Krótkopowěsće (06.11.24)
Trump jasny dobyćer wólbow
Washington. Kandidat republikanow Donald Trump je wólby prezidenta USA dobył. Po dotalnym wuličenju je sej wón 279 hłosow tak mjenowanych wólbnych muži zdobył. Jeho demokratiska kontrahentka Kamala Harris je hladajo na to jasnje podležała. Mjeztym su statni a knježerstwowi šefojo ze wšeho swěta, mjez nimi zwjazkowy kancler Olaf Scholz (SPD), Trumpej k dobyću gratulowali. (Hlej 2. str.)
2 700 ludźi ewakuěrowali
Wikow (Elsterwerda). Při twarskich dźěłach we Wikowje su dźěłaćerjo zawčerawšim bombu namakali. Je to něhdźe 250 kilogramow ćežka, ameriska lětarska bomba, kotruž mějachu fachowcy dźensa znješkódnić. Postajili su woni radius 1 000 metrow, kotryž dyrbja ludźo wopušćić. Něhdźe 2 700 ludźi je potrjechenych.
Zarjaduja nětko rěčne hodźiny
Dodawk ke koncertej
Bukecy. W zwisku z powěsću wo nazymskim koncerće w Bukecach na prěnjej stronje wčerawšeho wudaća SN organizator Bukečanskeje Bjesady Mato Krygaŕ na to skedźbnja, zo wotmě so zarjadowanje w Bukečanskej Wjesnej hospodźe, nic w tamnišim Koncertowym a balowym domje. Za zmylk prosymy wo wodaće. Wutrobnje dźakuje so Mato Krygaŕ pomocnikam kołowokoło Domaša Žura, čłona Kulturu spěchowaceho towarstwa w Bukecach za organizaciju koncerta. „Bjez jich pomocy njeby tutón kulturny wjeršk wjace móžny był. Tež pokročowanje nałožka w Bukecach budźe jenož na tute wašnje móžne“, wón pisa.
Na čitanje generacijow
Publikum do spěwanja pohnuwali
Marathon na Krabatowej šćežce
Nic předać, radšo přenajeć!
Łaz (AK/SN). Gmejna Łaz chce južny pobrjóh Hórnikečanskeho jězora we Wulkich Ždźarach zaměrnje lokalnym towarstwam spřistupnić. Na swojim oktoberskim posedźenju gmejnska rada jednohłósnje wobzamkny, zo chce Wudźerskemu towarstwu Wulke Ždźary z wotpowědnym zrěčenjom ležownosć při planowanym centrumje towarstwow přewostajić. Zrěčenje ma 40 lět płaćić, rozprawješe Łazowski wjesnjanosta Thomas Leberecht (CDU).
Radźićel Ronald Woschick (Wolerske zjednoćenstwo za jednotnu gmejnu Łaz) klawslu w naćisku zrěčenja kritizowaše. Tam so pisa, zo ma gmejna wotškódnjenje płaćić, jeli so towarstwo přećiwo zrěčenju přeńdźe. Woschick sej žadaše, zo gmejna klawslu přepruwuje. Jens Kieschnick, nawoda gmejnskeho wotrjada za twarstwo a management imobilijow, skedźbni w tym zwisku na prawniski dohlad, kotremuž běše gmejna sčasom naćisk zrěčenja předpołožiła. Tutón je zrěčenje za přizwolenja kmane pohódnoćił. Radźićeljo so na kóncu na to dojednachu, zo ma wjesnjanosta Thomas Leberecht naležnosć mjez prawniskim dohladom a towarstwom wujasnić.
Rjany wukónc sezony w Rownom
Rowno (JoS/SN). Z přazu je Towarstwo Njepilic statoka sobotu popołdnju swój lětuši program na ródnym statoku Hansa Njepile w Rownom zakónčiło. Přišli běchu bjezwuwzaćnje žony. W přihódnej nazymskej atmosferje zahajichu popołdnjo při šalce kofeja a domjacym tykancu, a to cyle same mjez sobu, bjez kóždehožkuli hosća. Po lěće połnych wjetšich a mjeńšich zarjadowanjow sej tajke małe dowěrliwe koło tež raz chwalachu.
Pozdźišo žony na kołwrótach swoje kmanosće w předźenju lena trenowachu. Nazhonićiše z nich młódšim stare rjemjesło rozłožichu. Připódla rozprawješe Grodkowčanka Edith Stübke wo předźenju wołmy wowcow a alpakow. Nimo toho běše wona swoje wołmjane wudźěłki na předań sobu přinjesła. Za ćopłe nohajcy, šawle, rukajcy a čapki so wšitke wobdźělnicy jara zajimowachu. To njezadźiwa, wšako běchu so sobotu prěni raz zmjerzki we Łužicy přizjewili.
Z „małkom“ sej Blunjo wotkryć
Pozabyte bajowe postawy maja dźěl noweho turistiskeho poskitka być
Blunjo (SiR/SN). Kubołćiki, błudnički, připołdnica a podobne postawy ze serbskich bajow su poměrnje znate a w mnohich kónčinach dwurěčneje Łužicy prezentne, dokelž wone identitu wobydlerjow skrućeja. Porno tomu su małki skerje pozabyte. Hdyž pak Doris Kasperowa wo nich rěči, začuwaš jeje zahoritosć a fascinaciju. Małe přirodne stworjenja jewja so w starych serbskich bajach a powědkach. Małki, tak Doris Kasperowa powěda, su bajowe postawy wokoło Blunja a Bjezdowa. Přesydlenja brunicy dla su ludźo na nje pozabyli. Stworjenja su měšeńca mjez čłowjekom a zwěrjećom z pazoromaj a wopušu.
Krótkopowěsće (05.11.24)
Roschek chce za CDU kandidować
Budyšin. 52lětny Steffen Roschek je dotal jenički požadar na sobotnišimaj zhromadźiznomaj čłonow CDU w Chrósćicach wo zastojnstwo předsydy strony w Budyskim wokrjesu a kandidaturu za wólby zwjazkoweho sejma. Syn serbskeje maćerje je předewzaćel za IT a lětarstwo. Wón chce Uda Witschasa naslědować a so we wólbnym boju přećiwo Karstenej Hilse (AfD) přesadźić.
Zawod na wikach w Barcelonje
Barcelona. Inowatiwne koncepty, projekty a technologije za naslědne wuwiće městow su tema na wikach Smart Expo World w Barcelonje, hdźež so tež předewzaće z Hornjeje Łužicy wobdźěli. Zastupjerjo zawoda ZIEGLER z Pěskec wudźěłki prezentuja. Tež dalše předewzaća z Drježdźan a Lipska su wot dźensnišeho do zajutřišeho w Barcelonje zastupjene.
Palast město ležownosćow?
Rjana swěca a barokne kostimy
Budyska nakupowanska nóc Romantika tysacy wopytowarjow přiwabiła
Budyšin (CS/SN). Lětuša Budyska Romantika měješe předwčerawšim popołdnju rjany serbski zazběh z wernisažu Nowowješćanskeho drjeworězbarja Mikławša Dyrlicha w rumnosćach Serbskeje kulturneje informacije w Serbskim domje. Je to hižo třeći serbski wuměłski rjemjeslnik, kotrehož twórby tam zjawnosći předstajeja. Nic jeno Serbam derje znaty drje je Mikławš Dyrlich swojich drjewjanych běło-złotych narownych křižow na Ralbičanskim kěrchowje dla. Dohromady je něhdźe 600 tajkich w swojim wuměłsko-rjemjeslniskim žiwjenju stworił, kaž sam rjekny. Wón je dźěłarnju swojeho nana přewzał a wjedźe rězbarsku tradiciju swójby dale. Nadawki wšak dochadźeja z cyłeho swěta k njemu, samo za Vatikan je hižo dźěłał. Sobotu běše jeho tež bratr, basnik a awtor Benedikt Dyrlich, na wotewrjenje wustajeńcy přewodźał. Wón předstaji publikumej swój essay „Rězbarske wuměłstwo mojeho nana“, a to w serbskej runje tak kaž w němskej wersiji.
Policija (04.11.24)
Póćmje do howjadow zrazył
Chrósćicy. 30lětny šofer transportneho awta marki VW běše sobotu w połnocy na Puću při pomniku w Chrósćicach po puću. Wosrjedź njewobswětleneje dróhi stejachu tři młode howjada, kotrež jězdźer přepozdźe wuhlada, tak zo do jednoho z nich zrazy. Wone wobchadne njezbožo přežiwiło njeje. Tamne zwěrjata so nhjezranichu, wobsydnicy su je pozdźišo zapopadnyli. Howjada móžachu z pasty twochnyć, dokelž běše zastaranje elektriskeho płotu z milinu přetorhnjene. Cyłkowna škoda wobchadneho njezboža wučinja něhdźe 21 000 eurow. Policija nětko za přičinami wobškodźenja płotu slědźi.
