To a tamne (03.01.25)
Hwězdźiny Kwadrantidow rozswětluja prěnje nocy noweho lěta, dźensa nas wjeršk toho wočakuje. Wid na njebjo pak móhł w dźělach Němskeje mróčelow a sněha dla zamućeny być. Změjemy-li zbožo budźemy hodźinsce něhdźe sto meteorow wobkedźbować móc. Tute nastawaja z kosmiskeje mróčele procha a zawostajeja dołhe slědy. Najlěpje su wopołnocy widźeć, hdyž hwězdno „Bootes“ na sewjerozapadźe snadnje nad horicontom steji.
Hobbyjowy paleontologa Thomas Freiberg je spočatk decembra při nahłym pobrjoze Baltiskeho morja pola Hohwacht blisko Kiela něhdźe 20 centimetrow wulkeho mortweho kalmara našoł a jeho konserwował. Družina kalmarow z krótkimi pjericami so poprawom w Baltiskim morju njejewi. Najskerje je so zwěrjo přez mórske prudy we hłubinje do sewjernych kónčin zabłudźiło.
To a tamne (02.01.25)
W Grjekskej a na Cypriskej su so kónc lěta „ćiche wohnjostroje“ zasadźili. Moderna pyrotechnika skići jónkrótne rakety ze wšěmi woblubowanymi efektami, ale bjez wobćežowanja hary tradicionalnych wohnjostrojow. W Athenje su nimo toho tež truty efekty na njebjo molowali. Kaž fachowcy zdźěla, bě zasadźena pyrotechnika wobswětej přichileniša hač dotal wužiwane wohnjostroje.
Přez eksploziju Cybertrucka předewzaća Tesla před hotelom Donalda Trumpa w Las Vegasu je jedyn čłowjek žiwjenje zhubił. Wjacore wosoby so zranichu. Eksplozija sta so srjedu rano, jako wodźer z awtom před hotelom pozasta a so tute naraz paleše. Zarjady přepytuja podhlada terora dla a pruwuja, hač eksistuje zwisk k nadpadej w měsće New Orleans. Hotel bu po podawku ewakuěrowany. Jězdźidło so dospołnje wupali.
To a tamne (30.12.24)
Lodowe škruty na Berlinskej telewizijnej wěži su zasadźenje policije zawinili. Z wěstotnych přičin su dźěle Alexandroweho naměsta pod wěžu zawrěli, po tym zo běchu wjacore škruty z wěže padnyli. Nichtó so njezrani. Zamołwitych wěže, znateho symbola Berlinskeje stolicy, su mjeztym informowali, policija zdźěla.
Swojorazneho zwěrjećeho paducha lepiła je policija w porynsko-westfalskim Niederfischbachu. Wobydlerjo běchu so z dowola nawróćili a dyrbjachu zwěsćić, zo běchu njeznaći bydlenje přeborkali a dospołnje zapusćili. Přiwołana policija po krótkim přepytowanju skućićela namaka – šupa. „Zakukleneho a čorne rukajcy nošaceho paducha“ zastojnicy hišće na městnje zwěsćichu. Zwěrjo přepodachu hajnikej, kiž šupa na swobodu pušći. Kak bě so tón zadobył, njewědźa.
To a tamne (23.12.24)
Prěnja w pěstowarni być chcyše štyrilětna holčka w Unna w Sewjerorynsko-Westfalskej. W nocy na njedźelu je so wona skradźu ze staršiskeho domu zminyła a k bliskej pěstowarni doběžała. Tam so wona před durje lehny a sej wusny. Susodka dźěćo wuhlada a policiju zawoła. Zastojnicy dowjezechu štyrilětnu domoj. Pěstowarnja je njedźelu zasadnje zawrjena a hodownych dnjow dla tak a tak hakle klětu zaso přistupna.
Bjezmała do morja padnyło je lětadło z 170 pasažěrami w Norwegskej. Mašina bě po přizemjenju na betonowej čarje dale jěła a jeno něšto metrow před morjom stejo wostała. Sylny wichor bě lětadło doprědka suwało. Nimo toho bě pista hładka. Ludźo w lětadle wuńdźechu ze stróželemi, wšitcy móžachu mašinu njezranjeni wopušćić. Mnohich šokowanych dyrbjachu psychologisce zastarać.
To a tamne (20.12.24)
Najebać wulku zahoritosć za Dubaisku šokolodu jewja so prěnje warnowace hłosy. W jednotliwych probach w laborach su zanjerodźenja, barby, alergeny a cuzy tuk namakali, strowotniske ministerstwo Badensko-Württembergskeje zdźěla. Ličba zanjerodźenych probow je drje snadna, wuslědki pak zamołwitych starosćeja. Nětko chcedźa Dubaisku šokolodu po wšěm kraju pruwować.
Gigantiski swětoznaty wohnjostroj w awstralskim Sydneyju je lětsa wohroženy. Přičina je hrožacy stawk železnicarjow silwester. Tež lětsa wočakuja zaso něhdźe milion wopytowarjow w pobrjóžnej metropoli, kotřiž chcedźa spektakl před kulisu sławneje Harbour Bridge a opery dožiwić. Ludźo přijědu z wulkeho dźěla z ćahom. Hrožaceho wobchadneho chaosa dla so zamołwići chutnje z myslu noša, wohnjostroj lětsa wotprajić.
To a tamne (19.12.24)
Hodowne žiwidła pokradnyli su paduši we wobchodźe w Drježdźanach. Kaž policija zdźěla, spakosćichu woni mjaso kački, kołbaski k praženju a čerwjene wino. Rubizna je něhdźe 250 eurow hódna. Dokelž njejsu paduši durje chłódźaka zaso začinili, dyrbjachu přistajeni žiwidła w hódnoće 800 eurow preč ćisnyć. Nimo toho wobškodźichu paduši wokno.
Wólby najrjeńšeje žony w Nižozemskej po 35 lětach skónča. Wubědźowanje njehodźi so hižo do noweho časa, su sej organizatorojo wěsći. Město miss-wólbow zarjaduja internetnu platformu wokoło psychiskeje strowoty, socialnych medijow a mnohotnosće. Nastała je myslička, miss-wólby wotstronić, na zjawnej diskusiji wo prašenju, čehodla towaršnosć přeco hišće mjeztym dawno zestarjene ideale wo rjanosći a towaršnostnych wočakowanjach na jednotliwca pěstuje.
To a tamne (18.12.24)
Šokoloda z Dubaja bywšemu moderatorej zabawnych zarjadowanjow Thomasej Gottschalkej njesłodźi. Tole je Gottschalk sćelakej RTL přeradźił. Showmaster njemóže cyły hermank wokoło šokolody scyła rozumić. Jemu běchu šokolodu z Dubaja darili. „Ta bě chětro hórka“, 74lětny rjekny. Šokolodu běchu z wušiknym wabjenjom w socialnych medijach jako nowy trend wuwili. Ludźo steja za šokoladu w dołhich rynkach před wobchodami.
Na njewšědne wašnje žiwjenje přisadźił je hajnik w USA w staće Virginia. Jeho partner bě mjedwjedźa zatřělił, kiž na wysokim štomje sedźeše. Smjertnje zranjene zwěrjo padny na 58lětneho hajnika, kiž pod štomom steješe, medije rozprawjeja. Po informacijach nowinarjow bě skupina hajnikow mjedwjedźa hižo dlěši čas přesćěhowała. Wustróžane zwěrjo je sej na to na štom wućeknyło.
To a tamne (17.12.24)
Wosom hodźiny zawrjena bě awtodróha A 72 pola Šwikawy do směra na Lipsk. Nakładne awto dróhoweje słužby bě wčera dopołdnja při rumowanju nadróžneho twarnišća ze swojim kranom železny móst z nastrojemi za wotličenje popłatka nakładnych awtow potorhnyło. Při tym so šofer awta a dalši dźěłaćer zraništaj. Wěcna škoda wučinja 755 000 eurow.
Wulki chaos načinja w italskich wulkoměstach nowa winowatosć za wužiwarjow elektriskich rolerow, nahłownik nosyć. Policija je minjeny kónc tydźenja prěnje chłostanki 50 eurow rozdźěliła. Ludźo skorža, zo njebuchu informowani, wosebje turisća. Wupožčowarjo jězdźidłow starosća so wo swój wobchodny model. Knježerstwo chce z naprawami ličbu smjertnych woporow we wobchadźe znižić. Štóž za wodźidłom awta telefonuje, płaći wotnětka znajmjeńša 250 eurow.
To a tamne (16.12.24)
Wosamoćeny kófer na Kölnskich dohodownych wikach je so jako njestrašny wukopał. Policija namaka w nim jenož pěsk. Do toho běchu wčera adwentne wiki na Synowych wikach w Kölnje ewakuowali a wšu kónčinu zaraćili. Hižo sobotu dyrbjachu adwentne wiki na Kölnskim Rudolfowym naměsće podhladneho kófra dla ewakuować. Tež w nim namakachu jenož pěsk. Policija wšak nima žane zrozumjenje za tajke žorty.
Kuriozne misnjenje na jednej z Erfurtskich šulow: Wobydler wołaše policiju, po tym zo bě paduchow z retlemi w ruce wuhladał, kotřiž so na šulu měrjachu. Jako zastojnicy přijědźechu, paduši ani njećeknychu, ale so policistow zadźiwani prašachu, što wot nich chcedźa. Pozdatni paduši běchu sobudźěłaćerjo rjedźenskeje firmy a retle běchu chošća.
To a tamne (13.12.24)
Wjace hač 3,5 milionow eurow nazběrał je José Careras we wobłuku swojeje mjeztym 30. telewizijneje gale na dobro ludźi, kotřiž su na leukemiju schorjeli. „Sym přemóženy a jara dźakowny za trajacu podpěru darićelow. Na prěnim zarjadowanju 1995 njebych sej zwažił, wo tym sonić“, rjekny 78lětny operowy spěwar k wuslědkej akcije w Lipsku, kotryž sćelak MDR wusyłaše. Loni běchu po tutym puću 3,3 miliony eurow nazběrali.
Mysteriozne truty na njebju wuchodneho pobrjoha USA nuzuja Běły dom we Washingtonje k oficialnemu stejišću. „Nimamy žane dopokazy, zo su informacije wo wobkedźbowanych lětacych objektach za wěstotu USA wohrožowace“, rjekny direktor za komunikaciju Běłho domu John Kirby. Swědkojo rozprawjeja stajnje zaso wo wulkich potajnych trutach na nócnym njebju.
