Zhromadnje spěwać
Budyšin. Zwjazk Serbskich spěwarskich towarstwow (ZSST) přeprosy wšitkich zajimcow na zhromadne spěwanje do rumnosćow Serbskeho ludoweho ansambla (SLA), wutoru, 6. awgusta, wot 18 do 20 hodź. Poskitk měri so na wšitkich tych, kotřiž maja lóšt zhromadnje spěwać. Dalše tajke zarjadowanje budźe wutoru, 3. septembra.
Koncert ze „Stilbruch“
Kulow. Na koncert ze skupinu „Stilbruch“ přeprošuje towarstwo „Towarstwo (t) za Kulow z. t.“ 16. awgusta do Kulowskeho zetkawanišća „Jakubetzowy wustaw“. Zastup płaći dźesać eurow. Z huslemi, cellom, bijadłom a spěwanjom zahorja hudźbnicy swojich fanow po cyłej Europje. Zastup na koncert w Kulowje je wot 19 hodź. Kulturna załožba Swobodneho stata Sakskeje jón spěchuje.
E-scootery dale woblubowane
Mnozy maja wulke wjeselo z małym jězdźidłom
Wojerecy (SiR/SN). E-scootery mjeztym wšudźe jězdźa. Tež w našim regionje wobkedźbujemy ludźi na rolerach z elektriskim ćěrjenjom. Wone su małe a wobrotne. Tež Jost Karge je na te wašnje mobilnje po puću. 21lětny wužiwa e-scooter wosebje w swojim ródnym měsće Łuty abo tež w Drježdźanach, zo by sej k swojemu wukubłanišću dojěł. „Sym njewotwisny, jeli tramwajka njejědźe. Hdyž sym ze swojim scooterom po puću derje kedźbuju a wužiwam přeco nahłownik, tež hdyž njeje to winowatosć. Sym wšak hižo dosć zranjenych ludźi widźał“, młody muž praji, kiž chce so z nuzowym sanitetarjom stać. Při wužiwanju tutych elektriskich jězdźidłow ma so tójšto wobkedźbować. Přetož, so jednorje na jězdźidło stupić a wotjěć njeje móžne. Štóž předpisy njewobkedźbuje, dyrbi z chłostanjemi ličić. Tuž je radźomne, so wo aktualnych nowosćach za jězby z e-scooterom informować.
Dalša pućrubarska akcija we wokrjesu Dubja-Błóta
Lubin (SN/at). To běše symboliski akt dźensa dopołdnja při busowym zastanišću Při Kupce w Lubinje. Tam, hdźež busy do směra na Bórkowy wotjědu, maja nětko němsce a delnjoserbsce popisanu taflu. Zastanišćo je jedne z 80 w serbskim sydlenskim rumje wokrjesa Dubja-Błóta, na kotrymž su minjene tydźenje 159 dwurěčnych taflow připrawili. Kaž wokrjes informuje, su k tomu słušace informacije jězbnych planow tež němsce a serbsce podate. Projekt stej wokrjes z 9 681 eurami a braniborske ministerstwo za wědomosć, slědźenje a kulturu z 8 300 eurami spěchowałoj. Wokrjesny sejmik bě za předewzaće lětsa a loni 5 000 eurach přewostajił. Wot kraja přiwabjene spěchowanje je k tomu dopomhało, zo su projekt nětko dokónčili.
Namołwa wjesneje rady a wohnjoweje wobory wjes Smjerdźacu ...
Tunl bórze zaso wotewrjeny
Dlěje hač dwě njedźeli hižo je tunl za pěškow při Budyskich Žitnych wikach mjez Karla Marxowej a nakupowanskim centrumom zawrjeny. Přichodny tydźeń pak ma so podzemski přechod zaso wotewrěć.
Wulět kolegija do Stróže a Łaza
Z kuzłarjom na zahrodźe
Krótkopowěsće (02.08.24)
AWO rozpušći Witaj-skupinu
Bukecy. Witaj-skupinu Bukečanskeje pěstowarnje „Sonneneck“ z dźewjeć dźěćimi, kotraž je w nošerstwje Dźełaćerskeho dobroćelstwa (AWO), najebać spěchowanje rozpušća. Holm Natschke z AWO Budyšin skedźbni na rozmołwy z Domowinu a Rěčnym centrumom Witaj wo tym. Starši z regiona a Serbske ewangelske towarstwo rozsud, wo kotrymž chce AWO dźensa oficielnje informować, wotpokazuja.
Z nowym nawodnistwom
Pančicy-Kukow/Kulow. Z nowym šulskim lětom 2024/2025 matej zakładna šula „Ćišinskeho“ w Pančicach-Kukowje a Krabatowa zakładna šula w Kulowje noweju nawodow. Aleksander Kozak přewozmje tónle nadawk w Pančicach-Kukowje a Mandy Salowsky w Kulowje. Wobaj staj do toho hižo we wučerskim kolektiwje skutkowałoj. Z tym wonaj prěni króć nowe šulske lěto zahajitaj.
Moderne stejišćo ma nastać
Pokiw gymnaziastam
Budyšin. Přijězd za nowačkow do internata Serbskeho gymnazija Budyšin budźe njedźelu, 4. awgusta 2024 wot 18 do 21 hodź. Tam so šulerjo swojim stwam w nowym lěće přirjaduja. Na to je składnosć so zaměstnić a internat zeznać. Póndźelu, 5. awgusta, po wučbje, w 13.30 hodź wotměwa so za nowych wobydlerjow zahajenska zhromadźizna w internaće. Dokelž dóstanu na tutej wažne podłožki a wobšěrne informacije, ma so kóždy z nich wobdźělić, zdźěli nawodnica Gerlind Šubertowa.
Z ministrom so rozmołwjeć
Wulka Dubrawa. We jědźerni Wyšeje šule Wulka Dubrawa budźe srjedu, 7. awgusta, w 17.30 hodź., składnosć, so ze sakskim statnym ministrom za nutřkowne naležnosće Arminom Schusterom rozmołwjeć a diskutować. Tema zarjadowanja je: „Nutřkowna wěstota, wohnjowa wobora a sport“. Nimo njeho wobdźěla so na rozmołwnym kole čłon Sakskeho krajneho sejma Marko Šiman (wobaj CDU) a Wulkodubrawski wjesnjanosta Hardy Glausch (njestronjan).
Po motiwach Petersa
W něhdyšej kowarni kofej pala
We łužiskich wsach běchu stajnje hižo najwšelakoriše rjemjesła zakótwjene a su so zdźěla lětstotki zachowali. Dźensa je so wulki dźěl z tychle rjemjesłow bohužel pozhubił. W našej lětnjej seriji chcemy wobswětlić, hdźe běchu kotre rjemjesła doma a kotre wosebitosće su so při tym wobkedźbowali. (16)
Kaž w mnohich wsach našeje domizny je tež w Minakale kowarnja była, kotraž bu w lěće 1860 jako prěnja wuwučowanska kowarnja w Němskej natwarjena. We wobšěrnej chronice Minakała su wšě plany tehdy natwarjeneje kowarnje zachowane. Dokładnje podate su w nich městna za składowanje železa a druheho trěbneho materiala, hdźe maja stać kachle ze štyrjomi městnami za woheń a hdźe kowadła. Hdyž dorěčachu sej kupcy z kowarjom nadawk, bě za to mały běrow předwidźany. Po nic runje lochkim dźěle měješe so tež tehdy hižo hygiena dodźeržeć. Tuž bě planowar zdobom na rumnosć za duše myslił.
