Spominaja na spisowaćelku
Wojerecy. Na dnju 44. posmjertnin spisowaćelki Brigitty Reimann (1933–1973) dopomina Wojerowske wuměłstwowe towarstwo na awtorku, kotraž je w swojich literarnych twórbach natwar Wojerowskeho noweho města wobkedźbowała. Zarjadowanje wotměje so póndźelu, 20. februara, w zetkanišću na Hasy Brigitty Reimann čo. 8 a započnje so w 14 hodź.
Wot wowcy k wołmje
Dołha Boršć. Prózdninske zarjadowanje „Wot wowcy k wołmje“ poskića štwórtk, 23. februara, wot 8 do 11 hodź. w přirodoškitnej staciji wuchodneje Hornjeje Łužicy w Dołhej Boršći (Förstgen) pola Mikowa. Wobdźělnicy tam nazhonja, kak z wowčeje wołmy samozhotowjena drasta nastawa.
Wusyłaja wo demokratiji
Budyšin. Rozhłosowa redakcija Sakskeho wukubłanskeho a wupruwowanskeho kanala (SAEK) je so z prašenjom zaběrała, štó so w Budyšinje na kotre wašnje wo demokratiju stara. Mjez druhim wopytachu Melanchthonowy gymnazij, pobychu w jewišćowej dźěłarni a prašachu so za lětušimi Budyskimi tydźenjemi demokratije. Nowe wusyłanje je wot 20. februara kóždu póndźelu w 20 a 22 hodź. jako livestream na internetnej stronje www.saek-bautzen.de słyšeć.
Za tydźeń zahaja nowu sezonu
Swěčki paslili
Policija (17.02.17)
Šofer w kabinje awta zemrěł
Bukecy. Wodźer nakładneho awta je zawčerawšim popołdnju na parkowanišću při zwjazkowej dróze B 6 w Bukecach kolegu w kabinje jeho nakładneho awta namakał. Za 57lětneho přińdźe kóždažkuli pomoc přepozdźe, přiwołany nuzowy lěkar móžeše jenož hišće smjerć muža zwěsćić. Wo přičinach dotal ničo znate njeje, po wšěm zdaću pak jedna so wo strowotny problem. Kriminalna policija pad přepytuje, zo móhli wobdźělenje třećeje wosoby wuzamknyć.
Blešu wódki nimale wupił
Hermsdorf. Na swětłym dnju dospołnje wopity bě srjedu popołdnju 49lětny muž na awtodróze A 4 z awtom po puću. Wobsadka awtodróhoweje policije je šofera Renaulta Laguna při wotbóčce Hermsdorf kontrolowała a hnydom jeho napadnu „chorhojčku“ pytnyła. Na to naměrichu pola njeho 2,26 promilow alkohola w kreji. Nimo toho měješe wón nimale wupitu blešu wódki w swojim płašću. Dalšu jězbu jemu policisća wězo zakazachu a přewodźachu jeho k wotedaću kreje.
Jutry prěni raz po nowej čarje
Wizija z lěta 2008 stanje so za lěsnu železnicu woprawdźitosć
Běła Woda (SN). Wotewrjenski termin za nowu čaru Mužakowskeje lěsneje železnicy k wěži na Ćežkej horje pola Běłeje Wody je jasny. Budźe to zeleny štwórtk, 13. apryla 2017. Hłowny iniciator projekta Dieter Schönebeck chce hač do toho chroniku lěsneje železnicy dopisać.
K zahajenju sezony 2017 startować bě cil, na kotryž běchu so wšitcy wobdźěleni hižo při prěnim zarywje w oktobru 2015 wusměrili. „A tónle termin lětsa zeleny štwórtk tež dodźeržimy“, so Dieter Schönebeck wjeseli. Potom ma mała železnica něhdźe tři kilometry dołhu čaru z turistiskim cilom „Wěža při Ćežkej horje“ wužiwać móc. Projekt je narunanje za čaru, kotraž bě so bliskeje brunicoweje jamy dla zhubiła.
Tež serbske barby w šuli zapřijeć
Na nowy Slepjanski němsko-serbski šulski centrum skedźbnja dotal jenož wulka tafla. Twarske dźěła maja so nalěto zahajić. Hižo nětko pak su wo tym rěčeli, kotre barby chcedźa za kubłanišćo wužiwać.
Slepo (AK/SN). Za twar němsko-serbskeho šulskeho centruma Slepo ma so wothłosowany a moderny koncept barbow wužiwać. Tole podšmórnyštaj Antje Schraps a Robert Günther z inženjerskeho běrowa ze sakskeho Lichtensteina na zašłym posedźenju Slepjanskeje gmejnskeje rady. Wonaj předstajištaj radźićelam prěni naćisk koncepta, kotryž orientuje so na aktualnym stawje planowanja kubłanišća kaž tež na nazhonjenjach z druhich šulow.
Z połnej paru hotuja so Sulšečanske žony na póstnicy. Tele dny so ...
Krótkopowěsće (16.02.17)
Karta zaso online
Budyšin. Serbska geografiska karta wo Łužicy je pod www.luzica.la internetnje zaso přistupna. To zdźěli wčera zamołwity webstrony Julian Nyča. Kaž Budyšan informuje, ma karta z pytanskej funkciju samo nowy poskitk. Nyča dyrbješe sej ze swojej kartu nowy serwer pytać, dokelž njebě mějićel dotal wužiwaneho zwólniwy projekt dale podpěrać.
Tež Drježdźany chcedźa EM
Drježdźany. Po Lipsku prócuje so tež sakska stolica wo to, europske koparske mišterstwa (EM) 2024 sobu wuhotować směć. Wotpowědne plany je měšćanske zarjadnistwo wobkrućiło, rozprawja rozhłós MDR. Hrać móhli w stadionje Dynama Drježdźany, kotrež ma 32 066 městnow. W septembru Němski koparski zwjazk wo móžnych hrajnišćach rozsudźi.
Dealeraj we Łazu zajataj
Zhorjelc. Policija je wutoru popołdnju we Łazu dweju pozdatneju dealerow z drogami w starobje 44 a 29 lět zajała. Po pokiwje přesćěhachu kriminalisća Audi, kotryž bě pola Załomja z Čěskeje do Němskeje přijěł. W awće namakachu 20 gramow crystala. Šofer steješe pod wliwom drogow a njeměješe jězbnu dowolnosć. Sudnik wukaza zajeće wobeju.
Turizm měli bóle podpěrać
Łaz (MFü/SN). Hodźinu wobydlerskich naprašowanjow na zašłym posedźenju Łazowskeje gmejnskeje rady wužiwaše tamniši předewzaćel Andreas Mühle za próstwu, zo měli gmejna a gmejnscy radźićeljo regionalnych turistiskich poskićerjow bóle podpěrać. „Dyrbjeli rozmyslować, kak móhli turizm wuwiwać“, napominaše Mühle, kiž při Třižonjanskim jězoru elektriske třikolesa trikke wupožčuje a tam nimo toho motorski parcours wobhospodarja. Byrnjež Łaz při zwjazkowej a dalšej statnej dróze ležał, wjele ludźi přez gmejnu jězdźi, bjez toho zo bychu wědźeli abo zhonili, kak atraktiwna kónčina je. Jeho swójske wabjenje w radiju bě lědma wuspěšne. Informaciska tafla na přikład při parkowanišću kupnicy, móhła z derje přemyslenymi wobsahami ludźi pohnuć, so po wokolinje bliže rozhladować.
Policija (16.02.17)
Wobchad z powětra kontrolowali
Budyšin. Rjane wjedro za lětanje wužiwaše zawčerawšim připołdnju wobchadna policajska inspekcija za wobchadnu kontrolu na awtodróze A 4 mjez wotbóčkomaj Hermsdorf a Zhorjelc. „Lětace wóčko“ dokumentowaše pjeć padow, w kotrychž wodźerjo nakładnych awtow minimalny wotstawk 50 metrow k jězdźidłu před nimi njedodźeržachu. Pilot helikoptera zdźěli tele pady wobsadkam policajskich awtow. Wone přewodźachu potrjechenych šoferow k přichodnemu parkowanišću, hdźež jim jich zmylk rozłožichu. W štyrjoch padach při tym wosta, zo změja wodźerjo pokutu 80 eurow zapłaćić. Při kontroli pjateho nakładneho awta a jeho 62lětneho wodźerja pak zastojnikam napadny, zo muž scyła žanu płaćiwu jězbnu dowolnosć njewobsedźeše. Zakazachu jemu tuž dalšu jězbu. Spedicija, za kotruž muž dźěła, dyrbješe druheho šofera pósłać, zo bychu nakładowane twory swój cil docpěli. Statne rěčnistwo so nětko z tymle padom dokładnišo zaběra.
