Wot zawčerawšeho hač do dźensnišeho přebywaše pjeć holcow 6. a ...
Krótkopowěsće (23.03.18)
Zakładny zakoń wudospołnić
Kiel. Južnoschleswigski wolerski zwjazk (SSW) je w Schleswigsko-Holsteinskej namjet za iniciatiwu Zwjazkoweje rady zapodał, zo bychu mjeńšinowy škit do Zakładneho zakonja přiwzali. Mjeńšinowy sekretariat w Berlinje wo tym informuje. W dobje separatizma a etniskich konfliktow w Europje by to sylny signal był, rjekny předsyda SSW w krajnym sejmje Lars Harms.
„Zmij“ na festiwalu zastupjeny
Lipsk. Hižo wjackróć wuznamjenjeny krótkofilm „Zmij“ wobdźěli so na najwjetšim krótkofilmowym festiwalu srjedźneje Němskeje „Kurzsuechtig“ 13. apryla w Lipsku. Pask Wojerowčanki Angele Šusteroweje su mjez druhim w Ćisku a Židźinom nahrawali. Serbskorěčny pask z němskimi podtitulemi jedna wo serbskosći za čas nacijow. Teksty rěči Celina Šołćic z delnich Sulšec.
Zapis kołćow wozjewili
Wokoło spjateho jězora
Budyšin. Składnostnje dnja wody wuhotuje sakske zarjadnistwo rěčnych zawěrow njedźelu, 25. měrca, při Budyskim spjatym jězoru dźeń wotewrjenych duri. Wot 10 do 17 hodź. móža zajimcy tam wokoło jězora nóžkować abo kolesować. Za to poskićeja dwě čarje. Krótša je sydom kilometrow dołha a za pěškow a swójby z mjeńšimi dźěćimi myslena. Tamna čara wokoło cyłeho jězora je něhdźe 20 kilometrow dołha. Start a cil stej při běrowowym twarjenju při spjatej muri w Delnjej Hórce. Štóž při jednotliwych stacijach wšitke kołki zezběra, za toho změja w cilu překwapjenku.
Rozjimuja wólbu rěče
Policija (22.03.18)
Šofer policiji twochnył
Budyšin. W nocy na srjedu je w Budyšinje wodźer Opela ze swojim awtom před policiju ćěkał a zastojnikam skónčnje twochnył. Jězdźidło bě hižo lěto wotzjewjene. Te wotstaji wón skónčnje při pólnym puću a je so w ćmě zhubił.
Z rěčnym kućikom a filmom
Sprjewine město je swój internetny wustup dospołnje ponowiło
Budyšin (SN/MWj). Měšćanski internetny portal www.bautzen.de ma nětko dospołnje nowe mjezwočo. Wot zawčerawšeho je wón wužiwarjam kompjuterow, ale tež smartphonow přistupny.
Nimale dwě lěće je wot wupisanja nadawka hač k hotowemu wuslědkej trało. Ćim bóle so Budyski wyši měšćanosta Alexander Ahrens (SPD) na nowinarskej rozmołwje wjeseleše, što bu w tym času nadźěłane. Technisce zwoprawdźiła je nowe strony Drježdźanska wabjenska agentura Marung & Bähr. „Je jednorišo nowe strony zestajeć, hač wšitke wobsahi wobstejacych stron analyzować, aktualizować, přełožić a wothłosować“, Gunter Bähr z agentury rozłoži.
Dokumenty a fota z ćežkeho časa
Njeswačidło (ML/SN). Nowinska rozprawa z Budyskeho wokrjesa wo wólbach němskeho Reichstaga 5. měrca 1933 wita wopytowarjow wosebiteje wustajeńcy „Wučby z lětow 1933 do 1945 – mortwi a žiwi napominaja: Nihdy hižo žanu wójnu a žane namócne knjejstwo“ w Njeswačanskim domizniskim muzeju. Z přehlada wotedatych hłosow zhoniš, zo bě wjetšina wolerjow tehdy nacistisku stronu NSDAP woliła. W Njeswačidle dósta wona 62 procentow hłosow, w susodnym Šešowje samo 82 procentow. Pjatnaćo nakřižikowachu tam na wólbnej lisćinje stronu KPD a sydom SPD. Hačrunjež wukonješe Hitler hižo dlěje hač měsac krute mócnarstwo, dóstaštej SPD a KPD we Wulkej Dubrawje hišće wjace hač połojcu hłosow.
Žitne wiki nimale dopřepytowane
Zhorjelske statne rěčnistwo měješe w lěće 2017 zaso chětro wulki wobjim kriminality wobdźěłać. Zwjetša jednaše so wo chutne naležnosće, w někotrych padach pak tež wo skurilne.
Zhorjelc (UM/SN). Najwjetši dźěl jednanjow we wobłuku přepytowanja podawkow na Budyskich Žitnych wikach je Zhorjelske statne rěčnistwo wotzamknyło. „Ze stawom 9. měrca mějachmy 131 jednanjow. Sydom z nich móžachmy z wusudom a 14 přez chłostanski přikaz skónčić“, rozprawješe wyši statny rěčnik Sebastian Matthieu zawčerawšim na nowinarskej rozmołwje. Dźesać wobskóržbow je hišće wotewrjenych. Najwjetši dźěl jednanjow – něhdźe 75 procentow – je statne rěčnistwo zastajiło. „To awtomatisce njewoznamjenja, zo za tym ničo njetči. Často su jednanja přetorhnyli, dokelž běchu podhladni hinaše a ćeše delikty skućili“, rozłoži wyši statny rěčnik Till Neumann. Něhdźe 60 procentow skućićelow běchu němscy staćenjo, 40 procentow wukrajnicy.
Dobre namjety młodźiny
Budyšin (SN/bn). Na mjeztym štwórtej młodźinskej idejowej konferency w Budyskim Kamjentym domje wobdźěli so wčera něhdźe 60 šulerjow a studentow z wokrjesa Budyšin. Přitomni běchu nimo toho hosćo ze Zhorjelca kaž tež socialni dźěłaćerjo, sobudźěłaćerka Rěčneho centruma WITAJ, zastupjerjo měšćanskeje rady, Budyski wyši měšćanosta Alexander Ahrens (SPD) a twarska měšćanostka sprjewineho města Juliane Naumann.
Alexander Ahrens witaše wobdźělnikow a wuzběhny, zo je měšćanska rada „zhromadnje z Budyskej bydlenjotwarskej towaršnosću spočatne financowanje za młodźinski centrum na Kurta Pchalekowej nimale jednohłósnje schwaliła“.
Krótkopowěsće (22.03.18)
Nowosće ze Serbskeho muzeja
Budyšin. „Nastajej wuši – Pój, zeznaj muzej znowa ...“. Pod tymle hesłom je Budyski Serbski muzej zdźěłał nowy dźěćacy awdiopřewodnik. Sakska projekt z wosebitych srědkow spěchuje. Sobotu popołdnju wot třoch chcedźa jón prěni króć w muzeju zjawnje předstajić. Skupina Łužičanka a paslenska dźěłarnička ze Šćěpanom Hanušom ma nowince zabawny ramik spožčić.
Měrkowčan mjez najlěpšimi
Weimar. 25 a zdobom najwjetšu móžnu ličbu dypkow docpě Mattheo Hórnik z Měrkowa minjenu sobotu na krajnym wubědźowanju Durinskeje „Młodźina hudźi“. Wón wobdźěli so tuž w meji na zwjazkowym wubědźowanju „Młodźina hudźi“ w Lübecku. 14lětny je šuler Weimarskeho hudźbneho gymnazija Schloss Belvedere a wuknje tam wirtuoznje na koncertnej gitarje hrać.
Finale olympiady fyziki
Policija (21.03.18)
Strašna wotbóčka
Błohašecy. Stajnje zaso wołaja policiju k njezbožam na statnej dróze S 106 při wotbóčce na S 100 pola Błohašec. Najnowši tajki pad sta so tam wčera dopołdnja. 59lětny wodźer Audija chcyše nalěwo wotbočić, njewobkedźbowaše pak předjězbu napřećo přijěduceho 54lětneho wodźerja Škody. Při zražce so wobaj zraništaj. Škoda na jězdźidłomaj wučinja dohromady 10 000 eurow.
Wopity z kolesom jěł
Kamjenc. 32lětny muž je zawčerawšim popołdnju kusk jara hłuboko do piwoweje škleńcy hladał a so po tym na koleso sydnył. Krótko do 15 hodź. jědźeše wón na Halštrowskej dróze w Kamjencu policajskej kontroli runjewon do rukow. Zastojnikam jeho mócna „chorhojčka“ wězo napadny, a woni naměrichu 1,9 promilow alkohola w jeho kreji. Młody muž změje so tuž nětko wopiłstwa w nadróžnym wobchadźe dla před sudnistwom zamołwić.
