Tójšto zwoprawdźić móhli
Běła Woda (AK/SN). Město Běła Woda dóstanje lětsa wot energijoweho koncerna LEAG cyłkownje 350 000 eurow. Pjenjezy maja zarunać poćeženja wobydlerjow přez Wochožansku wuhlowu jamu. Tole předwidźi dojednanje wobeju stron wo dalšim zhromadnym dźěle.
Konkretnje dóstanje město za wobłuk hospodarstwo a zarjadnistwo 10 000 eurow. Dalšich 10 000 eurow dźe do wobłuka přiroda a wobswět, do kotrehož słuša hłownje wuhotowanje města. 190 000 eurow maja za žiwjensku kwalitu a infrastrukturu k dispoziciji, štož móža přede- wšěm za spěchowanje towarstwow, šulow a pěstowarnjow nałožić. 80 000 eurow je za kulturu kaž tež za ponowjenje sportowych arealow. 45 000 eurow dóstanje Běła Woda za hórnistwowe nadawki a 15 000 za wodowy naprawowy plan.
W Dobrošicach su tele dny wjesni mužojo dospołnje dodźeržany ...
Són wo „Krónje“ rozpłunył?
Nakup a wobhospodarjenje Budyskeje měšćanskeje hale „Króna“ njemóže město Budyšin financować. Zajim na filejowym kruchu pak dale je.
Budyšin (CK/SN). „Žadana płaćizna njeje jenož přewysoka, ale tež z prawniskeho wida njerealistiska.“ Z tymle wuprajenjom skónči Budyski financny měšćanosta dr. Robert Böhmer (njestronjan) na wčerawšim posedźenju měšćanskeje rady wšitke spekulacije, zo sprjewine město „Krónu“ kupi. Za 3,4 miliony eurow chce Berlinska předewzaćelska skupina Onnasch twar z wulkoparkowanišćom mjez Kamjentnej a Hornčerskej předać. Filejowy kruch to, kotryž po słowach někotrych radźićelow město njeměło wotpokazać. Wjacore frakcije běchu měšćanskemu zarjadnistwu nadawk dali nakup pruwować.
Wčerawša wotmołwa bě strózba. Po zasadach zlutniweho hospodarjenja, k čemuž je město winowate, „njepřińdźe nakup do prašenja“. Planowanych inwesticijow za twarske naprawy hač do lěta 2020 njejsu žane pjenjezy za nakup. Chcyli-li ju jako měšćansku halu dale wobhospodarjeć, dyrbjeli tójšto inwestować, rozkory bychu wotwidźomne byli.
Krótkopowěsće (02.03.17)
Opozicija žada sej wěstotu
Drježdźany. Zeleni a Lěwica žadaja sej wot sakskeho krajneho knježerstwa lěpši škit dawkipłaćerjow před móžnymi kóštami wudobywanja brunicy dla. Tak dyrbjało sej knježerstwo wot energijoweho zastaraćela LEAG, naslědnika Vattenfalla, najručišo wěstotne pjenjezy za pad hospodarskeje plajty žadać, zo njetrjebał stat nastate kóšty přewzać.
Inflacija dale přiběrała
Kamjenc. Inflacija w Sakskej je w februaru dale přiběrała. Po dotalnych wobličenjach su so twory wo 2,4 procenty podróšili, kaž Kamjenski statistiski zarjad zdźěla. Naposledk běchu tajke podróšenje w oktobru 2011 zwěsćili. Dróše su předewšěm žiwidła, bencin a diesel kaž tež tepjenski wolij.
Pitnu wodu potuńšić
Praha. Čěski wobswětowy minister Richard Brabec chcył pitnu wodu za woteběrarjow potuńšić. Po jeho zapodatym namjeće měł so nadhódnotowy dawk za wodu a wopłóčki wot dotal 15 na 10 procentow znižić. Zo bychu ludźo tež woprawdźe mjenje płaćić dyrbjeli, planuje Brabec natwar wosebiteho regulaciskeho zarjada kaž tež nowu formu wobličenja dobytka wodarnjow.
Jutrowne jejka z Mikowa po wšej Łužicy znate
Mikowčanka Beatris Sachse wobdźěla so wot lěta 2008 na wubědźowanju wo najrjeńše serbske jutrowne jejko. Tež za lětuše 64. wurisanje chce swoju kolekciju zapodać. Hač do jutřišeho pjatka je za to hišće chwile.
W fakultatiwnej wučbje serbšćina B na Hućinjanskej šuli je so Beatris Sachse jako dźewjećlětna z debjenjom jutrownych jejkow zeznajomiła. Tak su potom doma w Hućinje w swójbje jejka debili. Wukubłana šwalča za muži tule swójbnu tradiciju hač do dźensnišeho swěrnje dale wjedźe. Do jeje šwalčernje w Mikowje ludźo rady přichadźeja. W jutrownym času móža tam tež serbske jutrowne jejka z jeju wušikneju rukow kupować.
Bórze hotowa
Hodźij (SN). Prěčečanska wohnjowoborna gratownja ma bórze dospołnje ponowjena być. W minjenych měsacach su ju za něhdźe 200 000 eurow saněrowali a zdobom rozšěrili, rěka z gmejnskeho zarjada. Byrnjež wobora gratownju hižo wužiwała, maja tam hišće někotre dodatne dźěła přewjesć. Trěbne nadawki je gmejnska rada na swojim wutornym wuradźowanju rozdawała.
Mužakowska budźe zawrjena
Budyšin (SN). Přizamkowanja domskeho na Budyskej Mužakowskej k płuno- a wopłóčkowodej dla budu dźěle hasy wot 6. měrca w 10 hodź. hač do 10. měrca dospołnje zawrjene. Kaž měšćanske zarjadnistwo informuje, potrjechi to předewšěm wotbóčku na Cyhelsku.
Wobchody njedźelu wotewrěć
Policija (02.03.17)
Techniski defekt woheń zawinił
Droby. Na arealu recyclingownje w Drobach je so wčera rano nastroj k rozkuskowanju smjećow palił. Kaž policija zdźěli, bě přičina wohenja techniski defekt. Wohnjowa wobora zamó płomjenja spěšnje podusyć. Zranił so nichtó njeje.
Pytaja swědkow
Kamjenc. Njeznaći su wutoru w Kamjencu Mercedes wobškodźili a ćeknyli. Něchtó bě do zadnich duri zajěł. Škoda wučinja 2 000 eurow. Swědcy njezboža njech so pola policije přizjewja.
Kultura njeje samozrozumliwa
Martin Schmidt: Zhromadnosć Serbow a Němcow wažna
Wojerecy (AK/SN). Nowy „Směrodajny program Wojerecy 2030“ ma krótši, konkretniši a zrozumliwiši być. „Wot decembra bě redakciska skupina naćisk předźěłała“, rjekny sobuawtor Andreas Kaufmann na Wojerowskej měšćanskej radźe minjenu wutoru. Z wosom hłosawzdaćemi a dwěmaj přećiwnymaj hłosomaj radźićeljo zjawne wupołoženje naćiska wobzamknychu. Wot 9. měrca do 6. apryla móža sej wobydlerjo naćisk wobhladać. Jasne namjety su witane.
Změny w dźěłarni swj. Michała
Pančičansko-Kukowski Dom swjateho Michała, dźěłarnja za zbrašenych, ma wot wčerawšeho staru-nowu wjednicu.
Pančicy-Kukow (SN/JaW). Karin Cyžowa je wčera, popjelnu srjedu, znowa přewzała nawodnistwo Domu swjateho Michała, dźěłarnje za zbrašenych w Pančičansko-Kukowskim klóštrje Marijinej hwězdźe. Wona přewozmje městno Andreasa Ošiki, kiž bě dźěłarnju wot apryla 2015 nawjedował, kaž klóšter w nowinskej zdźělence informuje.
„Tak wróći Andreas Ošika staflowy stab wosobje, kotraž běše dźěłarnju za zbrašenych přez mnohe lěta formowała“, w zdźělence dale rěka. „Dźěłarnja je so w minjenymaj lětomaj jara derje dale wuwiła“, rozłoži financny a zarjadniski direktor klóštra Marijineje hwězdy Chrystof Mikławšk. „Zo bychu so tež přichodnje derje wuwiwali, chcemy dalše nowe poskitki we wobłuku dźěła a zaběry w domje zakótwić“, wuzběhny hospodarski nawoda klóštra wčera na witanju noweje wjednicy dźěłarnje.
