Policija (16.05.17)
Padustwo wujasnjene
Budyšin. Po tym zo su so njeznaći minjeny pjatk do banki na Budyskej Bohatej zadobyli a kompjuterowej wobrazowce pokradnyli, je policija tónle pad hišće samsny dźeń wujasniła. Podhladnaj staj Budyšanaj w starobje 20 a 21 lět. Wobaj běštaj dźeń do toho młodostneho wurubiłoj a staj policiji derje znataj.
Njedźelu darmotnje do Serbskeho muzeja
Serbja, Krabat, kolesowanje
Turistikarjo Łazowskeje gmejny chcedźa wušo hromadźe dźěłać
Łaz (AK/SN). Zo móhli sebje samoho lěpje zwičnić, měli turistiscy poskićowarjo Łazowskeje gmejny mjezsobu wušu syć wutworić. Tole podšmórny wjesnjanosta Thomas Leberecht (CDU) wčera jako wuslědk turistiskeho stajneho blida. Ćežišća měli być Serbja, Krabat a kolesowanje. Přeprosyła bě gmejna zastupjerjow towarstwow, hosćencow, pensijow, firmow kaž tež dalšich zajimcow.
500 wuměłcow na swjedźenju
Posledni mejski kónc tydźenja wotměje so lětuše 1015. Budyske nalěćo. Na wopytowarjow měšćanskeho swjedźenja čaka znowa wobšěrny program, kotryž su nowinarjam wčera předstajili.
Budyšin (CS/SN). Wot 26. do 28. meje předstaji so we wobłuku Budyskeho nalěća na třoch jewišćach něhdźe 500 wuměłcow. Kaž kulturny šef města Andreas Hennig zdźěli, budu mjez nimi stari znaći, kotřiž na swjedźenju prosće pobrachować njesmědźa, kaž kapała Jolly Jumper pjatk abo Thomas Stelzer sobotu.
Oficialne wotewrjenje swjedźenja sobotu prěni raz za to wužija, spožčić Budyski čestny wopon. Jón přijmjetaj Ellen Spengler a Reiner Löffler. Nadawk, prěni sud piwa natočić, přewozmje wyši měšćanosta partnerskeho města Heidelberga dr. Eckart Würzner (njestronjan). Partnerske město Jablonec nad Nisou prezentuje so wšitke tři dny ze stejnišćom swojeje turistiskeje informacije.
Mjez šwihelomaj dešća su minjenu sobotu w Ćisku meju mjetali. ...
Krótkopowěsće (15.05.17)
Parlamentariska přirada so zešła
Berlin. Parlamentariska přirada Załožby za serbski lud je dźensa swoje prawidłowne posedźenje w Berlinje wotměła. Pod nawodom zapósłanca CDU w Sakskim krajnym sejmje Marka Šimana wuradźowachu wo stawje projekta Witaj a wo wužadanjach přichodneho časa. Nimo toho rěčachu wo dobrym wuwiću Serbskeho ludoweho ansambla.
Žadaja sej koncept za Łužicu
Podstupim. Twarska industrija Braniborskeje a Sakskeje žada sej wot wobeju krajneju knježerstwow jasny koncept za strukturnu změnu we Łužicy. Kaž ze zhromadneje deklaracije wobeju industrijneju zwjazkow wuchadźa, je wažne, zo nastawaja dalše hospodarske srjedźišća. Předewzaća měli so hižo nětko na wužadanja za čas po brunicy nastajić.
Namócnosće zasudźili
Na nawsy sej zhromadnje zarejwali
Zwisk mjez sydlišćom a fabriku wožiwić
Hórnikecy (AK/SN). Historiski zwisk mjez bydlenskim sydlišćom a bywšej briketowej fabriku w Hórnikecach chcedźa z nowymi bydlenskimi domami wožiwić. Tam měli so předewšěm młode swójby zaměstnić. Tole bě sobotu wobsah dźěłarnički z architektami Choćebuskeho instituta za nowu industrijnu kulturu (INIK) w Hórnikecach. Składnostnje cyłoněmskeho dnja měšćanskotwarskeho spěchowanja běštej institut a město Wojerecy na to přeprosyłoj.
Policija (15.05.17)
Złotaki a slěbornaki fuk
Wojerecy. We wobłuku měnjenskeje bursy pjenjez stej njeznatej wosobje sobotu dopołdnja we Wojerowskej Łužiskej hali čerwjeny tablet z dohromady dwanaće drohotnymi pjenjezami pokradnyłoj. Při tym jedna so wo štyri złotaki a wosom slěbornakow. Jich cyłkownu hódnotu trochuja na 20 000 eurow. Jedyn ze skućićelow zapleće wobsedźerja pjenjez do rozmołwy, mjeztym je sej dalša wosoba tablet wzała a so z nim wotsaliła.
Smjertnje zbjezbožiła
Hory. Při wobchadnym njezbožu na dróze z Noweje Łuki do Ptačec je sobotu wječor 51lětna žona žiwjenje přisadźiła. Z dotal njeznateje přičiny zajědźe wona ze swojim Mercedesom w prawej křiwicy na lěwy bok dróhi a prasny do dweju štomow. Při sylnej zražce zleća žona z awta a hišće na městnje njezboža zemrě.
