Braniborska za lěpše poćahi k Pólskej
Podstupim (dpa/SN). Braniborska chce zhromadne dźěło ze susodnej Pólskej zesylnić. Krajny sejm je wčera próstwu koalicije SPD a BSW wobzamknył. Z tutej namołwjeja krajne knježerstwo, styki k susodnym wojewódstwam rozšěrić.
Měšćanske partnerstwa městow Frankfurta, Gubina, Schwedta a Prenzlauwa z pólskimi partnerskimi městami měli so dale wutwarić. Dale žadaja sej wot Zwjazkoweho knježerstwa w tym zwisku, zo njesměli pomjezne kontrole k Pólskej za wobmjezowanje ilegalneje migracije hospodarstwo, powołanskich dojězdźowarjow a šulerjow haćić. W Braniborskej dźěła něhdźe 40 000 pólskich staćanow. Pěstowanje a dalše wuwiwanje přećelskich stykow do Pólskeje je we wustawje Braniborskeje zakótwjene. Braniborsku a Pólsku zaběra tójšto zhromadnych temow. Tysacy wšědnje mjez krajomaj tam a sem jězdźa. Mrětwa rybow we Wódrje lěta 2022 je dobre poćahi nachwilnje zaćěmniła.
Frakcija CDU je namjetej přihłosowała, frakcija AfD ju wotpokazuje.
Macron Merza w Parisu witał
Předsyda CDU po wólbnym dobyću francoskeho prezidenta wopytał
Paris (dpa/SN). Němski wólbny dobyćer Friedrich Merz (CDU) a francoski statny prezident Emmanuel Macron staj so w Pariskim Élyséeowym palasće zetkałoj. Wobaj staj w tři hodźiny trajacej rozmołwje swoju wolu zwurazniłoj, nowy kapitl w němsko-francoskich poćahach zahajić. Tak rěkaše wčera wječor z kruhow CDU/CSU. Bě to prěnja wukrajna jězba předsydy CDU po dobyću unije we wólbach zwjazkoweho sejma minjenu njedźelu.
Wo nadrobnosćach rozmołwy njejsu ničo rjekli. Francoska strona njeje žane stejišćo wozjewiła. Z unije jenož rěkaše, zo knježeše na zetkanju „njewšědnje přećelna atmosfera“ a zo běštaj sej Merz a Macron w temach přezjednaj. Z tym staj tójšto nastorkow zhromadnych iniciatiwow namakałoj. Merz pisaše po tym na platformje X němsce a francosce: „Wutrobny dźak, luby Emmanuelo, za twoje přećelstwo a za twoju dowěru do němsko-francoskich poćahow. Zhromadnje móžetej našej krajej wjele za Europu docpěć.“
Wólby w Serbach
Cyrkej woza dla protestuje
Köln (dpa/SN). Jedyn z wozow Kölnskeho karnewaloweho přećaha wo temje znjewužiwanje w cyrkwi zbudźa hižo do róžoweje póndźele raznu kritiku CDU a Kölnskeho arcybiskopstwa. Wóz zwobraznja spowědny stoł, z kotrehož ruka měšnika ministranta k sebi kiwa. Scenariju připisali su hesło: „Jězus će lubuje“.
Wjacori politikarjo CDU mjenuja scenu na wozu w lisće Kölnskemu karnewalskemu swjedźenskemu komitejej „wostrózbjacu“, „ranjacu“ a „bjez kóždeho začuća“. Woni na to pokazuja, zo přisłuša wjetšina Kölnjanow přeco hišće křesćanskej cyrkwi. Wobraz njesměł přećah róžoweje póndźele a karnewal ze swojej fatalnosću wothódnoćić. Z tutymi słowami kritizuja politikarjo CDU planowanu akciju, mjez nimi bywši Kölnski wyši měšćanosta Fritz Schramma. Tež biskopstwo kardinala Rainera Marije Wölki přećiwo wozej protestuje. Na jeho internetnej stronje rěka: „Ně, to njeje scyła žortne. W karnewalu prosće wšitko njeńdźe.“ Hłowny dypk je, „zo je Jězus sam ze znjewužiwanjom zwjazany“.
Nawoda přećaha Marc Michelske na to pokazuje, zo ma karnewal nadawk, „porst do rany połožić“.
Stare rjemjesła zajim zbudźili
To a tamne (27.02.25)
Nócne zwonjenje wulkeje kapałki na kěrchowje je ludźi we Wuppertalu znowa z nócneho spara storhnyło. Něhdźe dwě hodźinje zwony bjez přestaća zwonjachu. Policija dyrbješe zamkarja skontaktować, dokelž njeběchu zamołwići kěrchowa docpějomni. Hakle njedawno mějachu tam podobny problem. Rěčnica zwjazka pohrjebnišćow wopisowaše podawk jako „wulke hódančko“. Prawdźepodobnje bě wupad miliny elektroniske wodźenje zwonow zamylił. Jako tu milina zaso bě, započachu zwony zwonić.
Chětro rozhorjeny bě chilski prezident Gabriel Boric wupada miliny dla, kotryž bě předwčerawšim, wutoru, wšón kraj zlemił. Njeje akceptabelne, zo bě wšědne žiwjenje wobydlerjow w Chile kaž tež předewzaćow takle potrjecheny, Boric swarješe. Nimale wšitcy wobydlerjow njemějachu na tym dnju milinu.
„Bój přećiwo prawicarstwu“ nawopačne wuskutkował
Znaty konserwatiwny politologa prof. Werner J. Patzelt je w interviewje z našim wječornikom Marcelej Braumanej rozkładł, čehodla je dotalna strategija přećiwo AfD zwrěšćiła.
Samo w serbskim katolskim třiróžku Radwor-Chrósćicy-Kulow njemóžeš polarizaciju w zwisku z AfD prěć: na jednej stronje ludźi, kotřiž wočakuja, zo „módri“ jim domiznu zachowaja* – jich ličba cyle wočiwidnje přiběra. Na druhej stronje mnohich dalšich, kotřiž wobhladuja přiwisnikow AfD jako wotchilerjow wot zasadnych hódnotow křesćanstwa. Waša kniha wopisuje, čehodla bywa AfD w tutym spochi so přiwótřacym konflikće mjeztym hižo lětdźesatk dale a sylniša. Što byšće nam radźił – kak sej z tuteje spirale wulězemy?
Klingbeil za předsydu woleny
Berlin (dpa/SN). Nowa frakcija SPD w zwjazkowym sejmje je dźensa Larsa Klinbeila za noweho předsydu wuzwoliła. Dotalny předsyda Rolf Mützenich bě njedźelu wječor po wólbnej poražce SPD wotstupił. Na to je stronski prezidij 47lětneho Klingbeila, kotryž pochadźa z Delnjeje Sakskeje, namjetował. Klingbeil ma zdobom wodźacu rólu w rozmołwach z CDU/CSU wo wutworjenju noweho zwjazkoweho knježerstwa přewzać.
Žane polěpšenje pola bamža
Rom (dpa/SN). Strowota bamža Franciskusa so tež po dwanaće dnjach w chorowni njepolěpši. Staw swjateho wótca je dale kritiski, byrnjež stabilny, Vatikan zdźěla. Wot kónca tydźenja njećerpješe 88lětny wjace na kuši dych. Tež jeho krej je w porjadku. Nawodu katolikow wot srjedź měsaca w chorowni Gemelli w Romje lěkuja. Franciskus ćerpi na ćežkim zahorjenju płucow. Mjeztym so wěriwi swěta wšědnje za njeho modla.
AfD chce wjace wliwa
