Wjesne stawizny ju putaja
W redakciji Serbskich Nowin znajemy Alenku Hagerowu jako swěrnu wjesnu dopisowarku. Wona rozprawja wo tym, što so w Komorowje pola Rakec stawa a wo aktiwitach Domowinskeje skupiny Komorow-Rakecy-Trupin. Jako čłonka skupinskeho předsydstwa pak so wona jeničce na dopisowanje njekoncentruje, hdyž dźe wo wobraz Domowinskeje skupiny w zjawnosći. Tohodla je skupinsku internetnu stronu zapołožiła a so spušćomnje wo nju stara.
Skupinska předsydka Borbora Felberowa móhła nablaku dalše přičiny mjenować, čehodla je Zwjazkowe předsydstwo Domowiny Alenku Hagerowu spočatk oktobra z Čestnym znamješkom Domowiny wuznamjeniło. Jeje sobudźěło na nowych serbskich wustawkach, kotrež je Rakečanska gmejnska rada loni nalěto wobzamknyła, ani wjesnjanosta ani w skupinskim předsydstwje něchtó parować nochcył. „Alenka Hagerowa je so na wšěch tych rozmołwach z konstruktiwnymi namjetami wobdźělała“, rěkaše w lawdaciji. Tajke připóznaće na mytowanskim zarjadowanju w Serbskim domje přijimać, je Komorowčanku jara hnuło.
Kóždy hłós w interneće liči
Njebjelčicy (SN/at). Krabatowe towarstwo je za publikumowe myto Němskeho myta za angažement nominowane, a to hnydom we wjacorych kategorijach (SN informowachu). Rozsud padnje po puću online-wothłosowanja, kotrež traje hišće hač do 24. oktobra – potajkim hač do štwórtka za tydźeń – w interneće pod https://www.deutscher-engagamentpreis.de/publikumspreis. Nětko bychu so čłonojo Krabatoweho towarstwa wězo wjeselili, bychu-li wosebje w dwurěčnej Łužicy prawje wjele podpěraćelow měli.
Wšako je publikumowe myto lukratiwne, z mytowanskim pjenjezom 10 000 eurow zwjazane wuznamjenjenje. Loni bě Krabatowe towarstwo hižo Sakske wobydlerske myto w kategoriji towaršnostno-socialny angažement dobyło. W padźe wuspěcha chcyło towarstwo po słowach předsydy Reinera Deutschmanna dobyćerske pjenjezy za to wužiwać, zo bychu swójske skutkowanja w syći w dwurěčnej Łužicy rozšěrili.
Němske myto za angažement je třěšne myto za wobydlerski angažement. Nimo publikumoweho myta spožči jury dalše w pjeć kategorijach.
Wunošna rozmołwa we Wulkej Dubrawje
Kak móža so informacije wo našim ludźe do němskeje zjawnosće dóstać? Tele prašenje jimaše mnohich wobdźělnikow Serbskeho wječorka wčera we Wulkodubrawskim Šnajdrec kuchinskim domje.
Wulka Dubrawa (SN/at). Župa „Jan Arnošt Smoler“ je na swoje mjeztym třeće dialogowe zarjadowanje přeprosyła, zo bychu so Serbja, kotřiž bydla abo dźěłaja we Wulkodubrawskej gmejnje, ze zastupjerjemi Domowiny, Rady za serbske naležnosće a rady Załožby za serbski lud rozmołwjeli. Tam zwuraznjene mysle měrjachu so na njespokojnosće, njezamjelčachu pak tež pozitiwne wuwića. Wo tajkim rozprawješe na přikład Maria Bušina. Kubłarka w žłobiku „Dźěćaca kupa“ z někotrymi dźěćimi serbsce rěči; starši to chcedźa a nawodnica prócowanje tohorunja podpěruje. „W tym nastupanju je so w našim zarjadnišću něšto na dobre polěpšiło“, zwěsći wčera wjelelětna kubłarka. Tež domizniske towarstwo w Lichanju so zaměrnišo serbskim temam přiwobroća, kaž Marja Michałkowa wuzběhny.
Dźak a připóznaće za narodne dźěło
Za wysoke počesćenje, Myto Domowiny, namjetowany być, to budźi rozdźělne začuća. „Ja njejsym so při tym cyle derje čuła“, přizna Lubina Dučmanowa wčera tydźenja na mytowanskim zarjadowanju narodneje organizacije w Budyskim Serbskim domje. Wona bě nadawk přewzała, so w mjenje wšitkich z Mytom Domowiny, z Mytom Domowiny za dorost a z Čestnym znamješkom Domowiny wuznamjenjenych dźakować. Za kóždym počesćenjom steja njeličene hodźiny čestnohamtskeho angažementa. Chwile sej brać a sej wuwědomić, što je jednotliwc/jednotliwča za swoju Domowinsku skupinu, za župu abo towarstwo wukonjał/a, za to je tradicionalna swjatočnosć dźeń do załoženskeje róčnicy Domowiny prawy wokomik.
Angažement jednotliwca
Čěski Liberec přihódny cil był
Liberec (kl/SN). Zahajenje Serbskeho kulturneho lěta w Liberecu bě zdobom Domowinjanam Budyskeje župy „Jan Arnošt Smoler“ a Wojerowskeje župy „Handrij Zejler“ minjeny pjatk přihódny cil zhromadneje kubłanskeje jězby. 44 ludźi je připołdnju w sewjeročěskim měsće dojěło. Prěnja stacija bě w radnicy, hdźež je wyši měšćanosta Libereca Jaroslav Zámečník serbsku delegaciju z Łužicy přijał. Kaž hosćo w zhromadnej rozmołwje zhonichu, znaje wón naš lud wot časa, zo w euroregionje Nysa skutkuje.
Dalši programowy dypk bě jednej skupinje wopyt bliskeje noweje synagogi. Natwarili běchu ju w lětach 1995 do 2000 na městnje stareho, 1938 wot nacionalsocialistow zničeneho židowskeho Božeho domu. Dalša skupina wotkry sej město we wobłuku wodźenja.
Wjeršk kubłanskeje jězby pak bě, zo dožiwichu wšitcy jeje wobdźělnicy swjatočne zahajenje Serbskeho kulturneho lěta w awli Liberecskeje Techniskeje uniwersity, hdźež móžachu tež dalšich Serbow witać. Wječor pobychu Budyscy a Wojerowscy Domowinjenjo na předstajenju noweho oratorija „Hrodźišćo“.
Młoda kapała wobsteji dźesać lět
Minjeny kónc tydźenja bě ze zarjadowanjemi najwšelakorišeho razu kopaty napjelnjeny. Jedne z ryzy serbskich je tójšto ludźi do Chrósćic přiwabiło.
Chrósćicy (KJu/SN). Wjace hač 300 wopytowarjow dožiwi minjenu sobotu wječor prěnje nazymske reje za wšitke generacije župy „Michał Hórnik“ w Chróšćanskej wjacezaměroweje hali „Jednota“. Z podawkom woswjećichu zdobom dźesaćlětne wobstaće młodeje serbskeje kapały Con-takt. Skupinje přisłuša pjeć młodych serbskich hudźbnikow Bosćij Pawlik (basgitara a spěw), Michał Kokla (gitara a spěw), Syman Hejduška (bijadła a spěw), Jan Brězan (piano a spěw) kaž tež Józef Brězan (gitara a spěw). Con-takt piska mjeztym dźesać lět na serbskich zarjadowanjach a kwasach serbsku, ale tež mjezynarodnu rejwansku zabawnu hudźbu.
Myto zdobom namołwa
Župa Delnja Łužica
Towaršnosć za strukturnu změnu załožiła
Choćebuz (HA/SN). Hač do lěta 2021 dóstanje Delnja Łužica w zwisku ze strukturnej změnu 1,5 milionow eurow za spěchowanje wosebje imaterielneho serbskeho kulturneho namrěwstwa. Wobhospodarjeć budźe tele srědki powšitkownowužitna towaršnosć z womjezowanym rukowanjom (ptzwr) Delnja Łužica. Jeje hłowne towaršnicy su Domowinska župa Delnja Łužica, Serbski institut a Domizniski muzej Dešno.
Předsydstwo župy Delnja Łužica, kotrež bě tele postupowanje spočatk septembra namjetowało a wobzamknyło, je so na swojim wčerawšim wuradźowanju w Choćebuskim Serbskim domje hišće raz z tymle konstruktom zaběrało. Předsydstwu noweje ptzwr – tajki status ma tež Krabatowe towarstwo – přisłušeja tři wosoby, 1. a 2. jednaćel kaž tež prokurist. Mjenowane funkcije přewozmu zastupowacy jednaćel Domowiny Marcus Końcaŕ, projektowy sobudźěłaćer župy Delnja Łužica Frank Kosyk a župan Wylem Janhoefer. Jednaćelstwo towaršnosće čestnohamtsce skutkuje a dóstawa podpěru notara. Dwójce wob lěto wone župne předsydstwo wo swojim dźěle informuje.
Lětuši lawreaća Myta Domowiny
Budyšin (SN). Mjena lětušich lawreatow Myta Domowiny, Myta Domowiny za dorost kaž tež z Čestnym znamješkom Domowiny počesćenych je mytowanski wuběrk třěšneho zwjazka wčera wozjewił.
Swoje najwyše wuznamjenjenje spožči třěšny zwjazk prof. dr. Geraldej Stonej z Oxforda, Mikławšej Krawcej z Budyšina, Lubinje Dučmanowej ze Spal a skupinje serbskich duchownych z Delnjeje Łužicy, wobstejacej z Helmuta Hupaca, Dietera Schütta a Cyrila Pjecha.
Z Mytom Domowiny za dorost 2019 počesća předšulsku skupinu Witaj-pěstowarnje „K wódnemu mužej“ Malešecy a Józefa Brězana ze Smječkec.
Skutkowanje Alenki Hageroweje z Komorowa pola Rakec, Ursel Domašcyneje ze Slepoho, Jěwy-Marje Čornakec z Drježdźan, Michaela Biskopa z Dubrawki, dr. Susanny Hozyneje z Budyšina, Jadwigi Kawieckeje z pólskeho Namysłowa, Bernda Jurka z Dubjeho, Hansa Groby z Wojerec, Sonje Hrjehorjoweje ze Sulšec a Kerstin Liederoweje z Narća připóznaja z Čestnym znamješkom Domowiny.
Mytowanske zarjadowanje budźe 2. oktobra w Budyskim Serbskim domje.
