Krótkopowěsće (13.03.18)
Přinoški nominowane
Berlin/Waršawa. Narodnej juryji stej w Berlinje a Waršawje 30 přinoškow za wuznamjenjenje z Němsko-Pólskim žurnalistiskim mytom Tadeusza Mazowieckeho nominowałoj. Sćelak RBB je tam z pjeć namjetami we wšěch kategorijach nimo printa zastupjeny, MDR tónkróć ze žanym. Lětušich lawreatow mytuja 6. junija w Stralsundźe we wobłuku Němsko-Pólskich medijowych dnjow.
Darmotnje z ćahom jězdźić?
Praha. Ministerski prezident Čěskeje Andrej Babiš (strona ANO) je žurnalistam tele dny nowy knježerstwowy program předstajił. Z jeho wobstatkom je tež darmotne wužiwanje železnicy za studentow a za seniorow, staršich hač 65 lět. Podobnu naprawu praktikuja hižo wot lěta 2014 w Słowakskej, hdźež pak ju dotal jako populistiske postajenje husćišo kritizuja.
Hinaše žiwjenje
Policija (12.03.18)
Jězbna dowolnosć fuk
Čelchow. Chětro hłuboko do piwoweje škleńcy pohladał je sobotu wječor 42lětny muž w Čelchowje a so na to z kolesom na dompuć nastajił. Policija pak jeho zadźerža a přewjedźe alkoholowy test, při kotrymž naměri pola kolesowarja 1,64 promilow alkohola w kreji. Za to dyrbi muž nětko na wěsty čas swoju jězbnu dowolnosć wotedać, dalokož tajku wobsedźi.
Štomy skradźu pušćeli
Krěpjecy. Paduši drjewa běchu minjene dny w klóšterskim lěsu na kromje Krěpjec při dźěle. Tam dyrbjachu zwěsćić, zo bě něchtó wjacore nahladne duby a topoły pušćił a wotwjezł. Nimo toho běchu dalše štomy njefachowje narězane, tak zo tež tam ze škodu liča. Pjenježnu stratu trochuja na něhdźe 8 000 eurow.
Wopačny alarm
Pančicy-Kukow. Wohnjowych wobornikow z Pančic-Kukowa a wokolnych wsow su wčera popołdnju do klóštra Marijineje hwězdy wołali. Alarmowa připrawa je tam woheń signalizowała. Kaž pak so wukopa, jednaše so wo wopačny alarm, tak zo móžachu wobornicy po něšto mjeńšinach zaso wotjěć.
Wosobowe awto sćežor powaliło
Gmejna swoje towarstwa dale podpěruje
Dźěwin (AK/SN). Runje tak kaž loni chce Dźěwinska gmejna tež lětsa swoje towarstwa z dohromady 5 000 eurami spěchować. To su gmejnscy radźićeljo na swojim zašłym posedźenju wobzamknyli. Loni dósta Brězowske domizniske towarstwo 1 500 eurow, tamniše towarstwo historiskich wohnjowych woborow a ratarskeje techniki 1 000 eurow. Dźěwinskemu třělcowskemu towarstwu přewostajichu 500 eurow a po 400 eurach podpěrachu Dźěwinske karnewalowe towarstwo, tamniše sportowe towarstwo, zjednoćenstwo mjetelerjow, młodźinski klub kaž tež jěchanske a jězdne towarstwo.
Při šuli planuja nowe sportnišćo
Wulka Dubrawa (CS/SN). Tójšto pjenjez inwestować chce Wulkodubrawska gmejna do wuhotowanja sportnišća při šulskim centrumje. Plany za to je architektka Ludmila Pansyna na zašłym posedźenju gmejnskeje rady předstajiła. Zo njebychu předewšěm zakładni šulerjo dołhi puć hač k towarstwowemu sportnišću na so brać dyrbjeli, chcedźa teren při šuli přetwarić. Na trawniku ma nowa běhanska čara za krótke distancy nastać. W njej zapřijata budźe připrawa za dalokoskok. Južnje njeje natwarja małe hrajnišćo, kotrež hodźało so za volleyball, kopańcu a wotbiwańcu (Schlagball) wužiwać. Hrajnišćo wobdadźa z wysokim sakom. Nimo toho nastanje wjacezaměrowa městnosć z domom za sportowe nastroje, z blidotenisowej platu a móžnosćemi k posydnjenju. Někotre štomy budu podrězać dyrbjeć, za to pak nasadźeja nowe. Teren wobdadźa z płotom a wrotami, zo bychu zjawnje wužiwajomne wobłuki wot šulskich dźělene byli. Nimo toho připrawja parkowanske městna za kubłarki pěstowarnje a za zbrašenych. Po tuchwilnym trochowanju płaća sportnišćo 400 000 eurow, šulski dwór 87 000 a parkowanske městna 11 000 eurow.
Podpěra młodym wobornikam
Smječkecy (aha/SN). Čłonojo dorostoweje Smječkečanskeje wohnjoweje wobory zetkachu so sobotu dopołdnja k swojemu planowanemu praktiskemu wukubłanju w hašenju. Wšitke dźesać młodych kameradow – mjez nimi štyri holcy – w starobje wosom do šěsnaće lět su so z hłownym nazwučowarjom Carstenom Čórlichom a jeho zastupjerjom Handrijom Kružu stajenym nadawkam z wulkej disciplinu wěnowali.
Krótkopowěsće (12.03.18)
Wuspěšna prapremjera
Budyšin. Na hłownym jewišću Němsko-Serbskeho ludoweho dźiwadła je minjeny pjatk inscenacija „Łužiske kwartěry abo Rus w pincy“ swoju prapremjeru dožiwiła. W přitomnosći awtora Ralpha Oehmy předstajichu kruch, kotryž běchu we wobłuku wubědźowanja „Łužicy 2017“ z prěnim městnom mytowali.
Zhromadne dźěło móžne
Budyšin. Móžnosće zhromadneho dźěła w lěwicarskim spektrumje towaršnosće su. To zwěsćichu zastupjerjo wokrjesnych a městnych zwjazkow SPD, Lěwicy a Zwjazka 90/Zelenych w Budyskim wokrjesu na wuměnje sobotu w Budyšinje. Přitomni su mjez druhim poměr mjez stronami, wobchadźenje z AfD, politiku ćěkancam napřećo kaž tež škit klimy a energijowy přewrót rozjimali.
Potrjeby dźěći wobkedźbować
Myto a přednoškaj
Budyšin. Hłowna zhromadźizna Maćicy Serbskeje wotměje so sobotu, 17. měrca, wot 14 hodź. na žurli Budyskeho Serbskeho muzeja. Nimo spožčenja spěchowanskeho myta Maćičneho myta Michała Hórnika poskića tam stawizniskej přednoškaj. Mjez druhim porěči dr. Petr Kaleta z Prahi wo Serbach w Ludowej komorje NDR w lětach 1949 do 1989. Čłonojo kaž tež dalši zajimcy su wutrobnje přeprošeni.
Lisćik za cyłe lěto
Stróža. Za Stróžanski Dom tysac hatow poskića zarjadnistwo biosferoweho rezerwata Hornjołužiska hola a haty nětko lětny lisćik. W nim zapřijate su wšitke wustajenske wobłuki, wužiwanje wodoweho dožiwjenskeho terena a wobdźělenje na wšitkich přednoškach, kotrež w běhu lěta w domje maja. Zajimcy dóstanu lisćik direktnje na městnje. Wón płaći 15 eurow, potuńšeny dźesać eurow. Wo zarjadowanjach w Stróži móža so zajimcy pod www.haus-der-tausend-teiche.de nadrobnje wobhonić.
Podpěruja wotchadnički
W hornčerni so gratu přimać
Hajnicy z bilancu njespokojom
Hońtwjerske drustwo Nowoslicy hłownu zhromadźiznu přewjedło
Nowoslicy (JK/SN). Čłonojo Nowosličanskeho hońtwjerskeho drustwa móža so wjeselić. Woni dóstanu w přichodnych tydźenjach dźěl dochodow z wotnajenskich zrěčenjow drustwa podźělnje wupłaćeny. Předsydstwo bě to rozsudźiło, kaž předsyda drustwa Pětr Wawry čłonam na lětušej hłownej zhromadźiznje drustwa w Nowoslicach zdźěli. Na Kamjenskim katasterowym zarjedźe wobstarachu sej aktualny zapis wobsedźerjow ležownosćow wokoło Nowoslic. Nimo toho dóstachu wšitke konkretne daty čłonow kaž tež wobsedźerjow ležownosćow. Nětko móža z derje pjelnjeneje kasy drustwa kóždemu woprawnjenemu čłonej wupłaćić dwaj euraj na hektar přenajateje płoniny, wróćo sahajo hač do lěta 2009. To drustwownikow wězo zwjeseli. Tójšto z nich je so na lětušej hłownej wobdźěliło, pokazujo zajim na drustwje a dźěle předsydstwa a hajnikow.
