Dźensa před 125 lětami narodźi so we Wojerecach syn železnicarja, pozdźišo krawski mišter, mějićel wobchoda za narodnu drastu, braška, ludowy wuměłc a aktiwny Domowinski funkcionar Jan Wjacsławk. Wón nawukny powołanje krawca a wotewrě 1926 na Złokomorowskej w ródnym měsće wosebity wobchod a krawcownju za serbsku narodnu drastu. Po jeho smjerći 9. awgusta 1963 je jeho dźowka Hana Bejmina wobchod přewzała. Jan Wjacsławk bě wuběrny znajer wosebje Wojerowskeje drasty, poradźowaše jeje nošerki, zhotowješe a předawaše jim drastu a wušiwanki, kotrež zdźěla sam zhotowi. Njebě jenož wušiwar, ale tež wuběrny debjer jutrownych jejkow. Na mnohich wustajeńcach je jejka prezentował a z nimi na wubědźowanjach prěnje myta dobył. Za čas NDR bě poradźowar a hłowny akter dokumentarneju filmow „Hdyž Jank a Hanka kwasujetaj“ a „Přa­slica a póstniski kwěćel“. 38 lět bě woblubowany ewangelski braška. Do lěta 1937 bě předsyda Serbskeho burskeho towarstwa Wojerecy a po 1945 Domowinskeje skupiny Wojerecy-Stare město. W lěće 1935 je posledni Domowinski zjězd do zakaza přez nacijow sobu organizował. Manfred Laduš

Dźensa před 150 lětami narodźi so w Cazowje (Zahsow) pozdźiša delnjoserbska pěsnjerka a spisowaćelka Marjana Domaškojc swójbje wjesneho krawca. 45 lět dźěłaše wona w bliskim Choćebuzu w tekstilnej fabrice. Jako wědoma Serbowka chodźeše čas žiwjenja w narodnej drasće. Srjedź 1920tych lět zezna Domaškojc redaktorku Serbskeho Casnika a spisowaćelku Minu Witkojc, kotraž ju do basnjenja a pisanja pohonjowaše. Tak wozjewješe basnje wo přirodźe a wjesnym žiwjenju. Zdobom ludźi namołwješe pěstować maćeršćinu a ludowe tradicije, zo by so serbstwo zachowało. Jeje najwjetše literarne dźěło bě 1929 spisana socialnokritiska hra „Z chudych žywjenja“, prěnja swojeho razu w serbskej dramatice. Po wozjewjenju w časopisu „Łužica“ pak njejsu kruch w Serbach hrali, ale w čěskim přełožku Karela Kyasa 1932 w Praze, Mladej Boleslavje a druhdźe w Čěskej. Žadanje nacijow, w hrě jewjacemu so židowskemu wikowarjej dać negatiwny raz, wona wotpokaza, na čož bu wot fašistow wobkedźbowana. Dalšu lóštnu hru „Šwickojc pytaju źowku“ je NSLDź 1977 wuspěšnje předstajało. Domaškojc zemrě 11. žnjenca 1946 w Cazowje. Manfred Laduš

Dźensa před 25 lětami zemrě wučer a kulturnik Jan Kósk w Barće. Wón bě so 4. nazymnika 1930 w Chrósćicach w skromnych poměrach narodźił. Bě šuler gymnazijow w Čěskej Lipje a Warnoćicach. Wuchodźiwši Serbski wučerski wustaw w Radworju bu wón nowowučer w Njebjelčicach a Bóšicach. Sta so z fachowym wučerjom serbšćiny a z diplomowym pedagogu. Wjele lět wukonješe zamołwitu funkciju sektorownika w kul­turnym ministerstwje NDR a je so jako tajki wobšěrnje a z angažementom za rozkćěw našeje powołanskeje kultury a ludoweho wuměłstwa zasadźał. Na organizowanju a přewjedźenju sydom centralnych festiwalow serbskeje kultury měješe wažny podźěl. Postarał je so wo wukrajne wuprawy. Swojich wulkich nazhonjenjow na polu serbskeje kultury dla je po zjednoćenju Němskeje jako njeparujomny fachowc w zwjazkowym ministerstwje nutřkowneho skutkował. Je tež spisowaćelił a basnił. Wot njeho je mjez druhim činohra „Nalětnje njewjedro“, kotraž měješe w Budyskim NSLDź prapremjeru. Dale spisa poem „Z rańšej hwězdu sony du“ a někotre spěwy.

13. małeho róžka 1947 zemrě w Šěra­chowje justicny rada, prawiznik a wjelelětny zarjadnik stareho Serbskeho domu na Budyskich Lawskich hrjebjach Michał Cyž. Narodźił bě so 7. meje 1858 ku­blerskej swójbje w Žuricach. Wón bě chowanc Serbske­ho seminara a studowaše po maturiće w Praze a Lipsku prawnistwo a filozofiju. Po studiju bě referendar w Šěrachowje a Budyšinje a na krajnym sudnistwje w Lipsku. Dalšeje słužby w statnej justicy so Cyž wzda. Wot lěta 1895 do 1928 skutkowaše wón w Budyšinje jako prawiznik a notar. Nimale 19 lět bě na wuměnku w Šěrachowje. Wot lěta 1891 přisłušeše Maćicy Serbskej, w kotrejž je we wšelakich načolnych funkcijach wjele lět aktiwnje skutkował. Wot lěta 1897 bě čłon twarskeho wuběrka Maćičneho Serbskeho domu. 1898 dowěrichu jemu wažnu funkciju hospodar­ske­ho zarjadnika ležownosćow Maćicy a po wote­wrjenju Serbskeho domu zdobom nadawk zarjadnika hač do lěta 1928. W Budyšinje předsydarješe přez lětdźesatki ­katolskemu šulskemu towarstwu. Dale bě aktiwny městopředsyda To­war­stwa ­Cyrila a Metoda. Maćica Serbska po­mjenowa Michała Cyža 1922 za swojeho čestneho čłona. Manfred Laduš