Drježdźany (SN). Sakske statne ministerstwo za socialne a škit přetrjebarjow spěchuje­ naprawy za wočerstwjenje dźěći a młodostnych, za čož nałoži 300 000 eurow. „Mnohim dźěćom a młodostnym je jězba do prózdnin z runolětnymi wosebite dožiwjenje. Zhromadny čas bjez staršeju je wažne nazhonjenje a podpěruje wosobinske wuwiće młodych ludźi“, potwjerdźa sakska ministerka Barbara Klepsch (SPD). Ministerstwo spěchuje naprawy w času, hdyž so šulska wučba njewotměwa, a to za zajimcow w starobje šěsć do 18 lět. Poskitki maja so w Němskej wotměć, předewšěm w Sakskej. Wočerstwjenske­ naprawy za młodostnych maja po pedagogiskim koncepće k tworjenju wosobiny, samonamakanju a -zwoprawdźenju přinošować. Při tym maja so dušine, duchowne a ćělne wu­wiće spěchować, mjezsobne zrozumjenje a toleranca přisporjeć a ekologiske wědomje spěchować. Próstwystajerjo móža być sakscy připóznaći nošerjo dobrowólneje pomocy młodostnym. Třěšne zwjazki móža zhromadnu próstwu swojich čłonow komunalnemu socialnemu zwjazkej Sakskeje zapodać.

Banka šuli pjenjezy dariła

Chrósćicy. Kamjenska wotnožka Ludoweje banki Budyšin je Chróšćanskej zakładnej šuli pjenježny dar 305 eurow přewostajiła, zdźěli nawoda kubłanišća Měrko Šmit. Wužiwać chcedźa pjenjezy za wudospołnjenje serbskeje katolskeje kwasneje drasty. 7. junija chcedźa ju we wobłuku­ programa „Kwasna rewija“ w „Jednoće“ předstajić.

Šmórnu stolicu ze zapisa?

Praha. Natwar nowych, wyšich hač stometrowskich mróčeleškrabakow w Praskej štwórći Pankrác móhł poziciju čěskeje stolicy Prahi w zapisu swětoweho kulturneho namrěwstwa UNESCO wohrozyć. Centrum swětoweho namrěwstwa kaž tež Mjezynarodna rada za pomniki a sydlišća chcetej nětko přepytować, hač njejsu nowe wysokodomy unikatnu Prasku panoramu wobškodźili.

Swjedźeń dróši hač planowane

Drježdźany. Lońši centralny swjedźeń k Dnjej jednoty Němskeje w Sakskej bě dróši hač předwidźane. Swobodny stat wuda za njón něhdźe 6,1 milion eurow, byrnjež běchu naposledk 4,3 miliony zakalkulowali.­ To zdźěli politikar Lěwicy André Schollbach, kiž bě so w statnej kencliji naprašował.

Smochćicy. Orchester, balet a chór Serbskeho ludoweho ansambla kaž tež orchester filharmonije Jelenjeje Góry wot­wjedu wopytowarjow Smochčanskeho hudźbneho swjedźenja 16. a 17. junija stajnje w 20.30 hodź. w duchu do Berlina. Pod nawodom dirigenta Dietera Kempy prezentuja wuměłcy „Berlinske nocy“. Zaklinča twórby Paula Lincki, Waltera Kolla a Friedricha Wulkeho. Meni přihotuje Budyski hosćenc „Culinarium“. Na woběmaj wječoromaj poskića darmotny shuttlebus, kotryž w 19 hodź. wot hotela „Best Western Plus“ hosći do Smochćic dowjeze a w 23 hodź. zaso wróćo do Budyšina pojědźe. Zastupne lisćiki płaća w předpředani 25 eurow, potuńšene 17 eurow, při wječornej kasy 30 eurow, potuńšene 20 eurow. Kartki dóstanu za­jimcy mjez druhim w Budyskim ekumeniskim tachantskim wobchodźe na Mjasowych wikach, w Domje biskopa Bena a w Biskopičanskej turistiskej informaciji.

Kupjel jutře wotewru

Kóždolětnje wuhotuje Smjerdźečanska LIPA dwě kubłanskej jězbje. Na lětušu prěnju poda so minjenu wutoru 40 wobdźělnikow do Sakskeje Šwicy, zo bychu so wěnowali stawiznam twjerdźizny Königstein. Hižo na tampuću běchu woni wo bicarnej­ rjanosći podłu Łobja fascinowani a zhonichu, zo znajemy pomjenowanje jónkrótneje rjaneje kónčiny jako­ Sakska Šwica hakle z 18. lětstotka. Tehdy staj šwicarskaj wuměłcaj, kotrejuž běchu na Drježdźansku wuměłsku akademiju powołali, kónčinu ze swojej domiznu přirunajo mjeztym wšěm znate pomjenowanje tworiłoj. Za čas nacionalsocializma pak njebě pomjenowanje němskeje krajiny jako „Šwica“ witane.