Policija (09.04.18)
Drogi připadnje namakali
Ottendorf-Okrilla. Druhdy policiji tež komisar připad pomha, kriminelne delikty zwěsćić. Tak wołachu zastojnikow sobotu rano do Ottendorfa-Okrille. Tam chcyše 20lětny muž swoju 21lětnu partnerku ze zhromadneho bydlenja wuzamknyć a ju při tym zrani. Mjeztym zo spytachu policisća situaciju změrować, napadny jim nachribjetnik muža. W nim bě 60 gramow marihuany we wjacorych małych titkach zapakowane.
Wopłóčki centralnje wotwodźeć
Trjebin (AK/SN). Wot wotbagrowanja hižo njepotrjecheny Trjebink ma so centralnej wopłóčkowej syći přizamknyć. Gmejna Trjebin so prócuje, wjes Slepjanskej centralnej kanalizaciji přiwjazać. To je gmejnska rada na swojim zašłym posedźenju wobzamkła. Njeplanowane wudawki we wobjimje 77 000 eurow za naprawu chcedźa z přidatnymi dochodami z lońšeho přemysłoweho dawka financować.
„Wopłóčkowy projekt w Trjebinku dotal w hospodarskim planje Trjebinskeje gmejny zapisany njebě. Komuna hospodari z dwójnym etatom 2017 a 2018“, rozłoži nawoda twarskeho wotrjada Slepjanskeho zarjadniskeho zjednoćenstwa Steffen Seidlich. Mjeztym je so koncern LEAG w swojim 30. měrca 2017 wozjewjenym nowym rewěrowym koncepće wotbagrowanja Trjebinka wzdał. Loni w awgusće su radźićeljo zasadnje wobzamkli, zo ma so wopłóčkowa syć kłasć. Nětko je rozsudźene, kak to zwoprawdźa.
Pytaja mjeno za žrěbjo
Wojerecy (SN). Wosebita přičina k wjeselu knježeše jutrowničku na Wojerowskej dźěćacej a młodźinskej farmje, kotraž je w nošerstwje Křesćansko-socialneho kubłanskeho skutka. Tam je kobła Bampi žrěbjo porodźiła. Strowe a čiłe steji wone w konjencu a čaka na to, zo móže won na pastwu. Žrěbjo nětko wjacore měsacy na dźěćacej a młodźinskej farmje wostanje, prjedy hač dowjezu je k wobsedźerjej na Wendtec jěchanski dwór do Brunowa. Wostanje-li wjedro dale stabilne a jeli skótny lěkar k tomu swoje haj da, móžetej Bampi a jeje žrěbjo bórze na pastwu, hdźež móža jej zajimcy wopytać.
Wsy měrliwje „wurubili“
Historiski pochod kaž před 400 lětami po serbskich wsach
Nuknica (SN/MWj). Mjez Kamjencom a Nuknicu so wobydlerjo sobotu njemało dźiwachu, jako tam skupina wjace hač 20 ludźi w historiskej uniformje a drasće nimo ćehnješe. Mužojo mějachu dołhe hlebije při sebi, žony ćehnjechu rěblowane wozyčki. Kamjenske towarstwo hornjołužiskich landsknechtow bě organizowało historiski pochod, kaž běchu je 1639 wotměli. Tehdy jednotki šwedskeho wójska tohorunja po Łužicy ćehnjechu, wurubjejo serbske wsy.
Socialne poradźowanje
Firmowanje tež serbsce wudźělał
Plan wosebitosćam přiměrić
Kaž wšitke tamne gmejny zarjadniskeho zwjazka Při Klóšterskej wodźe maja tež Chrósćicy nastajić plan wohnjoškitneje potrjeby. Za komunu je to wužadanje.
Chrósćicy (JK/SN). Plan wohnjoškitneje potrjeby je wuměnjenje a zdobom zakład, zo wokrjes Budyšin komuny při spjelnjenju wohnjoškitnych nadawkow podpěruje. Na zakładźe tajkeho plana wudawa wokrjes tež klučowe inwesticiske připokazanki. Z nimi maja gmejny zaručić swoje winowatostne nadawki, ke kotrymž tež wohnjoškitne naprawy słušeja. Z planom je wotwidźeć, hdźe su ćežišća nastupajo materielne kaž tež personelne problemy, kotrež móhli so na konkretne wohnjoškitne naprawy w gmejnach wuskutkować.
Za tolerancu z druhimi
„Na nami zaleži, hač wšitko wostanje, kaž je. Na nami zaleži, hač so něšto změni w dźensnišim swěće.“ Pod tymle hesłom přewjedu zajutřišim, srjedu, we Wojerecach a wokolinje „Dźeń a nóc za tolerancu“.
Wojerecy (SN/MiR). Citat ewangelskeje fararki Hannelory Frank je městu Wojerecam zawjazk, sadźeć akcenty za rozmyslowanje a za móžnosće zetkanja. Tak wotměja srjedu w dźewjeć institucijach a zarjadnišćach w měsće a wokolinje zarjadowanja zaběrace so ze zhromadnosću, z wotewrjenosću, respektom a přećiwo njepřećelskosći napřećo cuzym. Město Wojerecy ma wosebitej dźeń a nóc tolerancy, kotrejž wot lěta 2013 wobstajnje přewjeduje, za hódne zarjadowanje we wobłuku swjatočnosćow k 750. róčnicy wobstaća města.
Krótkopowěsće (09.04.18)
Pjate protestne pućowanje
Rowno. We wobłuku wčerawšeho protestneho pućowanja wot Slepoho do Rownoho žadaše sej 120 wobdźělnikow, zo měli wot brunicowych jamow potrjecheni w přichodnej wuhlowej komisiji zwjazkoweho knježerstwa sobu skutkować. K akciji namołwiło je iniciatiwne zwjazkarstwo „Strukturnu změnu nětko – žane Wochozy II“. Přewjedli pak su tež přećiwnu demonstraciju.
Nowowudaće powědančka
Budyšin. Najskerje najznaćiše powědančko Marje Kubašec „Row w serbskej holi“ je w Ludowym nakładnistwje Domowina znowa wušło. Kapsna kniha wobsahuje stawiznu w serbskim originalu kaž tež přełožkaj w němčinje a pólšćinje. Nimo toho wopřijima wědomostny nastawk Trudle Malinkoweje, kotryž historiske pozadki podawizny wobswětla.
Premiju za zatřělene swinje
