Zyma a sněh móžetej přińć
Awtodróhowa mištrownja we Wósporku derje přihotowana
Wóspork (CK/SN). Zo sněhowy płuh raz tčacy wostanje, by hórje hač zlě było. „To pak so poprawom njestanje. Mamy wšokolesowy naćěr a wšitko trěbne při sebi“, rozłožuje Ronny Hamann, šef Wósporskeje awtodróhoweje mištrownje. Zo tajki pad woprawdźe wuwzaće wostanje, su sobudźěłaćerjo krajneho zarjada za dróhotwar a wobchad tele dny kontrolowali, kak je sydom sakskich awtodróhowych mištrownjow na zymu přihotowanych. We Wósporku bě wšitko w porjadku, technika přihotowana, składy napjelnjene a słužbne plany hotowe.
Hońtwjerjo nyšpor swjećili
Kulow. Hubertusowy nyšpor wotmě so minjenu njedźelu w Kulowskej cyrkwi. Na nim wobdźělichu so přewažnje hajnicy-hońtwjerjo. Na nyšporje zahra dujerska skupina z Huskeje. Swjećili su nutrnosć na česć swjateho Hubertusa Kulowski farar Gabriš Nawka. Z nyšporom spominachu na swjateho, kotrehož mjeniny jutře swjećimy. Swj. Hubertus běše biskop a je zdobom patron hońtwjerjow. Jeho česća w katolskej runje tak kaž w ewangelskej cyrkwi.
Do hornčernje pohladnyć
Bóšicy. Lubowarjo keramiskich wudźěłkow njech njeskomdźa dźeń wotewrjenych duri w Bóščanskej Barchmannec hornčerni. Sobotu a njedźelu, 4. a 5. nowembra, móža sej tam wobaj dnjej wot 9 do 17 hodź. hornčernju wobhladać, přistajenym při dźěle přez ramjo hladać a sej něšto z wobšěrneho poskitka kupić. Nadrobniše informacije pod adresu www.toepferei-barchmann.de
Policija (02.11.17)
Pod wliwom drogow po awtodróze jěł
Budyšin. Pod wliwom drogow stejaceho młodeho muža je policija zawčerawšim na awtodróze A 4 mjez Budyšinom a Wósporkom zadźeržała. Jako zastojnicy 27lětneho wodźerja wosoboweho awta přesćahnychu, mějachu podhlad, zo bě tón drogi brał. Při kontroli na parkowanišću so wobkrući, zo steješe muž pod wliwom amfetaminow. Policisća jemu dalšu jězbu zakazachu a přewodźachu jeho k wotedaću kreje. Jeli w njej tohorunja slědy drogow namakaja, hrozy šoferej 500 eurow pokuty. Nimo toho njesmě měsac z awtom jězdźić.
„Dwunohate wjelki“ na pastwje byli
Jawora (SN/MWj). Hornjołužiske wjelki su so zašły čas wo wjele zjawneje kedźbnosće a njerjane powěsće starali. Mjeztym je rozsudźene, zo smědźa jednoho wjelka z Róžeńčanskeje črjódy třělić. W zwisku z wjelkom pak maja wobydlerjo tež cyle hinaše starosće, kaž nam Beno Wawrich z Jawory piše. W jeho lisće spočatnje rěka: „Minjenu njedźelu rano so njemało dźiwach, jako moje stadleško wowcow nadobo na dworje steješe město na kilometer zdalenej pastwje. Přičina so spěšnje wujasni: Płoty kaž tež milinu dawacy nastroj běchu so zhubili. Móžu jenož tukać, zo je so druhi hobby-wowčer minjenych wjelčich nadběhow nabojał a sej tuž spěšnje a tunjo škit wobstarał.“ Škoda je najprjedy wězo raz materielneho razu. Jaworčanej pak tež do hłowy njecha, „kak lochkomyslnje so tu riziko ćežkeho wobchadneho njezboža akceptuje, hdyž by skót do awta zaběžał“.
Wulka překwapjenka?
Krótkopowěsće (02.11.17)
Z dwurěčnym napisom
Wojerecy. K 500. róčnicy reformacije su wutoru před Wojerowskej Janskej cyrkwju Lutherowy dub sadźili. Dźěła přewjedźechu čłon wosadneje rady Rüdiger Mrosk, darićelka štoma Regine Jorga, farar Heinrich Koch a jeho katolski kolega Peter Paul Gregor. Pódla duba połožichu kamjeń, do kotrehož su mjeno štoma a jubilejne daty zadypane, a to dwurěčnje serbsce a němsce.
Riziko chudoby dale a wjetše
Lipsk. Riziko, dóstać rentu pod hranicu chudoby, budźe wosebje we wuchodnej Němskej přichodne lěta dale a wjetše. To wuchadźa z rozprawy magacina MDR „Exakt“. Hdyž stupa riziko chudoby na zapadźe wot tuchwilu 15 na 17 procentow, rozrosće wone na wuchodźe wot tuchwilu 21 na 36 proc., zwěsća prognoza instituta DIW hač do lěta 2036.
WiL wita přewzaće motodroma
Koch w ródnej wsy čitał
Hórki (KJu/SN). Na přeprošenje wjesneho towarstwa Při skale je rodźeny Hórčan Jurij Koch minjeny pjatk w tamnišej wohnjowobornej gratowni ze swojich dopomnjenkow na dźěćatstwo a młodźinske lěta čitał. Něhdźe 20 ludźi słyšeše wurězki z knihow „Zabych ći něšto rjec„ a „Wětrnik na třěše“. Mjez wopytowarjemi bě bratr Jurja Kocha Rudi, kiž móžeše rozprawam swojeho bratra něštožkuli přidać. Wjetšina wšak wosobiny a městna w knihomaj znaješe, tak zo dóńdźe k zajimawym rozmołwam. Młody Choćebuski akordeonist Daniel Grunski je čitanje hudźbnje wobrubił. 15lětny zanjese ruske pěsnje, wšako pochadźataj jeho staršej ze Sibirskeje, zwotkelž staj so před 16 lětami do Němskeje přesydliłoj.
Poskićeja adwentny kalender
Policija (01.11.17)
Konopjowe rostliny w bydlenju
Njechorń. Dokelž bě 30lětny muž w Njechornju pola Wósporka podhladny, zo drogi wobsedźi, je policija tele dny jeho bydlenski dom na nawsy přepytała. Při tym namaka dohromady 66 konopjowych rostlin, wjacore tyzy ze sušenym marihuanu, grat a nastroje za plahowanje konopje kaž tež snadne mnóstwo crystala. W přepytanym domje bydli tohorunja 59lětny nan podhladneho muža. Hač je wón něšto wo drogowej plantaži syna wědźał, dyrbja kriminalisća nětko wuslědźić.
Nawjes dóstanje nowy napohlad
Wulka Dubrawa/Zdźěr (CS/SN). Na swojim zašłym posedźenju je Wulkodubrawska gmejnska rada zelenu swěcu za nowowuhotowanje Zdźěrjanskeje nawsy dała. Při haće za hašensku wodu chcedźa płoninu wuplestrować, zo móhli tam busowe zastanišćo zarjadować. Zo při čakanju na bus nichtó do hata padnył njeby, připrawja škitnu lěsycu. Dale matej městnosć k wotstajenju kolesow a třěcha nastać, zo móhli so ludźo při dešću podstupić. Tež płoninu na tamnym boku puća chcedźa plestrować. Nastajeny budźe tam zornowcowy kamjeń jako studnja, z kotrejež ma so woda do susodneho hata žórlić, a wutworjene budu někotre móžnosće k posydnjenju. Zdźěrjanska nawjes ma so z městnosću zetkawanja stać, rjekny Wulkodubrawski wjesnjanosta Lutz Mörbe (njestronjan). Naprawu financuja nimo swójskich srědkow ze spěchowanskeho programa Leader.
