Krótkopowěsće (03.01.25)
Clemens chce 100 šulow wopytać
Drježdźany. Nowy sakski kubłanski minister Conrad Clemens (CDU) chce nowe lěto z turu po šulach zahajić. W běhu 100 dnjow chce wón 100 kubłanišćow wopytać a so na městnje wo mnohostronskej šulskej krajinje informować, zdźěli nětko kultusowe ministerstwo w Drježdźanach. Clemens chce z nawodami šulow, wučerjemi, zastupjerjemi staršich a šulerjemi wo aktualnych wužadanjach rěčeć.
Wjace ludźi bjez dźěła
Budyšin. We wobwodźe Budyskeje agentury za dźěło, kotremuž Budyski a Zhorjelski wokrjes přisłušatej, bě loni w decembru 19 943 bjezdźěłnych přizjewjenych. To je porno předchadźacemu měsacej 166 wosobow (0,8 procentow) wjace. Porno decembrej lěta 2023 je to 204 wosobow wjace. Kwota bjezdźěłnosće je na 7,3 procenty stupała. Před lětom wučinješe kwota 7,2 procentow.
Šćedriwy dar wopomnišću
Krótkopowěsće (02.01.25)
Getrud Wincarjowa zemrěła
Čorny Chołmc. Dołholětna wjesnjanostka a wjesna předstejićerka Čorneho Chołmca je minjenu njedźelu w starobje 84 lět zemrěła. W lěće 1991 bě wona krótki čas zapósłanča CDU w sakskim krajnym sejmje. W Čornym Chołmcu je wona wjele zeskutkowniła. Na jeje iniciatiwu je we wsy Krabatowy młyn nastał. W nowembrje lěta 2016 dósta wona za swój čestnohamtski angažement zasłužbny rjad Zwjazka.
Mike Hauschild nominowany
Budyšin. Swobodni wolerjo Budyskeho wokrjesneho zjednoćenstwa su swojeho kandidata za wólbny wokrjes 155/Budyšin 1 wolili. Čłon Budyskeje měšćanskeje rady, radźićel Budyskeje wokrjesneje rady a samostatny rjemjeslniski mišter Mike Hauschild budźe zaměry a hódnoty Swobodnych wolerjow we wólbnym boju wo sydło w zwjazkowym sejmje zastupować.
Dóstanu wjace mzdy
Krótkopowěsće (30.12.24)
Komuny we wuwzaćnym stawje
Drježdźany. Města a gmejny w Swobodnym staće maja po informacijach Sakskeho zwjazka městow a gmejnow (SSG) prěni raz dźěru w etaće, kotraž dohromady wjace hač jednu miliardu eurow wučinja. Komuny su we wuwzaćnym stawje, SSG tele dny zdźěli. Mjeztym zo dochody dawkow inflacije dla njepřiběraja, wudawki dale stupaja.
Žane nowe pady zwěsćili
Drježdźany. W Sakskej njejsu fachowcy w minjenych štyrjoch měsacach žadyn nowy pad afriskeje swinjaceje mrětwy zwěsćili. Naprawy přećiwo wupřestrěću mrětwy su tuž wuspěšne, zdźěli nětko sakske socialne ministerstwo. Předewšěm na sewjeru Budyskeho wokrjesa běchu wjele aktiwnych padow. W Budyskim a Zhorjelskim wokrjesu pak zawěranske pasma dale wobsteja.
Knižnu „archu“ přepodali
Krótkopowěsće (23.12.24)
Michel a Herbst na čole
Drježdźany/Kamjenica. Łužiska zapósłanča SPD w zwjazkowym sejmje Kathrin Michel je načolna kandidatka swojeje strony w Sakskej w dočasnych wólbach. Delegaća su Michel, kotraž je tež krajna předsydka strony, z 85 procentami hłosow na prěnje městno krajneje lisćiny wolili. Jako načolny kandidat FDP w Sakskej bu kónc tydźenja Torsten Herbst woleny, kiž je parlamentariski jednaćel.
Dróha z nowym mjenom
Tšupc. Na česć regionalneho nałožka bu w Tšupcu puć mjez tamnišim busowym zastanišćom Tšupc najs a Cyrkwinskej předwčerawšim oficialnje na Zapustowa gaska/Fastnachtsgässchen přemjenowany. Iniciator je Zapustowe towarstwo Tšupc, kotrež chce z akciju na „nałožk skedźbnić, kotryž so hižo 200 lět w Delnjej Łužicy pěstuje“. Přemjenowanje twori „zazběh jubileja“, kotryž ma so klětu „z kopicu zarjadowanjow woswjećić“.
Ponowjenu cyrkej wotewrěli
Krótkopowěsće (20.12.24)
Město kołu přistupi
Choćebuz. Město Choćebuz je wot noweho lěta sobustaw Łužiskeho koła. Zastupjerjo měšćanskeje rady hłosowachu zawčerawšim za přistup města do zhromadneho zwjazka komunow. Kaž Choćebuski wyši měšćanosta Tobias Schick zwurazni, je město lokomotiwa změny strukturow a tuž běše přistup logiska konsekwenca. Łužiskemu kołu budźe wot 1. januara 57 komunow přisłušeć.
Płaćizny znowa stupali
Kamjenc. Twarić je w Sakskej dźeń a dróše. Hladajo na loni je indeks twarskich płaćiznow za bydlenske domy wo 3,3 proc. stupał, zdźěli wčera krajny statistiski zarjad Kamjenc. Hižo loni zwěsćichu statistikarjo rozrost wo 10,5 proc. Předewšěm je wutwar domu droha naležnosć.
Serbske powěsće z pomocu KI
Krótkopowěsće (19.12.24)
Jednanja wobkrućili
Zhorjelc. Kaž z rešeršow sćelaka MDR Investigativ wuchadźa, mějićel Zhorjelskeje twornje Alstom hižo měsacy z brónjenskim koncernom KNDS jedna. Tole je Alstom nětko samo wobkrućił. Detaile hišće žane znate njejsu. Po informacijach MDR pak chcedźa tam mjez druhim dźěle za pancer typa Boxer zhotowić.
Dalši móst zawrjeny
Großenhain. Po pruwowanju mosta B101 na juhu Großenhaina we wokrjesu Mišno, je twar wotnětka za wobchad zawrjeny. Nětko tam krótkodobnje spotorhanje mosta přihotuja, zdźěli krajny zarjad za dróhotwar. Z toho potrjechene su šoferojo jězdźidłow a zwisk Němskeje železnicy mjez Drježdźanami a Berlinom. Po tym, zo je so Drježdźanski Caroliny móst sypnył, fachowcy w Swobodnym staće mosty přepruwuja.
„Ludowědne“ kachle wuchowali
Krótkopowěsće (18.12.24)
Liča z haćenjemi
Zhorjelc. Twarnišća w tunlu pod Limasom a wjele wobchada do směra Pólskeje wokoło hód dla warnuje Zhorjelska policajska direkcija tele dny před haćenjemi na zwjazkowej awtodróze A4. Policija so hižo na wosebitu situaciju hotuje. Jelizo budźe potrjeba, chce techniski pomocny skutk zastojnikow podpěrać. Předewšěm wot jutřišeho do 23. decembra do směra Pólskeje kaž tež 2. do 5. januara do směra Drježdźany maja šoferojo z haćenjemi ličić.
Mjenje ludźi přichadźało
Kamjenc. Ličba ludźi, kotraž je z wukraja do Sakskeje přišła, je so loni trochu znižiła. Předewšěm mjenje migrantow z Ukrainje dla, sakski statistiski zarjad wčera w Kamjencu zdźěli. Cyłkownje je loni 76 005 ludźi z wukraja do Swobodneho stata přichadźało. Runočasnje wupućowaše 41 239 wosobow do wukraja.
Planuja hižo nowotwar mosta
Krótkopowěsće (17.12.24)
Za wjace sporta w pěstowarnjach
Budyšin/Miłoćicy. Budyski wokrjesny sportowy zwjazk a Křesćansko-socialny kubłanski skutk (CSB) ze sydłom w Miłoćicach stej kooperaciske zrěčenje podpisałoj. Jimaj dźe wo to, sport a pohib w kubłanišćach spěchować. K tomu słušeja sportowe zarjadowanja a kursy za pedagogiski personal. CSB wobhospodarja mjez Wojerecami a Pančicami-Kukowom dohromady dźesać pěstowarnjow.
Přihoty za festiwal po planje
Hochoza. Posedźenje přihotowanskeho wuběrka Domowiny za 15. mjezynarodny folklorny festiwal Łužica wčera w Hochozy je wujewiło, zo su tamniši partnerojo třěšnemu zwjazkej nadal poboku. Jeničce dwór bywšeho wjesnjanosty Fryca Wojta njeje „strowotnych přičin dla“ klětu pódla. Tuchwilu pytaja za alternatiwu, maja pak „hižo nuzowu wariantu“, kaž Pětr Brězan z wuběrka wuzběhny.
Hospodu škitać?
Krótkopowěsće (16.12.24)
Serbja do wučbnych planow
Berlin. Konferenca kultusowych ministrow, mjeńšinowa rada štyrjoch awtochtonych mjeńšin Němskeje a zwjazkowa rada za delnjoněmčinu su pjatk zhromadne poručenje zwjazkowym krajam wobzamkli. Wone njech we wučbnych planach šulerjam informacije wo danskej mjeńšinje, friziskej ludowej skupinje, Sintach a Romach, serbskim ludźe a delnjoněmsce rěčacych sposrědkuja.
Radlubin přetwarja
Ralbicy. Drježdźansko-Mišnjanske biskopstwo je nowotwarej wosadnicy „Radlubin“ přizwolił. Wosadni zhonja tole we wozjewjenjach. Dalše informacije dóstanu woni přichodny pjatk, hdźež ma so twarski projekt předstajić. Wosadnica Ralbičanskeje fary je po spisowaćelu a duchownym Mikławš Bjedrich Radlubin pomjenowana, kotryž bě tam tež farar wosady.
Nawrótnik k wólbam nastupi
Krótkopowěsće (13.12.24)
Čitansku turneju přewjedli
Budyšin. Dźěćacy časopis Płomjo je wčera čitansku turneju na třoch šulach přewjedł. W pjatych a šestych lětnikach wyšeju šulow we Worklecach a Kulowje kaž tež na Budyskim Serbskim gymnaziju awtor Měrćin Wjenk z powědkow čitaše. Nimo toho Jadwiga Dyrlichowa z Rěčneho centruma WITAJ dźěło lektorki předstaji, a redaktor Płomjenja Pětr Šołta so z šulerjemi wo pisanju a čitanju rozmołwješe.
Móst wostanje dale zawrjeny
Bad Schandau. Město Drježdźany je wčera na wuprajenje měšćanosty za twarstwo Stephana Kühna reagowało. Wón je potwjerdźił, zo móže so móst w Bad Schandauje bórze zaso wužiwać. Kaž nětko rěka, drje so tole jenož na łódźe poćahuje a nic na wobchad. Hdy móhli zaso jězdźidła po mosće jěć, dale jasne njeje.
Wabja z tuńšim ćěriwom
