Wuměnkarjow druhi raz na adwentničku přeprosyli
Chrósćicy (aha/SN). W šěsć wjesnych dźělach Chróšćanskeje gmejny maš tuchwilu 1 035 wobydlerjow, štož je rozrost porno minjenym lětam. 75 z nich móžeše wjesnjanosta Marko Kliman (CDU) na adwentničce wuměnkarjow w sydarni „Jednoty“ witać. Zarjadowanja tajkeho razu běchu w Chrósćicach hižo za čas NDR přewjedli, po přewróće pak bě to hakle druhi raz, štož nańdźe mjez wobdźělnikami wulke připóznaće.
K zazběhej předstajichu šulerjo zakładneje šule ze swojimaj wučerkomaj Simonu Šěnowej a Ludmilu Donatowej spodobny wotměnjawy program. Lóštnje zanjesechu spěwarjo, mjez nimi tež rumpodichojo, sněhowy muž a samo swj. Lucija adwentne a hodowne dźěćace pěsnje a basnje a pokazachu tak, zo serbsku a němsku rěč derje wobknježa. Do programa zapřijate instrumentalne přinoški na pišćałce, gitarje, keyboardźe a samo trompeće swědča wo tym, zo šula na hudźbne kubłanje wulku wažnosć kładźe.
Poskića tři dalše ležownosće
Žiwjenske wuměnjenja su we Worklečanskej gmejnje jara přijomne
Worklecy (JK/SN). Młode swójby so we Worklečanskej gmejnje jara derje čuja. Dopokaz za to mjez druhim je, zo woswjeći sydom swójbow lětuše hody prěni raz w swojim nowym domčku. Cyłkownje je po politiskej změnje nastało 69 jednoswójbnych domow. Zo matej gmejnska rada a wjesnjanosta na tym swój podźěl, wopodstatni so na zašłym posedźenju gmejnskeje rady.
Zasłužbneju čłonow počesćili
Předsydstwo Katolskeho zjednoćenstwa kubłarjow Sakskeje (KEG) je swojich čłonow tele dny na tradicionalne zetkanje w adwenće přeprosyło, a to tónkróć do Drježdźanskeho hosćenca „Kurhaus“. Mjez něhdźe 30 přitomnymi běše nimale połojca Serbow. Rjane, wjesołe a pokojne zetkanje je předsydstwo KEG pod nawodom swojeje předsydki Moniki Jurkoweje organizowało.
Po witanju, kofejpiću z dobrym hodownym pječwom informowaše městopředsyda sakskeho KEG Franz-Josef Fischer wšitkich wo předewzaćach, kubłanjach a dalšich zarjadowanjach w lěće 2018. Tak čakaja na čłonow w słužbje kaž tež na wuměnku klětu nimo tradicionelnych nowe poskitki a wězo tež nadawki.
Po tym počesći předsydstwo prěni raz třoch sobustawow za wjelelětne skutkowanje w zjednoćenstwje z medalju swjateho Bena-Mišnjanskeho, zhotowjenej z Mišnjanskeho pórclina. Dwě spožčichu so Serbomaj z Budyšina, a to Ludmile Bizoldowej a Jurjej Nukej.
Policija (18.12.17)
Paduši w hotelu
Wojerecy. Přenocuješ-li w hotelu, poprawom z toho wuchadźeš, zo sy tam před paduchami wěsty. Sobotu pak dyrbješe hósć we Wojerowskim hotelu to nawopačne zwěsćić. Jako so wón nawječor po połdra hodźinje do swojeje stwy nawróći, wón zwěsći, zo bě so něchtó přez nachilene wokno zadobył a handy kaž tež wosobinske dokumenty pokradnył. Po informacijach policije wučinja hódnota rubizny něhdźe 400 eurow.
Za swoje přeswědčenje so zasadźuje
Na zašłym posedźenju Budyskeje měšćanskeje rady su Heinricha Schleppersa z druhim najwyšim wuznamjenjenjom města počesćili, a to za jeho čestnohamtski angažement wot lěta 1990.
Budyšin (CK/SN). Hłownje Heinrichej Schleppersej maja so Budyšenjo dźakować, zo je so pod pomnikoškitom stejaca parna lokomotiwa před dwórnišćom zachowała a nowe městno našła. Na namjet Wuchodosakskich přećelow železnicy su radźićela CDU nětko z čestnym woponom Budyšina počesćili. Po čestnym wobydlerstwje je to druhe najwyše wuznamjenjenje města.
Při přewšo přijomnej atmosferje su wobydlerjo Hórkow a jich ...
W Hornjej kaž w Delnjej Łužicy je nas wčerawše sněženje na to ...
Krótkopowěsće (18.12.17)
Maja wobchadnu kupu dóstać
Mučow. W Kulowskim wjesnym dźělu Mučow ma při wokrjesnej dróze nowy chódnik nastać. W tym zwisku chcedźa tež jězdnju ponowić a wobchadnu kupu natwarić. Pomjeńšić chcedźa tak poćeženje wobydlerjow hary dla. Hdy twarske dźěła zahaja, njeje hišće znate. Wjacorych dalšich dróhotwarskich projektow w bliskosći dla drje naprawu hakle w lěće 2019 zwoprawdźa.
Cyrkej z apelom na firmje
Zhorjelc. Ewangelska cyrkej w Němskej zhladuje starosćiwje na wottwar dźěłowych městnow w Zhorjelcu, kotryž stej Siemens a Bombardier připowědźiłoj. Maksimalny profit njesměł jenički postajacy kriterij być a předewzaća njeměli na swoju towaršnostnu zamołwitosć zabyć, rjekny biskop Markus Dröge.
Plany BMW w Čěskej
Sokolov. Firma BMW planuje w zapadnej Čěskej natwar wulkeho areala za pruwowanje jězdźidłow w hódnoće nimale 160 milionow eurow. Pola města Sokolov ma na přestrjeni bywšich brunicowych jamow wjace hač sto kilometrow dróhow nastać, zo bychu „samowodźene“ awta testowali. Areal z 15 twarjenjemi a 400 přistajenymi měł hač do lěta 2021 hotowy być.
Rozprawja wo putnikowanju
Chrósćicy. Hač ke kóncej swěta móžeš sej samo pěši dóńć. To wě Max Jörg Pfauder ze Schkeuditza, po powołanju grafikar, cyle dokładnje – dokelž je to sam činił. Španiske město Santiago de Compostela blisko Atlantiskeho oceana je wot swojich chěžinych duri dokładnje 3 009 kilometrow zdalene. Je samo na dwoje wašnje putnikował: jónu w kóždolětnych etapach, kusk po kusku, takrjec k zwučowanju; a potom tež cyły puć zasobu. Wo swojim dźesaćlětnym putnikowanju po Europje rozprawja Max Jörg Pfauder jutře, sobotu, w 19.45 hodź. w Chróšćanskej putniskej hospodźe. Wšitcy zajimcy su lubje witani!
Wiki při gratowni
Hórki. Na adwentne wiki přeprošuje Hórčanske wjesne towarstwo „Při skale“ njedźelu, 17. decembra, w 16 hodź. při gratowni Hórčanskeje dobrowólneje wohnjoweje wobory. Popołdnjo zahaja wjesne dźěći z programom, na to zanjese dujerska kapała „Horjany“ adwentnu hudźbu. Dźěći změja móžnosć k paslenju a tež rumpodich je swój wopyt připowědźił. Wopytowarjam poskićuja horce wino wot winicarja, kurjenu rybu, pražene kołbaski a dalše překwapjenki.
Natwarjacy kurs serbšćiny
Policija (15.12.17)
Paducha wuslědźili
Budyšin. Po wobšěrnych přepytowanjach su w Budyšinje nětko 26lětneho muža wuslědźili, kiž bě so znajmjeńša trójce do žiwidłoweho wobchoda na Karla Marxowej zadobył a tam mjez druhim palenc pokradnył. Posledni raz bě to w nocy na srjedu, jako jeho instalowana widejokamera filmowaše. Tak móžachu jeho w bliskim bydlenju nachwilnje zajeć. Při tym naměrichu pola njeho dwaj promilej alkohola w kreji. Policistam přepoda wón 16 prózdnych blešow palenca.
