Nowačkow přizjewić
Tež w nowym Miłorazu kehelować
Planuja solarny park
Wobswětowe zwjazki kritizuja zasah do ratarskich płonin
Hodźij (CK/SN). Wot julija chce inwestor w Žičenju solarny park twarić. 1,77 hektarow wulku płoninu direktnje pódla železniskich kolijow zapadnje wsy při přemysłownišću při dwórnišću wón wot lońšeho wotnaja. Nastajić chce tam 2 600 modulow z wukonom dohromady 750 kilowattow. Wot septembra ma připrawa milinu produkować. Zo bychu za to twarske prawo wutworili, zdźěłachu tak mjenowany předewzaćowy twarski plan a su jón zjawnje wupołožili. Wobydlerjo žane pokiwy abo kritiki njepřednjesechu. Ze 26 naprašowanych nošerjow zjawnych zajimow pjeć žane znapřećiwjenja njeměješe. Z kritikami tamnych je so Hodźijska gmejnska rada na swojim zašłym posedźenju zaběrała.
Zelena liga drje fotowoltaikowu připrawu zasadnje wita, wotpokazuje pak tajki solarny park na ratarsce wužiwanej płoninje. Tomu so tež přirodoškitny zwjazk NABU přizamknje.
K měrej bjez bróni – dźe to?
Smochćicy (CRM/SN). Tema druheho wječora lětušeho ekumeniskeho póstneho seminara w Domje biskopa Bena bě „Měr zaručić bjez bróni“. Tomu napřećo steješe prašenje: „Dźe to?“ Impulsy k tomu podaštaj fararka Budyskeje ewangelskeje tachantskeje wosady dr. Maria Heinke-Probst a duchowny kubłanskeho domu dr. Michael Kleiner. Čehodla pak su akcije bjez namocy wuspěšniše a zdobom wunošniše hač z brónjemi, wujasni na (njewočakowano) přeswědčiwe wašnje fararka Eva Hadem z Ekumeniskeho centruma w Magdeburgu, hdźež wěnuje so wona specielnje dźěłu za měr. W swojich wuwjedźenjach złožowaše so teologowka předewšěm na wobšěrnje zapołoženu a wysoko hódnoćenu wědomostnu studiju, kotruž běštej před někotrymi lětami Erica Chenowerth a Maria J. Stephan předpołožiłoj. Wonej běštej 300 zběžkow a rewolucijow na wjacorych kontinentach přepytowałoj. Tak dóńdźe- štej k wuslědkej, zo je wjace ludźi na akcijach wobdźělenych, hdźež žanu namóc njenałožuja. Tam su tohorunja ludźo z najwšelakorišich worštow wobydlerstwa wobdźěleni. To zaruča fleksibelne taktěrowanje.
Policija (28.02.18)
Wowka poslednja pomoc była
Běła Woda. Dokelž 31lětny muž w Běłej Wodźe pokutu 70 eurow zapłaćił njebě, policija za nim pytaše. Jako wón zawčerawšim pjenjezy přeco hišće njeměješe, chcychu jeho policisća do jastwa dowjezć. W poslednim wokomiku je wowka muža pokutu zapłaćiła.
Rozestajenja serbsce wujednać
Pančicy-Kukow (SN/MWj). Zastupowacy změrc za gmejny zarjadniskeho zwjazka Při Klóšterskej wodźe je nětko Tilo Žur. Róžeńčana je zhromadźizna zarjadniskeho zwjazka na swojim wčerawšim posedźenju jednohłósnje wuzwoliła. Powołansce dźěła nan třoch dźěći w telekomunikaciskim předewzaću Vodafone. Mjeztym hižo pjeć lět je wón přisydnik na Budyskim dźěłowym sudnistwje. Wot spočatka zašłeho lěta skutkowacy změrc Eduard Luhmann bě na to skedźbnił, zo ma po zakonju zastupjerja měć. Při wupisanju tuž wo to prošachu, zo měli so tež serbscy zajimcy přizjewić. Změrcowska doba Tila Žura započnje so 1. měrca 2018 a traje hač do 31. decembra 2021. Serbscy wobydlerjo z gmejnow zarjadniskeho zwjazka móža nětko potajkim rozestajenja mjez susodami a dalše naležnosće wot zastupowaceho změrca w swojej maćeršćinje wujednać dać.
Za planowany přetwar rěčnišća Klóšterskeje wody mjez Nowej ...
Hartz IV ludźiz Łužicy ćěri
Budyšin (SN/jž). Dale a bóle pyta serbski zapósłanc Sakskeho krajneho sejma Marko Šiman (CDU) za móžnosćemi, bjezdźěłnych zaso do dźěłoweje towaršnosće přinjesć. Žada sej tuž korekturu Hartza IV. „Ryzy pjenježna podpěra stata njedosaha, zo by so bjezdźěłny čłowjesce do towaršnosće integrował.“ Jako móžne rozrisanje problema widźi Šiman naprawy za wobstaranje dźěła (ABM). Dźěłopytacym ma so při znowazarjadowanju pomhać a jim maja so přiměrjene dochody zawěsćić. „Po cyłej Hornjej Łužicy pobrachuja hladarjo wodźiznow a dźěłowe mocy we wobłuku dróhotwara, škita přirody kaž tež na dźěćacym/młodźinskim polu.“ Wjesnjanosća dawno hižo na fakt ABM skedźbnjeja. Dźěła je na wsach wjace hač dosć. Towaršnosć sama na sebi měła so tež změnić. Dźěći dyrbjeli z wjac nadźiju do přichoda hladać a starši měli jim za to z přikładom być, to rěka, zo zamóža so sami zastarać a zo na dźěło chodźa. Nimo toho powjetšeja ABM šansy, po dźěle na tak mjenowanych druhich dźěłowych wikach na prěnje so dóstać a tak firmam k dispoziciji być.
Krótkopowěsće (28.02.18)
4 300 swobodnych městnow
Budyšin. Wo 50 wosobow na 22 060 je so ličba bjezdźěłnych kónc februara we wuchodnej Sakskej powjetšiła. Kaž Budyska agentura za dźěło dźensa zdźěli, wuchadźeja tam z toho, zo předewzaća wot měrca zaso wjace personala přistaja. Dźěłodawarski serwis dźěłoweje agentury je w februarje 1 182 nowych dźěłowych městnow registrował, tak maja posrědkowarjo wjace hač 4 300 socialneho zawěsćenja winowatostnych městnow w poskitku.
Dóstanu kubłanske poručenje
Drježdźany. Něhdźe 33 100 šulerjow 4. lětnika zakładnych šulow w Sakskej je dźensa swoje kubłanske poručenje za dale wjeduce kubłanišćo dóstało. Hač do 7. měrca maja starši swoje dźěćo na wyšej šuli abo gymnaziju přizjewić. Kultusowy minister Christian Piwarz (CDU) rjekny: „Hospodarstwo pyta dorost, kotrehož sylnosć je praktiske wukubłanje. Za to so wyša šula najlěpje hodźi.“
Němčinu kruće zapisać
Trudla Malinkowa čita
Slepo. Hromadźe z Ludowym nakładnistwom Domowina přeproša Slepjanski Serbski kulturny centrum štwórtk, 1. měrca, w 16 hodź. na zarjadowanje z Budyšanku Trudlu Malinkowej. Awtorka čita ze swojeje knihi „Ufer der Hoffnung“. W njej pisa wo přičinach wupućowanja Serbow w 19. lětstotku, rysuje napinacu jězbu do Texasa, Awstralskeje a Kanady a wopisuje ćežki nowozapočatk w cuzbje. Zajimcy móža sej knihu na městnje kupić a sej ju wot Trudle Malinkoweje signować dać.
Pomhaja pomocnikam
Budyšin. Powšitkownowužitne socialne a karitatiwne towarstwa a organizacije, kotrež za swoje skutkowanje jězdźidło wužiwaja, móža so hač do kónca měrca na internetnej stronje www.wirhelfenhelfern.de přizjewić a dobropis w hódnoće 1 500 eurow za nakup bencina abo diesela dobyć. Akciju rjećaza tankownjow Esso podpěruje tohorunja Budyska wokrjesna lutowarnja. Za požadanje trěbne su informacije wo towarstwje abo organizaciji, mjeno rozmołwneho partnera a přičina, čehodla měło towarstwo tankowanski dobropis dóstać.
Štomy wurězać nawuknyć
