Do njedawneje wólby parlamenta w Španiskej je ministerski prezident Pedro Sánchez (PSOE, socialistiska dźěłaćerska strona) warnował, zo móhł PP, konserwatiwna resp. křesćansko-demokratiska strona, hromadźe z „Vox“ (hłós, prawicarskopopulistiska strona) knježerstwo přewzać. „Vox“ je skeptisce napřećo EU nastajeny a wotpokazuje prawa awtonomije regionow. Dotalny nawoda opozicije Alberto Núñez Feijóo (PP) je drje wólby dobył, ale 136 mandatow PP plus 33 zapósłancow VOX plus zastupjerjej regionalneju stron su wšo dohromady 171. Za wjetšinu a z tym tworjenje noweho knježerstwa by Feijóo 176 městnow w parlamenće trjebał, połojcu dotal 350 zapósłancow plus jedyn mandat. Tola tež „lěwy“ blok ma jenož 172 zapósłancow, mjez nimi 122 zastupjerjow PSOE.
W juniju 2023 wuńdźe w měsće Bogatynia dalša kniha znateje pólskeje awtorki Haliny Barań ze serbskej tematiku, mjenujcy biografiska powědka wo Janje Arnošće Smolerju na dobrych 200 stronach. 19. junija wotmě so w tamnišej Bibliotece publicznej (zjawna bibliotka) před něhdźe 50 zajimcami knižna premjera, na kotrejž wobdźělichu so – nimo měšćanosty Bogatynje Wojciecha Dobrołowicza – tež někotři hosćo z Budyšina. Dokumentujemy tule narěč literarneho stawiznarja prof. Dietricha Šołty w serbskim přeložku.
Budyšin (SN/bn). Němsko-Serbske ludowe dźiwadło je w hrajnej dobje 2022/2023 dohromady něhdźe 124 000 wopytowarjow na cyłkownje 836 zarjadowanjach zličiło. Najwjace přihladowarjow přiwabi minjenu njedźelu zakónčene Budyske lěćne dźiwadło. Inscenaciju „The Addams Family“, kotruž pokazachu 35 króć na dworje hrodu, wobhlada sej něhdźe 34 000 zajimcow; dohromady 30 předstajenjow 4. dźiwadłoweje zahrody wopyta wjace hač 1 800 a 17. Budyske filmowe nocy na hrodźe něhdźe 660 ludźi. Najwoblubowaniša produkcija zwonka dźiwadłoweho lěća bě hra „Räuber Hotzenplotz und die Mondrakete“ z něhdźe 8 000 přihladowarjemi, najčasćišo hrata inscenacija bě klankodźiwadło „7 Geißlein“ ze 46 předstajenjemi, na kotrych zličichu wjace hač 3 600 zajimcow. Serbske poskitki přiwabichu cyłkownje něhdźe 7 000 hosći (SN rozprawjachu).
„Wopytowarske ličby su nimale niwow časa do korony docpěli. Jasny rozrost wo něhdźe 40 procentow wo tym swědči, zo je dźiwadło wobydlerjam regiona wažne. Smy přewšo wužadowacu hrajnu dobu dźakowano hoberskemu angažementej cyłeho ansambla zmištrowali“, intendant NSLDź Lutz Hillmann zjima.
Budyšin (SN/MiR). So z filmowanjom zaběrać je něšto, štož dźěći, młodostnych a dorosćenych puta, wosebje hdyž su zajimy zwjazane z praktiskim zaměrom. Tajki slěduje projekt towarstwa Wuchodna Sakska změni z.t. „Sym hižo dlěje wo tym rozmyslował, z kotreje přičiny nima wjes Schwosdorf, njedaloko Kamjenca, w kotrejž bydlu, serbske mjeno. Susodne wsy pak to maja, serbske a němske mjeno“, powěda čłon towarstwa Ronny Böhme. To je jeho k tomu pohnuło projektowu ideju za krótkofilm naćisnyć a wo financielnu podpěru prosyć. Z financielnymi srědkami we wysokosći 2 500 eurow, kotrež je towarstwu Sakska kulturna załožba přewostajiła, je so njedawno skupina dźěći wot sydom do dwanaće lět w studiju LUCIJA, kotrež je w nošerstwje Serbskeho šulskeho towarstwa, z techniku filmowanja zaběrała. „To pak běše jenož jedyn wobłuk třidnjowskeho projekta“, praji tamniši projektowy koordinator, medijowy pedagoga a zamołwity za studijowu produkciju Michał Cyž. „Sym hólcam a holcam wědu wo filmowej technice sposrědkował a smy tež cyle praktisce dźěłali.
Zhorjelc (SN/bn). Lětsa štwórty raz na hrajnišćach w 14 wsach a městach cyłeje Łužicy wuhotowany dwutydźenski Łužiski festiwal – prěni króć w zamołwitosći nowowutworjeneje towaršnosće z wobmjezowanym rukowanjom samsneho mjena (SN rozprawjachu) – skići z dohromady 35 zarjadowanjemi wospjet wotměnjawy program, wopřijimacy na přikład koncerty, wustajeńcy, inscenacije dźiwadłow a baletow, čitanja a dźěłarnički. Zazběh twori sceniski koncert „Verdi – Zimmermann“ 25. awgusta w Choćebuzu, zwoprawdźeny mjez druhim wot Drježdźanskeje filharmonije, Čěskeho filharmoniskeho chóra Brno a dźiwadźelnika Rainera Süßmilcha. Argentinska wirtuozowka na křidle Martha Argerich chce publikum znowa wobkuzłać, tónraz w Ochranowje; jazzowe duwo Wollny & Parisien wustupi mjez druhim w Běłej Wodźe a dźiwadźelnica Claudia Michelsen čita w Budyšinje powědančka pólskeje, z Nobelowym mytom literatury wuznamjenjeneje awtorki Olgi Tokarczuk.
Budyšin (SN/mb). Po tym zo njemóžachmy na plakaće za 18. tydźenje Budyskeho žonopa žane serbske słowčko wuhladać, smy so pola Turistiskeho towarstwa Budyšin wobhonili, kak wupada z dwurěčnosću. Předsyda Dietmar Stange, kiž je wšěm medijam wotpowědne informacije sposrědkował, chětř reagowaše. A tak změjeće nadźijomnje, hdyž wužiće poskitki wšelakich hosćencow wot přichodneho tydźenja hač do spočatka požnjenca (SN su rozprawjeli), jědźny lisćik z tutym dwurěčnym logom w rukomaj (hlej naprawo deleka).
Tola Turistiske towarstwo Budyšin ma tež festiwal w starym měsće na starosći, tule su woni hnydom eksternu pomoc nadešli a dwurěčny plakat zhotowili. Kaž hustodosć w našich kónčinach trjebaš pak za serbske pismiki dobrej wóčce ...
„Pisać a čitać to, štož druzy pisaja“, tak Milenka Rječcyna praji, „to je moja wěc. Jeli to njemóžu, mi něšto pobrachuje.“ Mjeztym wona dlěje hač 33 lět na polu žurnalistiskeho a zjawnostneho dźěła skutkuje. Před něšto tydźenjemi je so po krótkej přestawce do redakcije Serbskich Nowin nawróćiła.