Pěstowarnja je wjeselo a wužadanje
Njeswačidło (JK/SN). Jako je Njeswačanski wjesnjanosta Gerd Schuster (CDU) na poslednim lětušim posedźenju gmejnskeje rady wo předewzaćach 2018 w gmejnje rěčał, činješe to z jednym płakacym a jednym smějacym wóčkom. Dobre hospodarske połoženje w Němskej wjedźe tež w Njeswačanskej gmejnje k tomu, zo maja swójby zaso wjace dźěći. To wjesnjanostu wjeseli, hdyž so młode swójby w gmejnje derje čuja a ličba wobydlerjow přiběra.
Na tamnej stronje pak maja wšitke dźěći tež zastarane być. W tym nastupanju docpěja w Njeswačidle klětu swoje hranicy. Hižo nětko je pěstowarnja w nošerstwje Němskeho čerwjeneho křiža hač na poslednje městno wućežena. Něhdźe srjedź lěta, hdyž dźěći z pěstowarnje do šule du, so situacija něšto wolóži. Ale kónc lěta liča z wulkim nawalom. Přidatnje so wuměnjenja přiwótřa, hdyž nowy personalny kluč płaći. W tym wokomiku najpozdźišo budźetej dyrbjeć gmejna kaž tež nošer wo tym rozmyslować, hač popłatk zwyšitej.
Doma dźěło namakać
Budyšin (SN). Srjedu, 27. decembra, wotměje so w Budyskim krajnoradnym zarjedźe bursa „zaso tu“. Wot 10 hodź. je zhromadne wobchodźenje ze zastupjerjemi krajnoradneho zarjada, Industrijneje a wikowanskeje komory kaž tež rjemjeslniskeje komory planowane. 75 předewzaćelow je swoje wobdźělenje připrajiło. Předewzaća z dźěłowymi poskitkami skića wosebje nawrótnikam móžnosće, sej swoje žiwjenske srjedźišćo w Budyskim wokrjesu zarjadować.
Přednošk wo wjelkach
Rěčicy (SN). Rěčičanski kontaktny běrow „Wjelki w Sakskej“ přeproša zajimcow přichodnu srjedu w 10.30 hodź. na přednošk wo wjelkach. Informować chcedźa fachowcy přitomnych wo dotalnych wuslědkach wjelčeho slědźenja, wo biologiji a žiwjenskim wašnju tychle rubježnych zwěrjatow. Přednoškej přizamknje so ekskursija do wjelčeho rewěra.
SKI zawrjena – kniharnja nic
Žiwy adwent w Grofic butice
Syła dźěći, jich starši kaž tež dźědojo a wowki mějachu wčera nawječor we Wojerowskim Grofic modowym domje rjane dožiwjenje. Dožiwili su tam „žiwy adwentny kalender“.
Wojerecy (SN/mwe). Wot 1. hač do 23. decembra, z wuwzaćom njedźelow, wotměwa so we Wojerecach zaso „žiwy adwentny kalender“. Diakon tamnišeje ewangelskeje wosady Torsten Vogel je hromadźe z mnohimi partnerami znowa wotměnjawy program zestajał. Wšědnje zetkawaja so wosebje dźěći wokoło 18 hodź. při Janskej cyrkwi. Spěwajo du wone z latarnčku k wšelakim městnam, hdźež na nje hižo sćerpnje čakaja.
Chori hody derje zastarani
Při wšelakich symptomach čisło 116 117 zazwonić
Budyšin (SN/mwe). Pod darmotnym telefonowym čisłom 116 117, po cyłej Němskej płaćiwym, pacienća njekomplikowanje zhonja, hdźe je najbliša kasowa lěkarsko-hotowostna praksa, druhdy tež jako nuzowa praksa woznamjenjena. We wotewrjenskich časach móža ludźo do tajkeje praksy tež bjez přizjewjenja přińć. Čuja-li pak so přechori, zo bychu hotowostnu praksu wopytać móhli, přijědźe lěkar tež k nim domoj. Hotowostny lěkar zastaruje nimo kasowych tež priwatnych pacientow. Zaplanować pak měli přez swjate dny tróšku wjace časa. Štó domjaceho lěkarja w času jeho hodowneho dowola zastupuje, wón swojim pacientam zdźěli.
Chcedźa při „žabje“ twarić
Na wčerawšej a zdobom poslednjej lětušej zhromadźiznje gmejnskeje rady Njebjelčic wuzběhny wjesnjanosta Tomaš Čornak (CDU), zo „nochcemy wróćo zhladować, ale so na klětuše wužadace nadawki nastajić“.
Njebjelčicy (aha/SN). Zaběrajo so z wjacorymi twarskimi naležnosćemi předstaji městopředsyda towarstwa Kamjenjak a zamołwity za permakulturu Tomaš Nowak předstawy twara terasowych skłoninow na něhdźe dźesaćhektarskej płoninje zboka Miłočanskeje žaby. Objekt je předewzaće we wobłuku kooperaciskeho programa Interreg Pólska-Sakska hač do lěta 2022. Nowak, wučeny geologa, je twarske předstawy nazornje rozłožił, a radźićeljo přihłosowachu stajenej próstwje runje tak kaž přetwarej gmejnskeho zarjada na hortowe rumnosće.
Krótkopowěsće (22.12.17)
Najrjeńša wjes wokrjesa
Dešno. Wubědźowanje „Naša wjes ma přichod“ we wokrjesu Sprjewja-Nysa je Dešno dobyło. Kaž delnjoserbski tydźenik Nowy Casnik zdźěla je krajny rada Harald Altekrüger (CDU) na wuradźowanju wokrjesneho sejmika minjeny tydźeń myto 10 000 eurow přepodał. Dešno je tuž za krajne wurisanje kwalifikowane. Přeswědčiło bě ze swojim čiłym a aktiwnym wjesnym žiwjenjom.
Přehladku 2022 njewuhotuja
Podstupim. 7. braniborsku krajnu zahrodnu wustajeńcu w lěće 2022 njebudźe Grodk wuhotować. Kaž wobswětowe ministerstwo zdźěli, je kabinet Braniborskeje tele dny rozsudźił, přehladku w Beelitzu wotměć. Grodk bě so z hesłom „Zelena parla Grodk – Přirodu a energiju w změnje časow dožiwić“ požadał. Přichodna, šesta zahrodna přehladka budźe za dwě lěće we Wittstocku.
Rekordna ličba pasažěrow
Dźakuja so za podpěru
Jaseńca/Prawoćicy. Jako zastupjer sebjepomocneje skupiny Xeroderma Pigmentosum, na kotrejež dobro bě njedawny beneficny koncert w Jaseńcy, so Tobias Bulank z Prawoćic spěwnej skupinje PoŠtyrjoch, Florianej Rynčej kaž tež wšitkim dalšim akteram, pomocnikam a mnohim darićelam za wulkomyslnu podpěru dźakuje. Dale su spočatk tydźenja Sernjanske maćerje sebjepomocnej skupinje 290 eurow darili, za čož so Tobias Bulank tohorunja wuraznje dźakuje.
Na wěži nowe lěto witać
Budyšin. Towarstwo měšćanskich wodźerjow poskića w Budyšinje wosebite silwesterske dožiwjenje. Na Maćijowej wěži při Hrodźe chcedźa nowe lěto witać. Zajimcy zetkaja so silwester w 22 hodź. na Mjasowych wikach. Wottam póńdu hač k Maćijowej wěži, hdźež čakatej na nich horce wino a přikusk. Na to podadźa so wšitcy na wěžu, a tam sej potom na Nowe lěto připija. Dalše informacije dóstanu zajimcy pod telefonowym čisłom 03591/ 52 82 898.
Adwentne wiki trochu hinaše
W internaće na hody so přihotowali
Šulerjo internata Budyskeho Serbskeho gymnazija so runja tym, kotřiž wotydźenja doma pola staršeju bydla, na hody wjesela a so na nje přihotuja. Tak smy zhromadnje kónc nowembra hodownu pychu a hwězdy za hodowny štom paslili. Hižo k prěnjemu adwentej wopytachu šulerjo wobydlerjow bliskeje starownje a přednjesechu jim adwentne a hodowne spěwy. Hdyž wšak cyły tydźeń w Budyšinje bydliš, podaš so wězo tež na Wjacławske wiki. Chór 1. serbskeje kulturneje brigady pod wuměłskim nawodom Friedemanna Böhmy je so pola nas na swój adwentny koncert přihotował. Zwjeselace je, zo tójšto šulerjow internata na wšelakich instrumentach hraje a program tak wobohaća.
Často smy zhromadnje poprjancy pjekli a so na akciji Radija Satkula wobdźělili, jako fachowcy poprjančki woptachu a posudźowachu. Ćim bóle so wjeselachmy, zo smy 3. městno we wubědźowanju wobsadźili. Sydom šulerkow pod nawodom Hilže Zyndźineje tydźensce wušiwanski kurs wopytuje a sej rubiško za narodnu drastu wušiwa. Druzy wužiwaja swobodny čas za volleyball. To je dobra wotměna k šulskej wučbje.
Policija (21.12.17)
Ilegalne praskotaki sćazali
Wojerecy. Jako běchu zastojnicy Wojerowskeho policajskeho rewěra wutoru dopołdnja na patruli, rozbuchny na parkowanišću při gondlowanskim haće praskotak. Zastojnikam napadny při tym 26lětny Wojerowčan, kotrehož kontrolowachu. W jeho nachribjetniku nańdźechu 159 ilegalnych praskotakow. Pyrotechniku tuž hnydom sćazachu. Młodemu mužej hrozy nětko chłostanje přeńdźenja rozbuchadłoweho zakonja dla.
