Fasety wuměłstwa, wšědnje
Nowy rjad zarjadowanjow z wuspěšnej a wužadowacej premjeru
Cyły tydźeń najwšelakorišeho wuměłstwa na wjacorych městnosćach a blečkach Budyšina – to bě „Farbtonale 2022“. Nowy rjad bu na iniciatiwu towarstwa Kamjentny dom załoženy a wot njeho srjedź julija prěni raz zhromadnje z partnerami, kaž na přikład ze Sakskim krajnym wustawom za priwatny rozhłós a nowe medije, z Jeleniogórskim Centrumom kultury a towarstwom Dźěłań dźeń, wuspěšnje zwoprawdźeny, za čož zasłuža sej akterojo kaž tež za kulisami skutkowacy hladajo na njesměrnu nałožowanu prócu wulku chwalbu. Program wopřijimaše mjez druhim přednošk „Instakunst – Kak socialne syće produkciju wuměłstwa wobwliwuja“, wernisaži „Pedagogojo w trojozynku“ a „Nawodźa lětnjeje akademije Budyskeho wuměłstwoweho towarstwa so předstajeja“ (SN rozprawjachu), koncerty a film. Drje najnjewšědniše zarjadowanje bě performance „Wuměłstwo w akciji“ na dworje Kamjentneho domu. Drježdźanjan Jens Besser a band Newmaker, tohorunja ze sakskeje stolicy, přihrawaštaj sej takrjec bule, reagujo mjez sobu na akustiske resp.
Předstawy wobydlerjow z kreatiwneho wida młodźiny
Budyšin (SN/bn). Dohromady 20 młodostnych a młodych dorosćenych w starobje 14 do 22 lět z partnerskeju městow Budyšin a Jelenia Góra resp. wokolnje wobeju bydlacych zdźěła a nazwučuje tele dny we wobłuku „digitalneje hudźbneje dźěłarnički“ zhromadny wuměłstwowy program „Kumšt zhromadnje žiwy być“. Za njón wuwiwaja a zwoprawdźeja po třoch skupinach hudźbu pod nawodom Johannesa Gerstengarby, Davida Branda a Andreasa Krampfa, z fachowču Elenu Pagel scenarij kaž tež wobrazy za animěrowane filmowe sekwency a pod nawodom Marie Jäger grafitije.
Zo bychu po móžnosći wobšěrny spektrum hesłu projekta wotpowědowacych aspektow wobkedźbować móhli, běchu mjez druhim minjenu póndźelu tak mjenowane błyskoswětłowe interviewy, potajkim spontane a krótke rozmołwy z wjacorymi Budyšankami a Budyšanami wo jich předstawach nastupajo „zhromadne žiwjenje“ wjedli. Wčera wobhladachu sej płoniny, kotrež su grafiti-wuměłcam legalnje přistupne a z kotrymi motiwami su tuchwilu wupyšene. Tohorunja wčera zahajichu hižo nahrawanja hudźby, kotraž ma filmčk wudospołnić.
Přez hudźbu so ze Serbami zeznał
Oliver Wilhelm Böhm so přeco hižo za hudźbu horješe. Dołhož dźěłaše 35lětny jako industrijny mechanikar a měrjenski technikar, so stajnje z myslu nošeše so raz tež powołansce ze swojim hobbyjom zaběrać. Spočatk junija so jemu přeće spjelni, jako započa jako zwukowy a jewišćowy technikar w Serbskim ludowym ansamblu dźěłać. „Sym jara zbožowny, zo sym dźěłowe městno w serbskej Łužicy namakał“, so Böhm wjeseli. Z tym ženje ličił njeje, wšako je w Lipsku wotrostł a hač do januara 2020 ani njewědźeše, štó Serbja scyła su. „Potom zeznach Mateja Dźisławka a Jurja Hantuša na małym koncerće w bydlenskej zhromadneho přećela w Lipsku“, so Böhm dopomni. „Zrozumichmy so hnydom derje a podachmy so po koncerće do Matejoweho bydlenja na mały zhromadny jam. Měsac pozdźišo stach so z nowym drummerom jeju band Skupina Astronawt.“
Zwjeselacy dóńt
Rěč, drastu a tradicijewe Wojerecach bóle zakótwić
Lětni serial SN
4. dźěl
Załožba za serbski lud je loni idejowe wubědźowanje „Rěč wjaza. Rěc zwězujo. Sorbisch verbindet.“ přewjedła. 27 projektow su z pjenježnym dobyćom w pjeć kategorijach 500 do 10 000 eurow mytowali. W našej lětnjej seriji předstajamy wubrane dobyćerske projekty, dźensa: „Regionalna pisanosć rěče, drasty a kultury su žórła serbskeje identity“.
„Nowe horiconty a poetiski sound“
Připosłucharjow znowa wobkuzłał
Koncert połny esprija z duchownym wočerstwjenjom
Budyšin. „Bjez hudźby je cyrkwinske žiwjenje a je tež liturgija cyrkwje zrudna naležnosć“, wopisuje cyrkwinski hudźbnik Tomaš Žur zmysł swojeho mnoholětneho powołanskeho skutkowanja na zawěrno wuznamnym městnje. W Baćonju běše wón we wučerskej swójbje wotrostł, w Lipsku studij z wuznamjenjenjom absolwował a 42 lět při katedrali swj. Jadwigi w Berlinje jako renoměrowany tachantski organist skutkujo tež mjezynarodnje so profilował. Jako wuměnkar je wón dale požadany a zdobom wužadowacy interpret. Jako brilantny hudźbnik zarjadowa so wón tež lětsa zaso w rjedźe Budyskeho pišćeloweho lěća w Tachantskej cyrkwi swj. Pětra na Eulowych pišćelach. Minjenu srjedu witaše jeho superintendent na wuměnku Jan Malink serbsce na městno, hdźež bu jako šuler SRWŠ wot tehdyšeho tachantskeho kantora Gerharda Nöbela na pišćelach dale wukubłany.
Najwjetše serbske strony na instagramje
Budyšin (SN/pdź). Něhdźe 500 milion ludźi je wšědnje w socialnej syći Instagram po puću. Tež mnoho, přewažnje młodych, Serbow so prawidłownje tam informuje a rozhladuje. Tuž njezadźiwa, zo ma nimale kóžda serbska skupina abo institucija tež Instagramowy account. Najwažniši kriterij za wuspěch tajkich stronow je ličba tych, kiž wobsahej stronow sćěhuja – tak mjenowani „followers“. Tute wšak poměrnje dokładnje wuprajeja, kelko ludźi z powěsćemi, kotrež na Instagramje šěriš, docpěwaš. Najwjetše tajke strony maja w Serbach wjace hač 1 000 followerow.
Tak na přikład Instagramowy account kampanje Sorbisch na klar. Něhdźe jónu wob tydźeń tu artikl wo zajimawym Serbje abo wo zajimawej skupinje, akciji abo podawiznje ze serbskim kontekstom wozjewja. Přewažnje pak w němskej rěči, wšako měri so kampanja na rozšěrjenje wědy wo Serbach w němskej ludnosći. Tak tež njezadźiwa, zo je wona strona z 1 918 followerami najwjetša mjez „serbskimi“ a ma samo módru hóčku. Z tutej Instagram signalizuje, zo jedna so wo za zjawnosć relewantnu instancu.
Wagony najnjewšědniše hrajnišća
Strawałd (SN/bn). „Skoki po času“ je hesło lětušeho festiwala šesćiměstow „Přińć a woteńć“. Lětsa chce jón Strawałdske (Strahwalde) spěchowanske towarstwo Přińć a woteńć pjaty króć z dohromady dwanaće zarjadowanjemi po zwučenym wašnju na cyłkownje dźesać hornjołužiskich jewišćach wuhotować. Zazběh twori „Muzikaliski festiwalny ćah“, kotryž pojědźe pjatk, 12. awgusta, w 15 hodź. ze Žitawskeho dwórnišća do Ojbina. We wagonach hudźa mjez druhim dujerski ansambl Capella de la Torre, čěski chór Cum Decore a awdiowizuelny performer Playpad Circus.
Dalše wjerški programa budu „Hrodowe koncerty“ w Hrodźišću, Krobnitzu a Kralowskim haju (Königshain) z klarinetistom Joãom Orecchiawom a celistom Tsepom Pooewom, „Pieśni o podróżach“ samsneju wuměłcow w Zgorzelecu a třidimensionalna zwukowa instalacija „Kaleidoskop rumow“ Fabiana Russa a Carla Grippy w Žitawje. Byrnjež so zarjadowarjo wo serbske přinoški prócowali, so jim lětsa njezešlachći wotpowědnych kooperaciskich partnerow nańć.
