Bulwar na Cyrkwinskej hasy
Cityjowy management prócuje so wo atraktiwniše stare město
Wojerecy (AK/SN). Z wosom projektami chcedźa Wojerecy lětsa swoje stare město atraktiwniše sčinić. „Za to mamy etat 50 000 eurow“, rozłoži architektka Dorit Baumeister na wčerawšim posedźenju měšćanskeje rady. Hromadźe z Frankom Graumüllerom wona we wobłuku cityjoweho managementa projekty přewodźuje. Su to zarjadowanje „Staroměšćanske kuzło“ wot 1. do 3. junija, dźiwadło we wobydlerskim centrumje Piwarska haska 1, testowy wobchod, wozelenjenje hrodu, wuhotowanje Teschenskich wikow a parkowanišća za kolesa při Janskej cyrkwi kaž tež projektaj „Aktiwne wukładne wokno“ Röthigec předawarnje zakuskow a „Bulwar Cyrkwinska hasa“.
W treningowym lěhwje pobyli
Dwuskokowa reja wopřijima dwaj skokaj w jednym pohibje. Čłonojo Smjerdźečanskeje rejwanskeje skupiny hnydom cyłu reju z tym pjelnja a su ju kaž tež tamne naročne reje njedawno w Čěskej nastudowali a wufilowali. Pjatk popołdnju podachu so z busom, w kotrymž chowachu so mjez rejwarjemi tež tójšto rekwizitow, do čěskeho Janova nad Nisou. Pod nawodom Dietera Wendischa započinachu hnydom po wječeri z prěnjej pót ćěrjacej probu.
Wosebite wjeselo mějachu młodźi rejwarjo při sćoplenju. Při tym zaklinčachu mjenujcy spěwy Měrćina Weclicha, štož wubudźi dobru naladu, byrnjež jara napinace było. Sobotu rano hnydom po snědani startowachu do dalšeho treningoweho dnja, kotryž traješe hač do pózdnjeho wječora. Wječork dachu hišće zhromadnje wuklinčeć a tež tam wězo rejwachu a zhromadnje spěwachu. Treningowe lěhwo bě idealny přihot na nowu rejwansku sezonu, za kotruž je tójšto wustupow planowanych. Tak doleća sej Smjerdźečenjo mjez druhim na festiwal do dalokeho Peru. Chětro wučerpani, ale přewšo spokojni z wuslědkom lěhwa so wšitcy do domizny nawróćichu.
Zwón při putniskej łuce kaž nowy
Policija (25.04.18)
Nimale so dótknyłoj
Budyšin. Lědma chutnje brał je dotal njeznaty šofer zawčerawšim rano na awtodróze A 4 při wotbóčce Budyšin-wuchod wěstotny wotstawk k před nim jěducym awtam. Wón tak smaleše, zo so jeho storkawa nimale teje před nim jěduceho dótkny. Agresiwneho zadźerženja dla čuješe so 29lětna wodźerka awta nuzowana a přizjewi tole policiji. Tež dalši šoferojo běchu potrjecheni. Pokiwy přijimuja pod telefonowym čisłom 03591/ 36 70.
Z wuslědkom hońtwy spokojom
Ralbicy (JK/SN). Wo tójšto lěpša hač loni běše bilanca hajnikow na njedawnej zhromadźiznje Ralbičanskeho hońtwjerskeho drustwa. Sydom sornow, šěsć dańkow, dwanaće dźiwich swini, sydom liškow a tež šupaj stejachu na lisćinje delanskich hońtwjerjow. Zo ma wjelk na hišće lěpšim wunošku hońtwjerskeje zaběry wěstu winu, njemóža hońtwjerjo tak jednorje zamjelčeć. Prezenca šěreho rubježnika wuskutkuje so na wotběh lětneho a wšědneho cyklusa tamnišeje dźiwiny. Diskusija wo nim pak wosta w Ralbicach wěcowna a z hońtwjerskeho wida fairna.
Dotalni třo hajnicy, kotřiž su jako hońtwjerske zjednoćenstwo hońtwu na 341 hektarach Ralbičanskeho drustwa wotnajeli, přepodachu hońtwjersku zamołwitosć do rukow młodych Ralbičanow. To předsydu drustwa Bjarnata Brězana wosebje zwjesela. Serbski dorost njetyje jenož drustwu, ale wožiwja zdobom drustwowe a towaršnostne žiwjenje w Delanach. Je to tohorunja pokazka na to, zo so młodźi ludźo za přirodu a jeje wobhospodarjenje zajimuja.
Něhdźe 30 ludźi je minjenu sobotu sćěhowało namołwu ...
Krótkopowěsće (25.04.18)
Harig kandidaturu wobkrućił
Budyšin. Budyski krajny rada Michael Harig (CDU) kandiduje dale za zastojnstwo prezidenta wuchodoněmskeho zwjazka lutowarnjow (OSV). To wobkrući wón najebać wčerawše wozjewjenje, zo namjetuja komunalne načolne zwjazki Sakskeje, Saksko-Anhaltskeje, Braniborskeje a Mecklenburgsko-Předpomorskeje Lipšćanskeho wyšeho měšćanostu Burkharda Junga (SPD) za tule funkciju.
Zajim za stejnišćo Siemens
Zhorjelc. Lübeckske předewzaće za medicinsku techniku Euroimmun ma zajim stejnišćo koncerna Siemens w Zhorjelcu přewzać. Nimo ležownosće na Lutherowej chce mějićel Euroimmun Winfried Stöcker tež hale a sobudźěłaćerjow krok po kroku přewzać, zdźěli wón wčera němskej powěsćerni dpa.
Filipinjenjo do Čěskeje
W mnohich naležnosćach je po puću
W interneće předstaji so Gerat Róbl ze Smjerdźaceje jako financny hospodar. Jako generalny zastupjer znateje zawěsćernje zasłuža sej swój wšědny chlěb. Komunikaciju z klientami poskićuje wuraznje serbsce a němsce. Rady skutkuje tohorunja jako braška. Tola hišće šěršo znaty, a to předewšěm w słowjanskim wukraju, je wón dla swojeho njewšědneho socialneho angažementa. Serbšćina je jemu kluč za durje k někotrymžkuli wutrobam.
Město syrotkow zelenina
Při Michałskej cyrkwi rostu nětko najwšelakoriše kerki a zela
Budyšin (UM/SN). To drje starodawna Michałska cyrkej, jedyn z najwuznamnišich symbolow Budyšina, hišće dožiwiła njeje. Něhdźe 15 pilnych žonow a muži bě minjenu sobotu z motyčku, łopatu a krjepjawu na łuce při cyrkwi při dźěle. Tam wotnjesechu najprjedy dorn, nasypachu pěsk a roztřěskane drjewo a nasadźachu najwšelakoriše kerki. W krótkim času změni so proste zelenišćo na pisanu rjadku. Hdyž budu za něšto měsacow janske jahody, aronija a kosmački zrałe, móža sej je Budyšenjo słodźeć dać. Na dalšej płoninje budu sej ludźo potom zela kaž rosmarin, lěwančik, babydušku a želbiju sami šćipać a za sebje wužiwać móc. Na te wašnje stanje so Budyšin „město k jědźi“.
Policija (24.04.18)
We wsy kóncowali
Trjebin. Po wšěm zdaću přewjele chwile mějachu njeznaći w nocy na njedźelu w Trjebinje. Tam ćehnjechu woni po wsy a kóncowachu, štož runje wuhladachu. Wjacori wobydlerjo tole njedźelu rano policiji přizjewichu. Tak skóncowachu skućićeljo wjacore listowe kašćiki, wuzběhnychu gulijowe wěka, powalichu wobchadne znamjo a wobškodźichu wabjensku taflu. Wěcna škoda pohibuje so po informacijach Zhorjelskeje policajskeje direkcije w třicyfrowym wobłuku. Kriminalna słužba Běłowodźanskeho policajskeho rewěra pad bliže přepytuje.
