Spěšnišo hač wočakowane
Budyšin (CK/SN). W Hornjej Łužicy bě w aprylu 20 084 žonow a muži bjez dźěła. To je 1 428 mjenje hač měsac do toho. Kaž šef Budyskeje agentury za dźěło Thomas Berndt praji, je bjezdźěłnosć samo spěšnišo woteběrała hač wočakowane. To je wuskutk nowonastatych dźěłowych městnow, po połojcy pak tež wuskutk demografiskeho wuwića. Mjeztym zo je kwota bjezdźěłnosće w Radebergskim a Kamjenskim regionje pod štyrjomi procentami, štož po měnjenju fachowcow połnemu dźěłu wotpowěduje, wostanje wona w Zhorjelcu z dwanaće procentami a wulkim wotstawkom dale na wysokim niwowje konstantna.
Prěni raz so zhromadnje předstajili
Wjace hač 5 000 ludźi je minjenu sobotu w Stróži nalětnje přirodowe wiki wopytało. Nalětnje njebě při tym jenož wjedro, ale tajke běchu tež najwšelakoriše poskitki wikowarjow.
Po 65 lětach maja zaso meju
Młode swójby w Dobrošicach nalětni nałožk wuspěšnje wozrodźili
Dobrošicy (aha/SN). Na mnohich městnach su zawčerawšim chodojty palili. Štóž je tu abo tam pozastał, móžeše dobru wjesnu zhromadnosć při wjesołej naledźe dožiwić. Tuta tohorunja knježeše, jako su do toho meje stajeli. We Łazku, Worklecach a w Konjecach pak ju cuzy hižo w prěnjej nocy podrězachu. Worklečenjo wšak swoju hnydom zaso stajichu a sej za to nowy wěnc wupožčichu, dokelž běchu skućićeljo tamny sobu wzali. Zhoniwši zo maja winikow we Wotrowje pytać, je sej Worklečanski šulski hólčec – jeho wowka a dźěd staj we Wotrowje doma – wěnc z wuspěchom wróćo žadał.
W Dobrošicach tohorunja chodojty palachu. Tam so wjeselachu, zo su wo- srjedź wsy při kapałce po 65 lětach zaso meju stajili. Starši Dobroščenjo, wosebje wottam pochadźaca 90lětna Hórčanka Hańža Štrawbina, so dopomina, zo su tam stajnje nałožk hajili, a to hač do lěta 1936. 1948 su tehdyši młodźi Dobroščenjo – wšitke holcy w narodnej drasće – zaso meju stajeli a mjetali. Ale ličba młodych ludźi woteběraše. 1953 bě tomu posledni króć, zo tam meju stajachu.
W Choćebuzu kolesa přesadźowali
Lěpje mjenje, hač ničo
Krótkopowěsće (02.05.18)
Dobyćerjow mytowali
Budyšin. Na prěnim finalu lětušeho, wot Wokrjesneje nalutowarnje Budyšin zarjadowaneho dorostoweho wubědźowanja „Lampenfieber“ je jury minjenu sobotu w Kamjentnym domje přinoški w segmenće „Woko“ hódnoćiła a najlěpše tři z pokalemi, wopismami a pjenježnymi dobropisami mytowała. Prěnje městno zdoby sej Budyska dźěćaca skupina „Kreatiwne paslenje“ z kolažu „Měr je ...“.
NSLDź na zetkanju dźiwadłow
Drježdźany. Němsko-Serbske ludowe dźiwadło wobdźěli so na 10. zetkanju sakskich dźiwadłow w Drježdźanach. Wot dźensnišeho hač do njedźele pokazuja tam dohromady 13 jewišćow aktualne inscenacije. Budyscy hrajerjo předstaja hru „Der Fall der Götter“. Ramikowy program skića mjez druhim podijowu diskusiju „Dźiwadło a digitalne“.
Na róčnicu spominali
Policija (30.04.18)
Motorski smjertnje znjezbožił
Biskopicy. Tragiski wukónc měješe wčera dopołdnja jězba 53lětneho muža na statnej dróze S 120 pola Biskopic. Ze swojim motorskim typa Kawasaki zajědźe wón w lěwej křiwicy na prawy bok jězdnje a zhubi kontrolu nad swojej mašinu. Při tym so wón tak ćežko zrani, zo hišće na městnje njezboža wudycha.
Při jězoru hašeć dyrbjeli
Wojerecy. Runje sobotu popołdnju, jako mnozy doma rjane wjedro wužiwachu, wołachu wohnjowych wobornikow wokoło Wojerec k hašenju. Při Šibojskim jězoru so na płoninje něhdźe jednoho hektara lěsna póda paleše. Dohromady wosom jězdźidłow wokolnych woborow bě zasadźene. Nětko pruwuja, hač je něchtó woheń zamiškrił abo hač měješe to hinaše přičiny.
Pokradnjene awto lepili
Budyšin. Na awtodróze A 4 mjez Budyšinom a Zhorjelcom lepichu policisća sobotu připołnju awto typa Mercedes, kotrež bu dźeń do toho w Goslaru pokradnjene. 29lětneho pólskeho šofera nachwilnje zajachu a pozdźišo do přepyto- wanskeje jatby tyknychu.
Zetkaja so w stolicy
Berlin. Přichodne Serbske blido w Berlinje budźe štwórtk, 3. meje, w 16 hodź. w hosćencu EINSTEIN KAFFEE na Friedrichowej 206. Štóž ma lóšt a chwile, so na měsačnych zetkanjach wobdźěleć, zo by maćeršćinu w cuzbje hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć.
Do gratownje pohladnyć
Budyšin. Kaž kóžde lěto přeprošuje Budyska wohnjowa wobora tež jutře, 1. meje, na dźeń wotewrjenych duri do swojeje gratownje w Strowotnej studni. Wot 10 hodź. móža sej zajimcy tam techniku wobhladać a na 25 metrow wysoku treningowu wěžu zalězć. W 10.30 hodź. demonstruja hašenje wohenja w kuchni, w 11 hodź. prezentuje so młodźinska wobora. K wobjedu poskićuja hrochowu poliwku z pólneje kuchnje.
Na knižnu premjeru
Budyšin. W Ludowym nakładnistwje Domowina wušła kniha „Row w serbskej holi“ změje štwórtk, 3. meje, w 19.30 hodź. premjeru w Budyskej Smolerjec kniharni. Trudla Malinkowa je wudała znate powědančko Marje Kubašec serbsce, němsce a pólsce. Stawiznarka wěnuje so w knize tohorunja stawizniskim pozadkam powědančka.
Wažne zasadźenja zmištrował
Wjelelětny nawoda Kulowskeje wohnjoweje wobory Jurij Brösan je za čas swojeho skutkowanja wjele dožiwił. Nětko je swoje zastojnstwo do młódšich rukow přepodał.
Kulow (AK/SN). Hilbert Schultz z Kulowa je nowy nawoda wohnjoweje wobory za město Kulow a wokolne wsy. Jeho naměstnik je Thomas Werner. Wobeju je měšćanosta Markus Posch (CDU) na zašłym posedźenju měšćanskeje rady w Koćinje na pjeć lět do jeju zastojnstwow powołał. Runočasnje so wón wjelelětnemu nawodźe wobornikow Jurjej Brösanej za jeho skutkowanje dźakowaše.
Wohnjowoborny plan schwalili
Pěskecy (JK/SN). Po třoch lětach přihotow a wjacorych diskusijach ma Njebjelčanska gmejna nětko płaćiwy plan wohnjoškitneje potrjeby. Tón předstaji na zašłym posedźenju gmejnskeje rady w gratowni Pěskečanskeje wohnjoweje wobo- ry nawoda gmejnskeje wohnjoweje wobory Křesćan Matka. Při tym wěnowaše so wosebje tuchwilnemu stawej a połoženju woborow w komunje.
