Mumije, pusćina a pyramidy
Na lětušim jolka-swjedźenju zaso wurjadnu zabawu dožiwili
Nuknica (JK/SN). W zymskim času přebywaja mnozy w Egyptowskej tamnišeho miłeho wjedra dla na dowolu. Štóž sej to lětsa snano z powołanskich abo financnych přičin njeje dowolić móhł, měješe sobotu w Nukničanskej Brězanec bróžni składnosć, Egyptowsku raz na typiske serbske wašnje dožiwić.
Hroža z pokutu
Ralbicy (SN/mwe). Njespjelni-li wobsedźer Ralbičanskeje kormjernje swini, swójba Gröbner, hač do kónca februara wohnjoškitne naprawy, dyrbi z pokutu hač do 20 000 eurow ličić. Při kontroli kormjernje loni w awgusće su tam gmejnscy wohnjowi wobornicy 21 njedostatkow zwěsćili. Tak bě na přikład błyskowód na třěše skóncowany a ma so zaso prawje instalować. Dale dyrbja wšitke wohnjowe hašaki přepruwować a nimo toho porjadny a dospołny wohnjowoborny škitny plan předpołožić.
Dokelž su Gröbnerecom lisćinu z njedostatkami hižo do hód přepodali, maja woni jako wobsedźerjo firmy po zakonju dwaj do šěsć tydźenjow chwile, wšitko sporjadkować. Nanajpozdźišo spočatk apryla chce gmejna potom přepruwować, hač su zwěsćene brachi wotstronjene a wotpowědne reparatury přewjedźene. Druhi zastupowacy wjesnjanosta gmejny Ralbicy-Róžant Michał Šołta praji, zo gmejna z wobsedźerjom kormjernje a jeje poradźowarjom běžny zwisk wudźeržuje. Wšako dyrbja so zakonske postajenja dodźeržeć, zo bychu wobydlerjo škitani byli.
Jolka w znamjenju Egyptowskeje
Krótkopowěsće (23.01.17)
Šiman wospjet powołany
Budyšin/Praha. Zwjazkowy wonkowny minister Frank-Walter Steinmeier (SPD) je mjeztym druhi króć zapósłanca CDU w Sakskim krajnym semje Marka Šimana za čłona přirady Němsko-čěskeho rozmołwneho foruma powołał. Forum wuhotuje składnostnje 20lětneho wobstaća jubilejnu konferencu přichodny kónc tydźenja w čěskej stolicy Praze.
Wjace drogow na šulach
Mnichow. Drogowa kriminalita na šulach Němskeje je minjeny čas zdźěla drastisce přiběrała. Tole wuchadźa ze statistiki krajnych kriminalnych zarjadow a nutřkownych ministerstwow krajow. W Badensko-Württembergskej su lěta 2015 cyłkownje 939 drogowych deliktow na šulach zličili, trójce telko kaž 2011. W Sakskej je so ličba porno lětu 2011 z 69 padami na 128 podwojiła.
Triksuja ze segwayjemi
Policija (20.01.17)
Cedlu zawostajić njedosaha
Běła Woda. Dokelž bě ze swojim awtom njewotpohladnje do druheho storčił a byrnjež jeno snadnu škodu načinił, ma 18lětny jězbny započatkar nětko mjerzanja z justicu. Wón bě při zaparkowanju na Fröbelowej do cuzeho awta załožił. Zawostajiwši na nim cedlu ze swojej adresu sej młody muž mysleše, zo je swoju winowatosć spjelnił. To pak je so mylił. Policija nětko pruwuje, hač jedna so wo ćeknjenje z městna njezboža. Lěpje by było policiju informować, na nju čakać a so z městna njewotsalić.
Pušćeja štomy za nowy nasyp
Prěni ćěkancy maja job
Agentura přihotuje migrantow na wukubłanje a na dźěłowe wiki
Budyšin (CK/SN). Wot měrca 2016 je Budyska agentura za dźěło 176 ćěkancam dźěłowe městno sposrědkowała. Při tym jedna so wo ludźi ze Syriskeje, Afghanistana, Pakistana a Eritreje. 132 z nich přistajichu předewzaća z gastronomije a hotelownistwa, z rjedźenskeho serwisa a z hladanskeho wobłuka. Někotři dźěłaja jako lěkarjo we Wojerecach a Zhorjelcu. 44 migrantow skutkuje nětko jako pomocnik. „Požadarjo azyla su naši přichodni dźěławi, tež hdyž to mnozy słyšeć nochcedźa“, rozłoži Thomas Berndt. Předewšěm pola młódšich hač 35 lět je zmysłapołne, jich za němske dźěłowe wiki kwalifikować, rjekny šef Budyskeje agentury za dźěło. Kaž wón měnješe, pak traje to něhdźe tři do pjeć lět.
Lipa ma stare nowe předsydstwo
Prjedy hač chór Lipa w jubilejnym lěće 2017 w Pančičansko-Kukowskej šulskej awli zaso zwučuje, běchu jeho čłonojo na hłownu wólbnu zhromadźiznu prošeni. Předsydka Franciska Zopic rozprawješe wo minjenym lěće, w kotrymž běše chór nimoměry aktiwny.
Loni mějachu Lipjenjo ze swojej dirigentku Jadwigu Kaulfürstowej 15 wustupow. Wjerški běchu druhi koncert „Lipa a přećeljo“ na kopatej połnej žurli w Haslowje, programaj w Choćebuzu a Budyšinje z dalšimi chórami k 25. róčnicy znowazałoženja Zwjazka serbskich spěwarskich towarstwow a wulkoprojekt „Serbski rekwiem“, kotryž su zhromadnje ze solistami a z Drježdźanskim orchestrom Sinfonietta pod nawodom Judith Kubicec w Chróšćanskej cyrkwi přednjesli. Tójšto připosłucharjow móžachu na nalětnim koncerće na zahrodźe klóštra Marijineje hwězdy a na tradicionalnym hodownym nyšporje w Róžeńće witać. W běhu lěta su so cyłkej tři spěwarki přidružili, tak zo ma tuchwilu 55 aktiwnych spěwarjow a spěwarkow.
Chce fairny a wotewrjeny być
Z porynskim humorom wón žiwjenje zmištruje. „Tón je mi hižo často pomhał“, měni Smjerdźečan Eduard Luhmann. Wot spočatka noweho lěta je 71lětny wuměnkar w pjeć gmejnach zarjadniskeho zwjazka Při Klóšterskej wodźe čestnohamtski změrc (Friedensrichter).
Změrc posrědkuje w padach kaženja domjaceho měra, wobškodźenja wěcow, křiwdźenja a wohroženja. Wěcownje, neutralnje a bjez předsudkow wón wustupuje. Wujednać a nic pak sudźić rěka zasada jeho dźěła. Zwjetša jedna so wo pady, w kotrychž chcetej wobdźělenej stronje radu změrca a nic hnydom jednanje, kotrež měło k wujednanju wjesć.
Najprjedy chce so Eduard Luhmann intensiwnje do swojeje noweje zamołwitosće zadźěłać a so prawidłownje na dalekubłanjach sakskeho zwjazka změrcow wobdźěleć. „Chcu wot nazhonitych změrcow wjele nawuknyć“, 71lětny wuswětla. Wažne su jemu fairnosć, česćownosć, přistojnosć a respekt, při čimž měli jemu jeho powšitkowne kubłanje a žiwjenske nazhonjenja pomhać.
