Budyšin (kl/SN). Namjety za Domowinske wuznamjenjenja je předsydstwo župy „Jan Arnošt Smoler“ Budyšin na swojim wčerawšim posedźenju rozjimało. Namołwja tuž wšitke skupiny a towarstwa župy, swoje namjety za wosoby, kotrež so nadměru za serbske narodne žiwjenje angažuja, hač do 30. junija zapodać. Rěčeli su wčera tež wo kandidatach, kotrychž měli za wólby serbskeje rady Sakskeje namjetować.

Po dobyću dweju mytow w Sakskim fondsu Čiń sobu dorozumi so župne předsydstwo wo prěnich krokach a předewzaćach za zwoprawdźenje. Jedyn projekt rěka „motiwator k wožiwjenju rěče w nakromnych kónčinach sydlenskeho ruma Serbow“. Tak budźe wosoba w kónčinje Budyskeje župy po puću, hdźež je so serbšćina ze wšědneho dnja nimale pozhubiła, kaž na wsach wokoło Malešec. Najwažniše tam je serbskorěčne poskitki wožiwić a zachować. Přinošować maja k tomu wšelakore zarjadowanja w regionje hromadźe z wobydlerjemi. Malešanski „Wódny muž“ chcedźa jako zarjadowanišćo wužiwać.

Předsydstwo je dale dźeń wotewrjenych duri 22. junija w domje Měrćina Nowaka w Njechornju dopřihotowało.

Martin (mkc/SN). Na iniciatiwu Maticy Slovenskeje běchu w lěće 2007 zahajili slěd słowjanskich kongresow. Słowakska Maćica pod nowym předsydu Marianom Gešperom bě minjeny tydźeń na 4. kongres přeprosyła, zdobom kruh wobdźělnikow rozšěriła a słowjanske institucije do njeho zapřijała. Zastupnicy z Bołharskeje, Słowjenskeje, Madźarskeje, Čorneje hory, Rumunskeje, Ukrainy, Čěskeje, Ruskeje, Łužicy kaž tež hosćićelskeho kraja Słowakskeje wuradźowachu wo swojich starosćach a rozmyslowachu wo tym, kak móhli w realnym procesu globalizacije, liberalizacije a nowych informaciskich technologijow zhromadne dźěło pohłubšić a sej mjez sobu pomhać.

Prěni króć zastupjena bě ruska uniwersita z Perma. Młoda docentka-bohemistka rozprawješe wo wužadanjach, ko­trež­ tam při podawanju čěšćiny studentam ze wšěch kóncow swěta nazhonja. Wulki zajim w njej zbudźi, zo móže serbšćinu wuknyć a ju přez internet z wose­bitym programom Budyskeho Rěčneho centruma WITAJ słyšeć.

„Łužyca“ je zajimcow na zjawnu diskusiju wo přichodźe delnjoserbšćiny přepro­syła. Najwažniši wuslědk wječora minjeny štwórtk w Choćebuskim měšćanskim domje je, zo trjebamy jasny koncept.

Choćebuz (HA/SN). Diskusija wo wuslědkach ewaluacije serbskeje wučby na braniborskich šulach a scyła wo přichodźe serbskeho šulstwa a serbskeje rěče w Delnjej Łužicy dale dźe. Po tym zo su so serbske institucije a Domowina z wuslědkami ewaluacije na njezjawnym zarjadowanju spočatk apryla zaběrali a serbske wučerki a serbscy wučerjo w meji wo nich internje rěčeli, je nětko tež redakcija delnjoserbskeho telewizijneho magacina Łužyca do wažneho dialoga zapřimnyła. Něhdźe 80 ludźi bě minjeny štwórtk přeprošenje magacina na zjawnu diskusiju wuslědkach ewaluacije serbskeje wučby na šulach Braniborskeje do Choćebuskeho měšćanskeho domu sćěhowało, mjez nimi tež mnozy chowancy Delnjoserbskeho gymnazija Choćebuz a jich starši.