembra ma Domowina swojeho zastupjerja do noweje rozhłosoweje rady Rozhłósa Berlin-Braniborska (RBB) za dobu 2023–2027 wuzwolić resp. wobkrućić. Zastojnstwo je dotal Marcus Końcaŕ wukonjał.
Choćebuz (HA/SN). Zwjazkowe předsydstwo Domowiny bě rozsud župje Delnja Łužicy dowěriło. A tak je jeje předsydstwo na posedźenju minjenu wutoru w Choćebuskim Serbskim domje mějićela zastojnstwa Marcusa Końcarja znowa do tohole wažneho gremija wuzwoliło. Wón bě jenički kandidat. Nětko ma prezidij Domowiny personaliju hišće wobkrućić. Rozhłosowej radźe RBB přisłuša dohromady 30 zastupjerjow towaršnostneho žiwjenja z Braniborskeje a Berlina.
Pisać za lud a kaž lud – to bě Zejlerjowa dewiza
Žiwjenski skutk Łazowskeho fararja Handrija Zejlerja njezabyty wostanje. Wón hłuboko w ludźe korjeni. Z nim zahaji so serbska poezija, moderna serbska beletristika. To je prof. dr. Dietrich Šołta, bywši direktor Serbskeho instituta, sobotu na swjedźenskim zarjadowanju składnostnje 150. posmjertnin basnika we Łazowskej cyrkwi podšmórnył. Z twórbami Jana Pawoła Nagela kaž tež Handrija Zejlerja/Korle Awgusta Kocora je Serbski ludowy ansambl něhdźe połsta hosći zawjeselił.
Sorabičenjo na swojej kermušce nowačkow witali
Lipsk (JBo/SN). Serbske studentske towarstwo Sorabija Lipsk je wčera w klubowni internatneho domu při Arna Nitzschowej, w tak mjenowanej centrifuze, swoju kermušku woswjećiło. Kaž po tradiciji z wašnjom, su zdobom zaso nowačkow do swojeho cyłka přiwzali.
Lětsa běše jich cyłkownje dźesać. Mjez nimi běštaj tež stipendiatka z Pólskeje a stipendiat z Čěskeje, kotrajž wot nětčišeho semestra na Lipšćanskej uniwersiće studujetaj. Zo bychu so wšitcy nowačkojo bliže ze skutkowanjom Sorabije zeznajomili, spřihotowachu Sorabičenjo a Sorabičanki z wyšich semestrow wšelke stacije. Na nich wěnowachu so předewšěm stawiznam a skutkowanju towarstwa, kaž tež wažnosći hajenjow stykow k dalšim Lipšćanskim jědnatkowym radam. Nimo toho wuzběhnychu, kotre wažne zarjadowanja kóždeho sobustawa Sorabije w běhu lěta wočakuja. Zbližili běchu nowačkam tele informacije mjez druhim w formje wšelakich hrow, molowanskich nadawkow a kwisow.
We wólnym času za serbsku rěč a kulturu aktiwni
Na njedawnym mytowanskim zarjadowanju třěšneho zwjazka dźewjeć wosobam Čestne znamješko Domowiny spožčili
Prócowanje wo rěč a kulturu našeho ludu je aspekt, na kotryž při spožčenju Čestneho znamješka Domowiny přewšo dźiwaja. Móžnosće k tomu su wšelake, a tež perspektiwa, z kotrejež počesćeni jednaja, rozdźělniša być njemóže.
Statnik: „Čestnohamtske skutkowanje ze wšoserbskim wuznamom“
Mjena počesćenych z Mytom Domowiny kaž tež z Čestnym znamješkom Domowiny je mytowanski wuběrk Zwjazkoweho předsydstwa Domowiny w minjenych lětach stajnje bórze po swojich rozsudach wozjewił. Lětsa je zjawnosć je hakle krótko do mytowanskeho zarjadowanja zhoniła, kotrež wotmě so minjeny pjatk w Budyskim Serbskim domje. Myto Domowiny za dorost lětsa žane spožčili njejsu.
Budyšin (SN/at). Wuznamjenjenski akt krótko do róčnicy załoženja Domowiny je wuprajenje dźaka za wjelelětny wosobinski angažement w narodnym dźěle. A tón móže wjelestronski być, kaž su wobdźělnicy čestneho zarjadowanja na žurli Serbskeho domu nazhonili. „Čestnohamtske skutkowanje ze wšoserbskim wuznamom“ je lawreatam Myta Domowiny jeje předsyda Dawid Statnik wobkrućił.
