To a tamne (14.02.25)
Kaž Jonas w bibliskich stawiznach: Wjelryba je 24lětneho čołmikarja na juhu Chile spóžrěła a sekundy po tym wuplunyła. Nan muža je njesłyšany podawk z mobilnym telefonom dokumentował. Čołmikarjej njebě spočatnje ani wědome, što so z nim stała. Jako bě w ćmowej tlamje ryby, mysleše na smjerć. Hakle pozdźišo sej situaciju prawje wuwědomi. Najebać to chce dale čołmikować.
Starc je we wobchodźe w Nossenje z pistolu w ruce zasadźenje policije zawinował. Swědcy běchu muža wobkedźbowali a zastojnikow wołali. Tući muža kontrolowachu. Při tym so wukopa, zo je 74lětny hrajkansku pistolu za wnučka kupił a hnydom wupruwował, hač nastroj z papjerjanymi šlebjerdkami woprawdźe praska. Pistolu móžeše starc wobchować. Zdobom pak jeho policisća powučichu, kak ma so z njej w zjawnosći zadźeržeć.
To a tamne (13.02.25)
Nimale 900 kilogramow kokaina je policija w mašinje namakała, kotruž běchu z Kolumbiskeje do Luxemburga přiwjezli. Wopojny jěd bě we walcach schowany, kotrež słužachu k rozkuskowanju kamjenjow. Hódnotu sćazaneho kokaina trochuja na 160 milionow eurow. Zo bychu pakćiki z walcow wućahnyć móhli, dyrbjachu mašinu kompletnje rozebrać. Policija je dweju podhladneju zajała.
Chrobły pad ćeknjenja po njezbožu policija w poruhrskim Herdecke přepytuje. Njeznaty bě na parkowanišću do druheho awta prasnył a na to cedlku zawostajił, tola jenož po zdaću. „Bohužel sym runje do wašeho awta zajěł. Pěšk pak je mje wobkedźbował. Tuž nětko tak činju, jako bych swoje daty zawostajił“, na papjerce steješe. Jako tróšt bě małe słónčko namolowane. Policija pyta nětko za swědkom, wo kotrymž njeznaty piše.
To a tamne (12.02.25)
Kedźbliwy pěšk je w přijimarni hódnotnych maćiznow w hornjej Bayerskej panteroweho chameleona ze styroporoweje tyzy wuchował. Zwěrjo z mjenom Lucifer běchu prawdźepodobnje strowotnych problemow dla wusadźili, fachowcy stacije za reptilije měnja. Muž bě škrabanje w tyzy słyšał a na kóčku tukał. Na to wuhladachu chameleona. Zwěrjo dyrbi nětko do karanteny. Wobsedźerjej hrozy pokuta ranjenja zakonja za škit zwěrjatow dla.
Wot junija minjeneho lěta w swětnišćowej staciji ISS čakacaj astronawtaj móžetaj so nětko snano tola prjedy na zemju wróćić hač myslene. NASA, swětnišćowy zarjada USA, je rozsudźił, zo bjeru za nawrót hižo raz wužiwanu kapslu typa „Dragon“. Poprawom chcychu čakać, doniž njeje nowa kapsla dotwarjena. To pak móhło trać. Trjebany nastroj steji porno tomu hižo w měrcu k dispoziciji.
To a tamne (11.02.25)
Mole w kamorach, winowych škleńcach a samo na zubnych šćětkach – porik we Wulkej Britaniskej je njelubu překwapjenku dožiwił, po tym zo bě sej chětro drohe bydlenje we wosobnej kónčinje na zapadźe britiskeje stolicy kupił. Nětko je sudnistwo rozsudźiło, zo dyrbja kupcam najwjetši dźěl wonych 39 milionow eurow wróćić. Předawar twjerdźeše, zo njeje ničo wo škódnikach wědźał. Sudnik widźeše to hinak.
Cigareta na dwórnišću w Hannoveru ma za 52lětneho prawniske sćěhi. Muž bě z dźěsćomaj w spěšniku ICE po puću do Berlina. Na dwórnišću kurješe wón cigaretu, jako ćah wotjědźe. Dźěći w starobje dźewjeć a jědnaće lět běštaj z wačokami w ćahu. Policija dźěsći w Magdeburgu přewza. Při přepytowanju kófrow namakachu 500 gramow cannabisa. Nětko přepytuja přećiwo mužej.
To a tamne (10.02.25)
Pod Nutellu hišće butru abo nic? Tute prašenje njeje zwjazkowemu kanclerej Olafej Scholzej scyła wažne. „Zwjetša scyła njesnědam“, wotmołwi politikar SPD na prašenje šulerja na zarjadowanju we wobłuku wólbneho boja w Ludwigsburgu. Z Nutellu Scholz tak a tak wjele započinać njemóže: Wot swojeho dwanateho žiwjenskeho lěta wón tule šokolodźanu pomazanku njewužiwa.
Snadny wothłós je njewšědna akcija wólbneho boja Berlinskeho politikarja Lasse Hansena (27) žnjała. Minjenu sobotu chcyše wón w hosćencu w stolicy tysac Cheesburgerow předać a sej za kóždy runje jedyn cent žadać. Planowany nawal kaž něhdy pola Lukasa Podolskyja w Kreuzbergu pak wuwosta: Po informacijach Hansena su 400 Cheesburgerow rozdawali. Reporterojo nowiny B.Z., kotřiž su wo kurioznej akciji rozprawjeć chcyli, tole wobkrućić njemóžachu.
To a tamne (07.02.25)
Za wodźidłom swojeho oldtimera je žona w Ludwigshafenje tčacy wostała, dokelž elektriske přestajenje sedła hižo njefungowaše. Sedło hodźeše so jenož hišće doprědka k wodźidłu sunyć, wróćo pak nic wjace. Tež wohnjowi wobornicy sej žaneje rady njewědźachu. Skónčnje wućahnychu wulke hydrawliske nožicy a žonu wuswobodźichu. Kelko škody su w drohim awće zawostajili, njeje znate.
Šlagrowy spěwar Heino je čestny hósć Semperoweho operoweho bala dźensa wječor w Drježdźanach. 86lětny njebě hišće ženje na tutym balu a so přewšo wjeseli, nowiny pisaja. Loni bě Heino hósć Wienskeho operoweho bala. Spěwać wšak zastupnik jakneho němskeho šlagra w Drježdźanach njebudźe. Za to pak wočakuja jeho w kruhu prominentnych na čerwjenym přestrjencu a na rozmołwje z čestnymi hosćimi.
To a tamne (06.02.25)
Januar 2025 bě po klimowej rozprawje najćopliši, kotryž su hdy naměrili. Globalna temperatura wučinješe 13,23 stopnjow a tak 1,75 stopnjow nad niwowom doindustrijneho časa, zdźěla słužba za klimowu změnu programa EU Copernicus w britiskim Readingu. „Januar bě dalši překwapjacy měsac a z rekordnymi temperaturami pokročuje, kotrež minjene lěta wobkedźbujemy“, zdźěli rěčnica centruma. Daty zběrali běchu satelity, łódźe, lětadła a wjedrarnje po wšěm swěće.
Ličba wobchadnych haćenjow na awtodróhach Němskeje je znowa přiběrała. W swojej bilancy za lěto 2024 naliči ADAC cyłkownje 516 000 haćenjow, 12 000 wjace hač lěto do toho. Haćenja trajachu cyłkownje 448 000 hodźin a so na 859 000 kilometrach rozpřestrěwachu. To je puć hač na měsačk a zaso wróćo. Hłowna přičina je přiběraca ličba awtow.
To a tamne (05.02.25)
Hač do grjekskeje stolicy Athena su wuskutki zemjerženja we wokolinje grjekskeje dowoloweje kupy Santorini pytnyć. Wobydlerjo wčera popołdnju wo střasenjach rozprawjachu, kotrež mějachu swoje wuchadźišćo w 230 kilometrow zdalenej mórskej kónčinje. Najmócniše rženje ze sylnosću „5“ slědźerjow w jich wěsćenju posylnja, zo připowědźa so wulke zemjerženje.
Nimale 20 000 wohroženych zwěrjatow wuchowali su policisća we wjacore tydźenje trajacej akciji přećiwo pašowarjam dźiwich zwěrjatow. Při tym su we 138 krajach a regionach 365 podhladnych zajeli. Zwěrjata dowjezechu do škitnych centrumow, doniž někotre zaso do jich domizny njedowjezu. Po informacijach Interpol su wjace hač 12 000 ptačkow, 5 000 nopawow a 18 wulkich dźiwich kóčkow wuswobodźili.
To a tamne (04.02.25)
Torty z kołbasy poskićuje Anna Burkhardt z Mannheima w swojim rěznistwje. 29lětna žona, kotraž pochadźa z Ruskeje, je 2019 do Němskeje přišła a dźěła ze swojim mandźelskim w swójbnym zawodźe. Nastała je ideja za njewšědnu kreaciju do kwasa, jako přejachu sej přećeljo něšto dospołnje njewšědneho. Tehdy zrodźichu „kołbasowu tortu“. Kupcy móža mjez 19 družinami kołbasy a pastetow wuběrać. Reakcije sahaja wot „wulkotnje“ hač k „nihdy nanihdy“.
Krokodile w přepławjenych bydlenskich kónčinach strachuja ludźi na sewjerowuchodźe Awstralskeje. W zwjazkowym staće Queensland mjez městomaj Townsville a Cairns je so minjene dny telko dešća našło kaž hewak w běhu poł lěta. Kónčina je mjez turistami woblubowana. Tam wotjědu łódźe na Great Barrier Reef. Ludźo su namołwjeni, jara kedźbliwi być.
To a tamne (03.02.25)
Jako Marilyn Monroe předrasćeni su wjacore sta ludźi njedaloko awstralskeho Adelaide do morja skočili, zo bychu pjenjezy za awstralski pomocny skutk za na raka schorjenych zběrali. Na zarjadowanje je so 765 ludźi přizjewiło. Lěta 1962 zemrěta bywša ikona Hollywooda je w Awstralskej jara popularna. Beneficne płuwanje běchu 2014 załožili. Akcija je dotal něhdźe 780 000 milionow eurow wunjesła.
Skupina štyrjoch pjanych je w delnjosakskim Oldenburgu taksi pokradnyła a awto zešrotowała. Šofer wjezeše tři žony a muža – wšitcy běchu wopići – do susodneho města, jako w taksiju zwada wudyri. Muž poča žony bić, na čož šofer zranjeny ćekny a policiju zawoła. Skupina jědźeše sama z awtom dale a zrazy do latarnje a do wobchadneho znamješka. Awto bě po tym dospołnje skóncowane. Policija přećiwo štyrjom wosobam přepytuje.
