Naležnosć so přiwótřa
Na wurjadnym posedźenju chcedźa so radźićeljo z „Krónu“ zaběrać
Budyšin (CK/SN). Tydźeń po tym, zo bě Budyska měšćanska rada rozsudźiła, wo kupje „Króny“ dale jednać, je wyši měšćanosta Alexander Ahrens (SPD) přećiwo tomu weto zapodał. Dwaceći radźićelow chce wo kupje dale jednać, jědnaćo su přećiwo tomu. Swoje znapřećiwjenje wobkrući wyši měšćanosta z přeńdźenjom přećiwo sakskemu komunalnemu porjadej. Njeje spóznajomne, za kotry zaměr ma so twarjenje kupić. Nimo toho pjenjezy za to ani lětsa ani klětu zaplanowane njejsu. „Měnju, zo je wobzamknjenje njeprawniske a na škodu města Budyšina“, Ahrens zwurazni.
Za dalše jednanja wo „Krónu“ zasadźeja so frakcije CDU, FDP, Wobydlerski zwjazk BBB a bjezfrakciski zapósłanc Zelenych. Měnjenja wo tym, kak ma so teren měšćanskeje hale a parkowanišća wužiwać, pak su rozdźělne. Po wuprajenju Utty Winzer, rěčnicy wobydlerskeje iniciatiwy za zachowanje „Króny“, by po posudku wužiwanje na dalše 20 lět móžne było. Financować hodźała so kup z dochodow z parkowanišća a ze spěchowanskimi srědkami Europskeje unije.
Filet wosrjedź města
Přećiwo Udej Wićazej hižo njepřepytuja
Zhorjelc/Budyšin (SN/at). Přepytowanske jednanje přećiwo Udej Wićazej, naměstnikej Budyskeho krajneho rady, je zastajene. Wo tym informowaše wčera Zhorjelske statne rěčnistwo. Jemu je wo to šło, hač wobkruća so podhlad zranjenja słužbneho potajnstwa w zwisku z korespondencu Uda Wićaza na Facebooku z mužom NPD Marcom Wruckom loni w awgusće. Statne rěčnistwo „njemóžeše wobwinowanemu wumjetowany njeskutk z tej wěstotu dopokazać, kotraž je za wobskóržbu trěbna“.
Přepytowanja su wunjesli, zo njeje zastupowacy krajny rada, tež hdyž by słužbne potajnstwo přeradźił, bjez wusprawnjenja jednał. Wone wukopachu wozjewjeny zaměr, ze zdźělenki swědkej wo wotsunjenju potrjecheneho k deeskalaciji přinošować. Tych přičin dla, tak piše statne rěčnistwo, „njewobsteji tež žane wohroženje wažnych zjawnych zajimow přez zastupowaceho krajneho radu“.
Krótkopowěsće (08.05.18)
„Naša Domowina digitalnje“
Budyšin. Prěnje čisło informaciskeho łopjena „Naša Domowina digitalnje“ je dźensa wušło. Kaž Domowinski zarjad zdźěla, posrědkuja nowy poskitk zajimcam z mejlku, zdobom móžeš jón na webstronje Domowiny čitać. Pojednanej stej tam temje kaž 70. róčnica schwalenja prěnjeho serbskeho zakonja a hłowna zhromadźizna Maćicy Serbskeje. Hišće w meji ma dalše čisło wuńć.
Granatu namakali
Sernjany. W nowotwarskej bydlenskej štwórći na kromje Sernjan su twarscy dźěłaćerjo, kotřiž tam ležownosće wotkrywaja, při hłubokotwarskich dźěłach granatu namakali. Přiwołana policija městnosć zawěsći. Fachowcy za rumowanje rozbuchliny z Drježdźan strašnu namakanku wotwjezechu. Při tym njeje k žanym komplikacijam dóšło.
Zhorjelski zawod njezawru
Porěči wo měšćanskim prawje
Budyšin. Heiner Lück, profesor za prawniske wědomosće uniwersity HalleWittenberg a čłon Sakskeje akademije wědomosćow, přednošuje jutře, wutoru, w 19 hodź. w Budyskej měšćanskej bibliotece wo symbolach měšćanskeho prawa a wo sudnistwje w měsće. W swojim přednošku zaběra so wón ze zapřijećom sudnistwa a wobswětla na jara žiwe a zabawne wašnje wuske zwiski mjez sudnistwom a městom. Zastup je darmotny. Zajimcy su wutrobnje witani.
Spominaja na wuswobodźenje
Wojerecy. Při wopomnišću we Wojerowskim nowym měsće wotměje so jutře, wutoru, w 13 hodź. zhromadne zarjadowanje města a Zwjazka antifašistow składnostnje dnja wuswobodźenja wot fašizma. Tam chcedźa na wopory wójny a antifašistiskeho spjećowanja spominać. „Zasadźujemy so za swět bjez wójny, rasizma, antisemitizma a neofašizma“, rěka w namołwje wyšeho měšćanosty Stefana Skory (CDU). Wobydlerjo njech so w bohatej ličbje na wopominanju wobdźěla.
Na jubileju muskeho chóra bywšeho nawodu witali
Muski chór z Hornjeje Hórki je tele dny składnostnje swojeho 50lětneho wobstaća swjedźenski koncert wuhotował. Ze swojej dirigentku Mariku Matthes-Hartmann zahajichu jón w Hornjohórčanskej wjacezaměrowej hali zhromadnje z Budyskim dujerskim orchestrom. Moderator Jürgen Hänel witaše jako čestneho hosća 93lětneho bywšeho orchestroweho nawodu Wernera Frenzela z Laatzena pola Hannovera. Werner Frenzel pochadźa z Lejna, wjesneho dźěla Hornjeje Hórki, a je 38 lět Budyski młodźinski dujerski orchester nawjedował a za njón njeličomne aranžementy spisał. Hänel postrowi tohorunja wutrobnje wjesnjana-wučerja Hilmara Urbana, kiž běše prěni dirigent jubilejneho cyłka a je jón 30 lět nawjedował. Z něhdźe 250 přichwatanymi hosćimi bě žurla hač na poslednje městno wobsadźena.
Policija (07.05.18)
40 ludow pčołkow pokradnyli
Kromola. Při kontroli swojich pčołkow w Kromoli dyrbješe pčołar minjeny pjatk popołdnju zwěsćić, zo běchu jemu njeznaći z kromy rěpikoweho pola na wšěch 40 pčolacych ludow pokradnyli. Po wšěm zdaću sta so to w času wot 29. apryla hač do minjeneho pjatka. Na te wašnje je pčołar wjace hač milion pčołkow zhubił. Policija tuka na to, zo běchu paduši profije, kotřiž wědźa, kak maš z pčołkami wobchadźeć. Runje nalěto tajke pady přiběraja. Potrjecheny wobsedźer trochuje škodu na něhdźe 5 000 eurow. Wón pak njeje jenički, kiž pod tymle padustwom ćerpi. Ratarjo wokolnych polow so nětko strachuja, zo so pobrachowace pčołki na žně wuskutkuja.
Z motorskim do přirowa
Pěskecy. Ćežko zranił je so minjeny pjatk popołdnju młodostny na dróze mjez Smjerdźacej a Němskimi Pazlicami. W dołhej lěwej křiwicy blisko Pěskec zhubi 16lětny kontrolu nad swojim motorskim typa KTM 125 a zajědźe z nim do přirowa. Při tym so ćežko zrani. Wěcna škoda na motorskim wučinja po informacijach Zhorjelskeje policajskeje direkcije něhdźe 500 eurow.
Chcedźa tójšto twarić a ponowić
Chrósćicy (JK/SN). Poslednje podłožki pola Budyskeho krajnoradneho zarjada je Chróšćanska gmejna minjeny tydźeń zapodała, zo by spěchowanske srědki za přetwar stareje šule na gmejnski zarjad dóstała. Twarske dźěła chcedźa po słowach wjesnjanosty Marka Klimana (CDU) na zašłym posedźenju gmejnskeje rady hakle nazymu zahajić. Potom liča z tym, zo změja twarske firmy swobodne kapacity a zo budu snano tež płaćizny wo něšto přijomniše. Zo so spěchowanske srědki přizwola, je wulka nadźija Chróšćanow. Dotal běchu za tajke přede- wzaća srědki wokrjesa abo wšelakich spěchowanskich programow stajnje při- zwolili. Tak změjetej gmejna a planowanski běrow dosć časa, wotpowědne dźěła wupisać a nadawki přepodać.
Nowe jězdźidło wobornikam
Nětko maja lěpše wuměnjenja za technisku pomoc a hašenje
Ralbicy (aha/SN). Dawno wočakowany dźeń dožiwi sobotu 26 aktiwnych kameradow Ralbičanskeje wohnjoweje wobory. Falk Lehmann ze zawoda Magirus w Ulmje přepoda jim symbolisce kluč za nowe, tam po jich předstawach twarjene wohnjowoborne jězdźidło typa IVECO.
Mjeztym 15 lět steji Achim Měrćink na čole Ralbičanskeje wobory, wot 2009 ma wón runočasnje zamołwitosć za ně- hdźe 120 kameradow wšěch pjeć woborow delanskeje gmejny. W přitomnosći wokrjesneho hašenskeho mištra Manfreda Pethrana, předsydy zarjadniskeho zwjazka Při Klóšterskej wodźe Měrka Domaški, wjesnjanosty gmejny RalbicyRóžant Hubertusa Ryćerja (CDU), Ralbičanskeje wjesneje předstejićerki Hany Krawcoweje a wšěch nawodow woborow zarjadniskeho zwjazka dźakowaše so Měrćink za wulkomyslnu podpěru gmejny a wysoke hódnoćenje čestnohamtskeje dźěławosće kameradow.
Krótkopowěsće (07.05.18)
Podpěra šulerskim nowinam
Drježdźany. Sakske kultusowe ministerstwo podpěruje nowozałožene šulerske nowiny. Mjez nimi je tež „Přestawka“ Serbskeje wyšeje šule Budyšin. W cyłku spěchuje Sakska lětsa dźesać projektow z hač do 250 eurami. Tak zaruna zličbowanki mjez druhim za papjeru a techniske wuhotowanje, kaž su to foto- abo diktowanski aparat, hard- a software.
Altekrüger so přesadźił
Baršć. Krajny rada wokrjesa Sprjewja-Nysa, Harald Altekrüger (CDU) je so wčera w rozsudnym kole wólbow za tele zastojnstwo přesadźił. Po dotalnym wuslědku dósta wón 60,8 procentow hłosow. Kandidat AfD Steffen Kubitzki nažnja 39,2 procentaj. Tak njeje AfD swój zaměr docpěła, w jednym z wokrjesow Braniborskeje krajneho radu stajić. Wólbne wobdźělenje wučinješe 39,4 procenty.
Mało Čechow w Němskej dźěła
