Za žiwjenski skutk počesćeni
Wosebje počesćili su njedawno w Slepom muža, kiž bě předewšěm w popřewrótowym času wjele za wjes wuskutkował a při tym stajnje tež na serbskosć dźiwał.
Slepo (FAG/SN). Wosebje angažowanych wjesnjanow staj wjesny předstejićer Wolfgang Goldstein a wjesna rada tele dny do Slepjanskeho sportoweho hosćenca přeprosyłoj, zo byštaj jich za najwšelakoriše zasadźenje we wsy počesćiłoj. Wjeršk bě, jako dóstachu počesćeni „Slepjanske čestne myto 2017“. Třeći raz su tajke spožčili a chcedźa to přichodnje dale činić. Tele wosebite wuznamjenjenje přija lětsa tež 79lětny Helmut Hančo. „Jeho zmužitosć, w rozsudnych lětach po přewróće zamołwitosć za Slepo přewzać, a jeho wušikne postupowanje jako prěni swobodnje wuzwoleny Slepjanski wjesnjanosta stej jeho žiwjenski skutk“, Wolfgang Goldstein podšmórny.
Z informaciskimi taflemi wuhotowana je wotnětka dožiwjenska ...
Za iniciatiwu MinoritySafePack wabił
Serbskich zajimow dótkaštej so dwaj dypkaj planowaneho dnjoweho porjada póndźelneho posedźenja Budyskeho wokrjesneho sejmika. Jedyn dypk bu přesunjeny, w tamnym wabješe wokrjesny radźićel Dawid Statnik za europsku wobydlersku iniciatiwu Minority SafePack.
Budyšin (SN/at). Wokrjesny radźićel a předsyda Domowiny Dawid Statnik namołwi čłonow Budyskeho wokrjesneho sejmika, europsku wobydlersku iniciatiwu Minority SafePack podpěrać. Wón prošeše radźićelow a krajneho radu Michaela Hariga (CDU), so zjawnje z akciju solidarizować. Kóždy z nich a z jich wokoliny njech ze swojim podpismom k tomu přinošuje, za Němsku trěbne podpisma zezběrać. To je offline móžno, hdyž na lisćinach podpisaja, kotrež Statnik krajnemu radźe přepoda, abo online pod adresu www.minority-safepack.eu.
Zakładnu šulu hač do 2021 ponowja
Sobu najwjetše twarske předewzaće Łazowskeje gmejny je tuchwilu wobšěrne saněrowanje Wulkoždźarowskeje zakładneje šule. Za to su čłonojo gmejnskeje rady wčera dalše nadawki přepodali.
Łaz (AK/SN). We wobłuku cyłkowneho saněrowanja Zakładneje šule „Při Hórnikečanskim jězoru“ Wulke Ždźary su čłonojo Łazowskeje gmejnskeje rady na swojim wčerawšim posedźenju wjacore nadawki za ponowjenje tamnišeje sportownje přepodali. Tak ma twarski zawod z Łaza za 36 000 eurow kachlicy skłasć, a Delnjowujězdźanske předewzaće přewozmje za 42 000 eurow suchotwar. Jednohłósnje wobzamknychu tohorunja wudawki za planowanje projekta a za mjeńše předdźěła w cyłkownym wobjimje 111 000 eurow.
Krótkopowěsće (13.12.17)
Nowy wjesny předstejićer
Miłoraz. Enrico Kliemann je nowy wjesny předstejićer Miłoraza. Jeho su tele dny do zastojnstwa wuzwolili. Wólby běchu trěbne, dokelž bu dotalny předstejićer Waldemar Locke za čestnohamtskeho wjesnjanostu gmejny Trjebin/Miłoraz wuzwoleny. Wón je minjeny pjatk swoje zastojnstwo nastupił, wostanje pak dale čłon Miłoraskeje wjesneje rady.
Zastojnstwo oficialnje złožił
Drježdźany. Stanisław Tilich (CDU) je wčera dopołdnja zastojnstwo jako sakski ministerski prezident oficialnje złožił. Wotpowědny spis zapoda wón prezidentej Sakskeho krajneho sejma dr. Matthiasej Rößlerej. Doba jeho zastojnstwa je so tuž wčera w 24 hodź. skónčiła. Tilich je tak bjez komdźenja puć k nowowólbam a přepodaću zastojnstwa runał.
Najstaršu „čornu dźěru“ našli
Lětsa derje hospodarili
Dźěwin (AK/SN). Gmejna Dźěwin móže lěto 2017 financielnje stabilnje zakónčić. „Etat je so pozitiwnišo wuwił, hač smy sej to myslili“, komornica Carmen Perick na njedawnym posedźenju gmejnskeje rady podšmórny. „Gmejna ma dosć pjenjez, tak zo móžemy kredity wotpłaćić a njetrjebachmy přizwoleny kasowy kredit wužiwać.“
We wokrjesu 101 000 štomow
Budyšin (SN). Kaž je industrijne drustwo twarjenje-agrar-wobswět wuličiło, drje budźe w Budyskim wokrjesu na hodownych swjatych dnjach něhdźe 101 000 hodownych štomow w bydlenskich stwach a druhdźe stać. Lěsniske dźěłarnistwo z toho wuchadźa, zo sej něhdźe 70 procentow domjacnosćow k hodam štomik kupi. „Jědla pak njeje kaž jědla. Kupcy měli nimo napohlada na to dźiwać, hdźe a kak je štom narostł“, radźi Peter Schubert z lěsnistwa, a kupić sej domjacy produkt z ekopječatom.
Jenička póstowa filiala
Čorny Hodler (SN). W Čornohodlerskej kupnicy zaměstnjena póstowa filiala je we wobłuku partnerskeho zrěčenja z Němskim póstom jenička w Radworskej gmejnje. Prowizorisku filialu w Minakale su hižo w oktobru zawrěli.
W zwěrjencu pjenjezy zběrali
Policija (12.12.17)
Přepytuja bijeńcu na „plaće“
Budyšin. K namócnemu rozestajenju dóńdźe minjeny pjatk wječor na Budyskich Žitnych wikach. Tam je alkoholizowany 18lětny młodymaj mužomaj w starobje 17 a 21 lět mjezwoči bił. Tole roznjese so spěšnje po socialnych syćach, hdźež bě rěč wo lěwicarjach a prawicarjach. Kaž policija wuslědźi, steještej sej na „plaće“ skupinje napřećo, kotrejž přisłušatej po wšěm zdaću politisce lěwemu a prawemu spektrumej. Wjacore wosoby běchu alkoholizowane. Policiju přiwołachu w 21.30 hodź. Jako pak ta přijědźe, běchu so wšitcy zminyli. Jeničce třoch swědkow a sobudźěłaćerja wěstotneje słužby móžachu zastojnicy zwěsćić. 18lětny podhladny skućićel so pozdźišo na policajskim rewěrje přizjewi. Nětko přepytuja, hač ma rozestajenje woprawdźe politiski pozadk. Za to pytaja móžnych swědkow.
Přidatne ćahi
Ze změnu zymskeho jězbneho plana wobchadneho zwjazka Hornje Łobjo (VVO) jězdźi z Drježdźan wjace ćahow do Kinsporka a Kamjenca. To je wosebje tež za wopytowarjow Drježdźanskich hodownych wikow přihódne.
Budyšin (SN). Nimo změnow busoweho wobchada w zapadnej Łužicy maja pućowacy lětsa wokoło hód wjace nowych poskitkow w železniskim wobchadźe k dispoziciji. Regionalny bus Hornja Łužica, Wojerowska wobchadna towaršnosć, Sakska měšćanska železnica, Trilex a Němska regioželeznica su swoje jězbne plany zawčerawšim změnili.
Inwestuja do přichoda dźěći
Kulowska měšćanska rada klětuši hospodarski plan wobzamkła
Kulow (AK/SN). Město Kulow inwestuje do přichoda dźěći – za jich hladanje a kubłanje. Tole podšmórny komornik Thomas Woelke na zašłym posedźenju měšćanskeje rady. Radźićeljo su klětuši hospodarski plan jednohłósnje wobzamkli. Něhdźe 2,2 milionaj eurow móže komuna klětu inwestować, a to dźakowano kruće zaplanowanym swójskim srědkam, spěchowanskim srědkam kaž tež kreditam.
