Budyšin (SN). Mjeztym hižo šesty raz wotměje so lětsa mjezynarodna adwentnička za dźěći z Budyšina a wokoliny. Ju zarjaduja znowa towarstwo Swětłownja Majak, Mjezynarodny europski klub, Budyska tafla a zapósłanc Sakskeho krajneho sejma Hajko Kozel (Lěwica). Adwentnička wotměje so sobotu, 9. decembra, wot 14 do 17 hodź. w Budyskim Serbskim domje. Budźe to zhromadny swjedźeń němskich a serbskich dźěći města a towarstwa Majak kaž tež dźěći z arabskich a afriskich krajow. Swobodny stat Sakska zarjadowanje spěchuje. Mali a wulcy wopytowarjo dožiwja kulturny program, dohodowny krótkofilm a móža zhromadnje paslić. Kóžde dźěćo smě sej dar sobu domoj wzać. Štóž chce dalše dariki kaž hrajki abo dźěćace knihi přinošować, móže je hižo do toho wotedać. Składnosć k tomu je pola towarstwa Majak na Nagelowej 1 (tel. 03591/ 59 69 094), w běrowje Hajka Kozela na Šulerskej 10 (tel. 03591/ 31 89 904) abo pola Budyskeje tafle na Fabrikskej 4 (tel. 03591/ 303 717). Za pjenježne dary wupisaja kwitowanku. Na wšitkich třoch městnach předawaja tohorunja zastupne lisćiki za euro za dźěći a dorosćenych.

Łaz (AK/SN). Ćmowy barik ze swětłymaj wušomaj dobroćiwje hlada. Na klinje ma darik. „Wón ma hišće prawu drjewjanu wołmu w brjuše. Mi je so wón wot prěnjeho wokomika lubił“, praji Helga Janke z Běłeho Chołmca wo teddyju we witrinje. Bywša wučerka na zakładnej šuli hižo wjele lět teddyje zběra. K hodownej wustajeńcy we Łazowskim Domje Zejlerja a Smolerja, kotruž njedźelu, 3. decembra, w 14.30 hodź. wotewru, Helga Janke z 80 (!) požčonkami přinošuje. Tež Anke Sonntag z Wojerec přehladku z dźělom swojeje zběrki podpěruje. Dohromady 300 plyšowych teddyjow, nimale 40 pohladnicow a něhdźe sto dalšich eksponatow budźe w Domje Zejlerja a Smolerja widźeć.

Domowe čisła a wohnjowa wobora gmejnskich radźićelow zaběrali

Njebjelčicy (JK/SN). Hačrunjež maja w Nje­bjelčanskej gmejnje wustawki, w kotrychž je zapisane, kak maja so přirjadować a rozdźělić domowe čisła, dyrbjachu so tamniši gmejnscy radźićeljo na swojim wčerawšim posedźenju hišće raz z nowymi wustawkami zaběrać. Pozadki nowych, za wšitke gmejny zarjadniskeho zwjazka Při Klóšterskej wodźe płaćiwych wustawkow rozjasni předsyda zwjazka Měrko Domaška. Jasne přirjadowanje domowych­ čisłow k separatnym bydlenjam a domam na ležownosćach pomha zaručić spěšnu orientaciju za pomocne institucije kaž lěkarjow, policiju a wo­hnjowu woboru. Nimo toho wolóži wone dźěło twarskeho a wobydlerskeho zarjada zwjazka. Na mnohich městnach praktikowane hospodarjenje wjacorych domjacnosćow pod jednym čisłom z wotpohladom, lutować wudawki za wotpadki abo wopłóčki, njejsu legalne. W někotrych tajkich padach wjedźechu po sło­- wach Domaški rozestajenja mjez zwjazkom a wobydlerjemi samo hač na sudnistwo.

Smječkecy. Dwójce předstaji Němsko-Serbske ludowe dźiwadło přichodny kónc tydźenja swoju inscenaciju „Hodowna stawizna“. Sobotu, 2. decembra, w 19 hodź. dožiwja ju zajimcy w Smječkečanskim wjesnym klubje (nic kaž planowane we Worklecach) a njedźelu, 3. decembra, w 16 hodź. na Chróšćanskej Krawčikec žurli. Wobě předstajeni budźetej ze simultanym přełožkom.

W sprjewinym měsće po puću

Budyšin. Pod hesłom „Po puću w Sakskej“ pokaza telewizijny sćelak MDR sobotu, 2. decembra, we 18.15 hodź. film wo sprjewinym měsće Budyšinje. Moderatorka Beate Werner je sej přitulne městna w starym měsće wobhladała, po srjedźowěkowskich hasach dundała, kulinariske wosebitosće woptała a so wo dwurěčnosći města wobhoniła.

Stare filmy sej wobhladać